تەحاستا بولعان كۇشتى جەل 170 مىڭنان اسا ادامدى جارىقسىز قالدىردى، - دەپ حابارلادى بەيسەنبى كۇنى «Oncor» تەحاس كوممۋنالدى كومپانياسى. تورنادودان داللاس، فرانكلين جانە حوپكينس وكرۋگتەرى دە زارداپ شەگىپ، قاتتى جەل تىركەمەسى بار بىرنەشە كولىكتى اۋدارىپ جىبەرگەن. شريۆپورت قالاسىنداعى لۋيزيانا شتاتىنىڭ ۋنيۆەرسيتەتى داۋىلدان كەيىن شامالى ءبۇلىندى. جەلدىڭ كۇشتىلىگى سونشا، وقۋ عيماراتىنىڭ جانىنداعى تۇراقتا تۇرعان ەكى كولىك كونتەينەرىن ورنىنان جىلجىتىپ جىبەرگەن. كاليفورنيا تۇرعىندارى قىسقى داۋىل سالدارىنان قار قۇرساۋىندا قالدى. شتات بيلىگى وڭتۇستىكتەگى تاۋلى اۋداندارعا ازىق- تۇلىك پەن باسقا دا كەرەك- جاراقتى جەتكىزۋ ءۇشىن تىكۇشاق پايدالانۋدى جوسپارلاپ وتىر. گۋبەرناتور گەۆين نيۋسوم 13 وكرۋگتە توتەنشە جاعداي جاريالادى، ال سان-بەرناردينو وكرۋگىنىڭ شەريفى زارداپ شەككەندەرگە قۇتقارۋ قۇرالدارى تىكۇشاقپەن جەتكىزىلەتىنىن حابارلادى. ءورت ءسوندىرۋ قىزمەتىنىڭ دەرەگى بويىنشا، كەيبىر تاۋ ماڭىنداعى ەلدىمەكەندەردە 10 فۋتقا دەيىن (3 مەتر) قار جاۋعان، قۇتقارۋ تۋرالى 100 ءوتىنىش تۇسكەن.
سونداي-اق كرەستلاين قالاسىندا ازىق-تۇلىك دۇكەنىنىڭ شاتىرى قۇلادى. كاليفورنيالىق «Caltrans» كولىك مينيسترلىگى تاۋلىك بويى قار تازالاۋ جۇمىستارى ءجۇرىپ جاتقانىن مالىمدەدى. جوعارىداعى شتات بيلىگىنىڭ مالىمەتىنشە، قازا تاپقاندار تۋرالى اقپارات كەلىپ تۇسكەن جوق.