بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى- قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ايتتى، دەپ حابارلايدى قازاقپارات ءتىلشىسى.
سپيكەردىڭ ايتۋىنشا، ەڭبەك مينيسترلىگى باسقا دا قۇزىرەتتى مەملەكەتتىك ورگاندارمەن بىرلەسىپ، 2023-2027 -جىلدارعا ارنالعان كوشى- قون ساياساتى تۇجىرىمداماسىن ازىرلەگەن.
ونى 30-قاراشادا ۇكىمەت قاۋلىسىمەن بەكىتتى.
«جاڭا تۇجىرىمداما ەلىمىزدىڭ كوشى- قون سالاسىن رەتتەۋگە جانە ەكونوميكا دامۋىن كادرلىق جاعىنان قامتاماسىز ەتۋدى كوزدەيدى. ونىڭ اياسىندا الداعى جۇمىس بارىسى 3 بلوكتان تۇرادى، ءبىرىنشى - ەلىمىزگە بىلىكتى كادرلاردى كەلۋىن ىنتالاندىرۋ، ەكىنشى - شەتەلگە شىققان ءبىزدىڭ ازاماتتاردىڭ جۇمىسىن رەتتەۋ نەمەسە ەڭبەك قۇقىقتارىن قورعاۋعا باعىتتالعان جۇمىستار، ءۇشىنشى - وڭىرلەر اراسىنداعى دەمگورافيالىق تەڭسىزدىكتى جويۋعا ارنالعان جۇمىستار بولادى»، - دەدى ءىلياس يسپانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ەلىمىزگە ەڭ تاپشى ماماندىقتار بويىنشا 500 مىقتى ماماندى تارتۋ ءۇشىن 7 باعىتتا جۇمىس جۇرگىزىلەدى.
ءبىرىنشى باعىت - قازاقستاندى وڭىرلىك ءبىلىم بەرۋ حابىنا اينالدىرۋدى كوزدەيتىن ءبىلىم يمميگراتسياسى.
«بۇل باعىتتاعى جۇمىس جوعارى وقۋ ورىندارىنىڭ پروفەسسور- وقىتۋشىلار قۇرامىن كۇشەيتۋگە جانە ءبىلىم بەرۋ ساپاسىن ارتتىرۋعا ارنالعان. ول ءۇشىن 100 ۇزدىك وقىتۋشى مەن سۇرانىسقا يە تەحنولوگيالار بويىنشا عالىمداردى قازاقستانعا تارتۋ ۇسىنىلادى. بۇل ماقساتتا 10 جىلدىق «عىلىمي- پەداگوگيكالىق ۆيزا» بەرۋدىڭ وڭايلاتىلعان ءتارتىبى ەنگىزىلەدى. سونىڭ نەگىزىندە قازاقستاندا تۇراقتى تۇرۋعا ىقتيارحات، كەيىننەن ازاماتتىق الۋ مۇمكىندىكتەرى قاراستىرىلادى. ءدال وسىنداي مۇمكىندىكتى تاپشى ماماندىقتار بويىنشا وقيتىن شەتەلدىك ستۋدەنتتەر اراسىنان ماگيسترانتتار مەن باكالاۆرلارعا دا بەرۋ قارالادى»، - دەپ ءتۇسىندىردى ءى. يسپانوۆ.
سونىمەن بىرگە، ينۆەستيتسيالىق ۆيزا بەرۋدىڭ تومەنگى شەگىن 300 مىڭ ا ق ش دوللارىنا (شامامەن 140 ميلليون تەڭگە) دەيىن ازايتۋ قاراستىرىلعان.
وسى ساناتتاعى ميگرانتتار ءۇشىن «ينۆەستورلىق ۆيزا» ەنگىزۋ ۇسىنىلادى.
بۇل ۆيزا ەلدە تۇرۋعا، بيزنەسىن تىركەۋگە، مۇلىككە يەلىك ەتۋگە، جۇمىسكەر جالداۋعا، قارجى تولەمدەرىن جاساۋعا جانە ولاردىڭ كاسىپكەرلىك قىزمەتىنەن تۋىندايتىن وزگە دە وپەراتسيالار جۇرگىزۋگە تولىق مۇمكىندىك بەرەدى.