قازىعۇرتتا 100 جاستان اسقان ءتورت سوعىس ارداگەرى تۇرادى

قازىعۇرت. قازاقپارات - تۇركىستان وبلىسىنداعى سوعىس ارداگەرلەرىنىڭ باسىم بولىگى - وسى قازىعۇرت اۋدانىنىڭ تۋماسى.

بۇل ايماقتا 100 جاستان اسقان 4 مايدانگەر تۇرادى، دەپ حابارلايدى قازاقپارات ءتىلشىسى.

قازىعۇرت اۋدانى جاڭابازار اۋىلىنداعى 100 جاستاعى ۇوس ارداگەرى يساباي جۇزەيەۆ 1922-جىلى دۇنيەگە كەلگەن. جىگىتتىك شاعى ەكىنشى دۇنيە جۇزىلىك سوعىسپەن قاتار كەلگەن قاريا كوپتەگەن وردەن-مەدالداردىڭ يەگەرى.

جەڭىستى بەرليندە قارسى العان قاريا «بۇگىنگى بەيبىت ءومىر ماڭگىلىك بولسىن» دەپ تىلەيدى.

100 جاسقا كەلگەن ۇ و س ارداگەرىنىڭ ءبىرى يسا تەلىكبايەۆ. ارداگەر نەبارى 20 جاسىندا لەنينگراد مايدانىنا قاتىسقان. Ⅲ دارەجەلى «داڭق» وردەنىمەن ماراپاتتالدى.

«لەنينگرادتى قورعاعانى ءۇشىن»، «گەرمانيانى جەڭگەنى ءۇشىن» مەدالدارىنىڭ يەگەرى. «قۇرمەت» وردەنىمەن ماراپاتتالعان. 6 ۇل-قىزدان 17 نەمەرە، 16 شوبەرە ءسۇيىپ وتىر.

بۇگىن تۇركىستان وبلىسىنىڭ اكىمى ءومىرزاق شوكەيەۆ قازىعۇرت اۋدانىنداعى سوعىس ارداگەرلەرىنىڭ ۇيىنە ارنايى بارىپ، جەڭىس كۇنىمەن قۇتتىقتادى. ارداقتى اقساقالدارعا قۇرمەت كورسەتتى.

«جاس ۇرپاق، تاريح سىزدەردىڭ ەرلىكتەرىڭىزدى ۇمىتپايدى. ادامزات تاريحىنداعى ەڭ كۇردەلى ءارى زۇلمات سوعىستا ءبىزدىڭ باتىر اتالارىمىز ەرلىك كورسەتىپ، ۇلى جەڭىسكە ۇلەس قوستى. سولاردىڭ قاتارىندا تۇركىستان وبلىسىنىڭ دا ارداگەرلەرى بار. ارداگەرلەرىمىزگە تۇراقتى تۇردە قولداۋ كورسەتىلىپ كەلەدى. ويتكەنى ولار - كوزى ءتىرى قاھارماندار»، - دەگەن ءومىرزاق شوكەيەۆ اقساقالمەن تىلدەسىپ، سىيلىق تابىس ەتتى.

باتىر اتالار ەل ازاماتتارىنا اق باتالارىن بەرىپ، تاۋەلسىزدىك ماڭگى بولسىن دەگەن تىلەكتەرىن جەتكىزدى.

ايتا كەتەيىك، بۇگىندە تۇركىستان وبلىسىندا 5301 سوعىس ارداگەرى مەن ولارعا تەڭەستىرىلگەندەر تۇرادى. ونىڭ ىشىندە 22 سوعىس ارداگەرى مەن سوعىس مۇگەدەگى ۇرپاققا ونەگە بەرىپ ءجۇر.

بيىل ولارعا 1 ميلليون تەڭگەدەن قارجىلاي كومەك بەرىلدى. وبلىستا ۇلى وتان سوعىسىنا قاتىسۋشىلارى مەن مۇگەدەكتەرىنە تەڭەستىرىلگەندەر سانى 154 بولسا، 5 مىڭنان استام تىل ەڭبەككەرى بار.