فرانسيانىڭ ماشينا جاساۋ كومپانياسى قازاقستانعا تاعى 100 ميلليون ەۋروعا دەيىن قۇيۋعا دايىن
قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.
پرەمەر- مينيستر ەلەكتروۆوزدار مەن وعان قۇرامداس بولشەكتەر وندىرەتىن Alstom كومپانياسى قازاقستانداعى تەمىرجول ونەركاسىبىن جاڭعىرتۋ باعدارلاماسىنىڭ نەگىزگى قاتىسۋشىلارىنىڭ ءبىرى ەكەنىن اتاپ ءوتتى.
سونىمەن قاتار كومپانيا قۇزىرەتتىلىك ورتالىق رەتىندە دە قىزمەتىن دامىتۋدا، ناتيجەسىندە ءبىزدىڭ ەلىمىزدە بىلىكتىلىگى جوعارى ينجەنەرلەردىڭ جاڭا بۋىنى قالىپتاسىپ كەلەدى. قازاقستان ۇكىمەتى Alstom كومپانياسىمەن ۇزاق مەرزىمدى ىنتىماقتاستىقتى جالعاستىرۋعا دايىن، - دەدى ءاليحان سمايىلوۆ.
ۇكىمەت باسشىسىنىڭ ايتۋىنشا، رەسپۋبليكادا ينۆەستورلار ءۇشىن سالىقتىق جانە كەدەندىك جەڭىلدىكتەر كوزدەلگەن، ينفراقۇرىلىم جۇرگىزىلىپ، باسقا دا قولايلى جاعدايلار جاسالىپ جاتىر. سونىڭ ارقاسىندا قازىرگى تاڭدا تەمىرجول ماشينالارىن جاساۋ جانە شەتەلدىك كومپانيانىڭ قاتىسۋىمەن ەلەكتروبۋس ءوندىرۋ سالاسىندا ءبىرقاتار جوبا تابىستى ىسكە اسىرىلۋدا.
ۇكىمەت تاراپىنان قولداۋدىڭ نەگىزگى فاكتورى - ءوندىرىستى لوكاليزاتسيالاۋ دەڭگەيىنىڭ جوعارى بولۋى. ءبىز Alstom كومپانياسىنىڭ ەلەكتروۆوزداردىڭ قۇرامداس بولشەكتەرىن ءوندىرۋ جانە قىزمەت كورسەتۋ ورتالىقتارىن قۇرۋ ارقىلى جۇمىس اياسىن كەڭەيتۋ نيەتىن قولدايمىز. بۇل رەتتە قازاقستاندىق كاسىپورىنداردى تارتا وتىرىپ، تولىق سيكلمەن جانە جوعارى لوكاليزاتسيالاۋ دەڭگەيىمەن تولىققاندى ءوندىرىس قۇرۋ ماسەلەسىن قاراستىرۋدى ۇسىنامىز. ءوز تاراپىمىزدان ءبىز جاڭا ينۆەستيتسيالىق جوبالاردى ىسكە اسىرۋ بويىنشا جاردەم كورسەتۋگە دايىنبىز، — دەدى ءاليحان سمايىلوۆ.
ءوز كەزەگىندە ەندريۋ دەلەونە كومپانيانىڭ قازاقستاندا ءوندىرىستى ودان ءارى دامىتۋعا جانە جاڭا جوبالاردى ىسكە اسىرۋعا مۇددەلى ەكەنىن راستادى.
ءبىز قازاقستاندا 10 جىلدان استام ۋاقىتتان بەرى جۇمىس ىستەپ كەلەمىز. وسى كەزەڭ ىشىندە ءبىز جۇزدەگەن ميلليون ەۋرو ينۆەستيتسيا قۇيىپ، جۇزدەگەن ادامدى جۇمىسپەن قامتاماسىز ەتتىك. بۇل ءبىزدىڭ ستراتەگيالىق سەرىكتەستىگىمىزدىڭ جوعارى دەڭگەيدە ەكەنىن كورسەتەدى. ق ر پرەزيدەنتىنىڭ وتكەن جىلى فرانسياعا ساپارى ءبىزدىڭ ەكىجاقتى بايلانىستارىمىزدىڭ ودان ءارى دامۋىنا ايتارلىقتاي سەرپىن بەردى. ينۆەستيتسيا سالۋدى جالعاستىرعىسى كەلەتىن فرانسۋز كومپانيالارى ءۇشىن قازاقستاندا جاقسى ىنتالاندىرۋ شارالارى بار، — دەدى ەندريۋ دەلەونە.
ول Alstom كومپانياسى بۇكىل رەسپۋبليكا بويىنشا ءوزىنىڭ قىزمەت كورسەتۋ ورتالىقتارىن قۇرۋ ءۇشىن تاعى 50-100 ميلليون ەۋرو ينۆەستيتسيا قۇيۋدى قاراستىرىپ جاتقانىن ايتتى.
سونىمەن قاتار ءبىز جاڭا لوكوموتيۆتەردىڭ دامۋىن قولداپ، تاسىمالداۋ قاۋىپسىزدىگىن ارتتىرۋ ءۇشىن ەل بويىنشا ينفراقۇرىلىم الەۋەتىن ارتتىرعىمىز كەلەدى، - دەدى ەندريۋ دەلەونە.
وعان قوسا كەزدەسۋ بارىسىندا تاراپتار قر ترانزيتتىك كولىك سالاسىن دامىتۋ پەرسپەكتيۆالارىن، اتاپ ايتقاندا، ترانسكاسپي حالىقارالىق كولىك باعىتىنىڭ مۇمكىندىكتەرىن كەڭەيتۋدى تالقىلادى.