قۇرانمەن بىرگە 100 جىل ساقتاعان. الاش قايراتكەرىنىڭ قۇندى ەڭبەگى تابىلدى

استانا. قازاقپارات - پاۆلودار وبلىسى جەلەزين اۋدانىنان الاش قايراتكەرى، عالىم، دراماتۋرگ، جازۋشى قوشمۇحامەد كەمەڭگەر ۇلىنىڭ عاسىرعا جۋىق ۋاقىت بۇرىن جارىق كورگەن «قازاق تاريحىنان» اتتى كىتابى تابىلدى.

تۋىندى 1924 -جىلى ماسكەۋدەگى ءنازىر تورەقۇلوۆ باسقارعان «كۇنشىعىس» باسپاسىنان 4 مىڭ تيراجبەن باسىلىپ شىققان. العى ءسوزىن عابباس توعجانوۆ جازعان.

«قولدارىڭىزداعى كىتاپ قازاقتىڭ ساياسي تاريحىنان جازىلعان تۇڭعىش كىتاپ»، - دەپ باعا بەرگەن ول.

پاۆلودارداعى بۇقار جىراۋ اتىنداعى ادەبيەت جانە ونەر مۋزەيىنىڭ ديرەكتورى جەلەزين اۋدانىنان الاش قايراتكەرى قوشمۇحامەد كەمەڭگەر ۇلىنىڭ قۇندى كىتابى تابىلعانىن ايتتى.

«بىلتىر، ياعني 2022 -جىلى اققۋلى اۋدانىنان ا. بايتۇرسىنوۆتىڭ 1911 -جىلى شىققان»ماسا«جيناعىن تاپقان بولاتىنبىز. جىل اياعىندا اباي قۇنانباي ۇلىنىڭ 1909 -جىلى شىققان العاشقى جيناعىن ەرتىس اۋدانىنان تاپتىق. وسىعان بايلانىستى 2023 -جىلى»الاشوردالىقتار ىزىمەن«اتتى ەكسپەديتسيا ۇيىمداستىرىپ، جەلەزين، تەرەڭكول، ۋسپەن اۋداندارىنا شىقتىق. جەلەزين اۋدانى ۆەسەلاياروشا اۋىلىنىڭ ءبىر تۇرعىنىنان اقىن، جازۋشى، الاش قايراتكەرى قوشمۇحامەد كەمەڭگەر ۇلىنىڭ»قازاق تاريحىنان«اتتى كىتابى تابىلدى. ازىرشە تۇرعىننىڭ اتى-ءجونىن ايتپايمىن. ويتكەنى ول كىسىدە تاعى ءبىر كىتاپ بار، سويلەسىپ وتىرمىن»، - دەيدى پاۆلودارداعى بۇقار جىراۋ اتىنداعى ادەبيەت جانە ونەر مۋزەيىنىڭ ديرەكتورى ەربول قايىروۆ.

«قازاق تاريحىنان» كىتابى ءتۇپنۇسقا بولعانىمەن بەتتەرى تولىق ساقتالماعان، ابدەن توزىعى جەتكەن. وعان وڭدەۋ جۇمىستارى جۇرگىزىلىپ، مۋزەي قورىندا ساقتالادى. بۇدان وزگە تەرەڭكول مەن ۋسپەن اۋداندارىنان دا الاشوردالىقتارعا قاتىستى كىتاپتار تابىلعان. تابىلىپ جاتقان جيناقتاردىڭ بارلىعى حالىقتىڭ قولىندا، ونى تۇرعىندار قۇرانمەن بىرگە ساقتاپ كەلگەن.

ە. بازارقۇل

Massaget.kz