ءبىر جىلدا 100 كىتاپ وقىعان
بۇل ورايدا زامان اعىمىنا ساي كىتاپحانا قىزمەتىن پايدالانۋشىلاردىڭ ينتەللەكتۋالدى دەڭگەيى مەن سۇرانىستارىن ەسكەرگەن، مەنەدجەر، باعدارلاماشى، پسيحولوگ سىندى بىرنەشە سالانى مەڭگەرگەن كىتاپحاناشىلاردىڭ ەڭبەگى ەرەن.
مىسالى، جۋىردا تۇركىستان وبلىستىق «Farab» امبەباپ عىلىمي كىتاپحاناسىندا وبلىستىق مادەنيەت باسقارماسىنىڭ ۇيىمداستىرۋىمەن «كىتاپ Travel-2023» اكسياسى باستالدى. وڭىرلىك كىتاپحانالاردىڭ قىزمەت كورسەتۋ باعىتىندا وزىق يدەيالاردى انىقتاۋ ماقساتىنداعى اكسيا شىمىلدىعىن تۇركىستان قالالىق ورتالىقتاندىرىلعان كىتاپحانا جۇيەسى اشتى. «شەجىرەلى ولكەدەن - رۋحاني تەمىرقازىققا» اتتى شارادا «كوركەم مىنەز كوركەم ادەبيەتتەن» تاقىرىبىمەن وڭىرلىك كىتاپحانالاردىڭ ينستاللياتسيالىق كىتاپ كورمەسى وتكىزىلدى. جىل سوڭىنا دەيىن جوسپارلانعان اكسيا ەكى بولىمنەن تۇرادى.
«تاريحتان جەتكەن امانات» تاقىرىبىندا اۋداندىق كىتاپحانالار ەلەكتروندى تسيفرلى سيرەك قوردى ۇلعايتۋ بويىنشا «Farab» كىتاپحاناسىنا قور جيناقتايدى. تسيفرلى فورماتتاعى جانە ءتۇپنۇسقا قولجازبالار تۇرىندەگى سيرەك قورىن كوبەيتۋگە قولداۋ كورسەتۋ ءۇشىن بەلگىلەنگەن كەستەگە ساي وبلىستىق «Farab» امبەباپ عىلىمي كىتاپحاناسىندا باس قوسادى.
اكسيانىڭ باستالۋىنا وراي وتكەن جيىندا وبلىس اكىمىنىڭ ورىنباسارى بەيسەنباي تاجىبايەۆ اتالعان ءىس-شارا ارقىلى كىتاپحانا قورىن 20 مىڭعا جەتكىزۋ جوسپارلانىپ وتىرعانىن جەتكىزدى. اۋىل كىتاپحانالارىنا كوڭىل بولىنبەك. «وڭىرگە تانىمال قالامگەرلەردى ارنايى شاقىرىپ، ۇيلەرىندەگى توم- توم كىتاپتاردى كىتاپحانا قورىنا سىيعا تارتۋ ماسەلەسىن قاراستىرعان ءجون. ساقتاۋلى تۇرعان كىتاپتاردىڭ يگىلىگىن حالىققا ارناۋىمىز كەرەك»، دەگەن ب. تاجىبايەۆ كىتاپحانا قورىنا 100 كىتاپ سىيعا تارتتى. ال عالىم، ءدىنتانۋشى دوساي كەنجەتاي ۇلى جاقىندا عانا جارىق كورگەن «ياساۋي انتولوگياسى» اتتى 9 تومدىق كىتابى مەن ءوز كىتاپحانا قورىنداعى 80 كىتاپتى سىيلادى. اكسيا جىل كولەمىندە جالعاسادى، ياعني كىتاپ جاناشىرلارىنىڭ اتالعان اكسياعا قاتىسۋلارىنا تولىق مۇمكىندىك بار. ماقسات ەتىلگەن 20 مىڭ كىتاپتى جيناپ، 17 اۋدان، قالاعا ءوز دەڭگەيىندە كوپشىلىكتىڭ وقۋى ءۇشىن ءبولىپ بەرۋ جوسپارلانىپ وتىر.
كىتاپتى ناسيحاتتاۋ، وقىرماندى كوبەيتۋ ماقساتىندا وبلىستىق «Farab» كىتاپحاناسى وتكەن جىلى «ادەبي فينال» سەمينارىن وتكىزگەن بولاتىن. جىل بويى وتكىزىلگەن ءىس- شارا جۋىردا قورىتىندىلاندى. اۋداندىق، وڭىرلىك كىتاپحانا باسشىلارى مەن قىزمەتكەرلەرى قاتىسقان ءىس- شارا بارىسىندا كىتاپحانا ۇزدىكتەرى مەن «التىن فورمۋليار» يەگەرى، وقىرماندار اراسىنان ۇزدىكتەر انىقتالىپ، ءتۇرلى اتالىم بويىنشا ماراپات تاپسىرىلدى.
اتاپ ايتساق، «ادەبي فينال» سەمينارىنىڭ قورىتىندىسى بويىنشا ءبىر جىل ىشىندە 100 كىتاپ وقىپ، كوپتىڭ ىشىنەن وزا شىققان وتەگەن ىسقاق ۇلى قاريا «التىن فورمۋليار» يەگەرى اتاندى. سونىمەن قاتار «ۇزدىك وقىرمان وتباسى» اتالىمىنا - 2-سىنىپ وقۋشىسى بەكنۇر نۇرجان ۇلى، «كىتاپحانانىڭ تۇراقتى ۇزدىك وقىرمانى» اتالىمىنا - شەرحان سامات ۇلى، «ەرەكشە مۇمكىندىككە يە وقىرمان» اتالىمىنا قىمبات سوۆەتحان قىزى لايىقتى دەپ تانىلدى. جەڭىمپازدارعا ستاتۋەتكا جانە قارجىلاي سىيلىق تابىس ەتىلدى.
كىتاپ وقۋعا قىزىعۋشىلىعى مەكتەپ قابىرعاسىنان قالىپتاسىپ، سودان بەرى كىتاپحاناعا ءجيى باراتىن تاعى ءبىر وقىرمان جايلى ايتا كەتەلىك. كەلەس اۋدانىنداعى «كوركەم» بالاباقشاسىنىڭ كۇزەتشىسى قىدىرباي اسىلبەكوۆ تاۋلىگىنە ەكى كىتاپ وقىپ، دۇنيەتانىمىن كەڭەيتىپ وتىرادى. كوبىنە تاريحي كىتاپتاردى وقۋعا قىزىعادى ەكەن.
«كىتاپ وقۋعا بالا كەزىمنەن قىزىعامىن. كىتاپ وقىسام، ميىم تىنىعىپ، سەرگىپ قالامىن. تاۋلىگىنە 2 كىتاپ، كوڭىل كۇيىم جاقسى كەزدە 5 كىتاپقا دەيىن وقىپ بىتىرەمىن.
اۋىلداعى شاعىن كىتاپحاناداعى كىتاپتاردى تۇگەلدەي وقىپ تاۋىستىم. ەندى ورتالىق كىتاپحاناداعى كىتاپتاردى وقۋدامىن»، دەيدى جاسى الپىستى القىمداعان ەل اعاسى.
ايتا كەتەيىك، جالپى كەلەس اۋدانىندا 27 كىتاپحانا بار. ونداعى قور - 262714 كىتاپ.
عالىمجان ەلشىباي
تۇركىستان وبلىسى
«ەگەمەن قازاقستان»