«بيىل رەسپۋبليكا كۇنى مەرەكەسىنە وراي 100 دەن استام مەرەكەلىك شارا وتكىزۋدى جوسپارلادىق. ونىڭ باسىم بولىگى - مادەني- بۇقارالىق شارالار. ماسەلەن، 25-قازان كۇنى 8 ۇلكەن كونسەرت وتەدى. تەاتر ساحنالارىندا تاقىرىپقا ساي قويىلىمدار وتەدى. ەڭ اۋقىمدى مادەني شارا - ەكسپو اۋماعىنداعى كونسەرتتىك باعدارلاما بولماق. وندا تانىمال شىعارماشىلىق ۇجىمدار، انشىلەر، انسامبلدەر ونەر كورسەتەدى»، - دەدى د. بابامۇراتوۆ قازاقستان حالقى اسسامبلەياسىندا وتكەن عىلىمي- پراكتيكالىق كونفەرەنتسيادا تىلشىلەرگە بەرگەن سۇحباتىندا.
ونىڭ ايتۋىنشا، 25-قازان كۇنى ەلوردا يپپودرومىندا ۇلكەن الامان بايگە مەن ات جارىسى وتەدى.
«ودان بولەك، جارىس تۇرىندەگى 20 دان استام سپورتتىق شارالار دا جوسپاردا بار. بارلىق ءبىلىم بەرۋ وشاقتارىندا، مەكتەپتەر مەن جوعارى وقۋ ورىندارىندا رەسپۋبليكا كۇنىنە ارنالعان دوڭگەلەك ۇستەلدەر مەن كونفەرەنتسيالار وتەدى. مۇنىڭ ءبارى جاس ۇرپاققا رەسپۋبليكا كۇنىنىڭ ماڭىزىن تۇسىنۋگە ىقپال ەتەدى»، - دەدى داۋرەن بابامۇراتوۆ.
سونىمەن بىرگە ەلوردالىق مادەنيەت باسقارماسىنىڭ مالىمەتىنشە، 25-قازاندا مەملەكەتتىك اكادەميالىق فيلارمونيادا رەسپۋبليكالىق ايتىس وتەدى. «قازاقستان» ورتالىق كونسەرت زالىندا روزا رىمبايەۆانىڭ شىعارماشىلىعىنا ارنالعان كونسەرت وتەدى. بەيبىتشىلىك جانە كەلىسىم سارايىندا «ماڭگىلىك ەل داۋىسى» كونسەرتتىك باعدارلاماسى كورسەتىلەدى.