ال قالعان جاعدايلاردا پرەپاراتتىڭ تيىمدىلىگى 94,1 پروتسەنتتى قۇرايدى ەكەن. بۇل تۋرالى اتالعان كومپانيانىڭ رەسمي سايتىندا حابارلاندى.
ونداعى مالىمەت بويىنشا وسى كۇنگە دەيىن ۆاكسينانىڭ قاۋىپسىزدىگىنە قاتىستى قاندايدا ءبىر كۇردەلى قيىندىقتار تۋماعان. ەندى مودەرنا جاڭا ءدارىنى رەسمي تۇردە تىركەۋ ءۇشىن ا ق ش پەن ەۋرووداق بيلىگىنە ءوتىنىش بىلدىرمەك نيەتتە.
پرەپاراتتى سىناقتان وتكىزۋ جۇمىستارىنا 30 مىڭنان اسا ادام قاتىسقان. اراسىندا قارت كىسىلەر دە بار. ەرىكتىلەردىڭ كوبىندە ەكپەگە قاتىستى ايتارلىقتاي قيىندىقتار بايقالماعان. ەندى وندىرۋشىلەر ۆاكسينانىڭ كومەگىمەن كوروناۆيرۋسپەن كۇرەستە ۇلكەن جەتىستىكتەرگە جەتۋگە بولاتىنىن ايتادى.
Moderna - ۆاكسيناسىن ا ق ش- تا تىركەۋ تۋرالى ءوتىنىش بەرگەن ەكىنشى كومپانيا. بۇعان دەيىن نەمىستىڭ «بايونكتەك» كومپانياسىمەن بىرگە ەكپە ازىرلەگەن تاعى ءبىر امەريكالىق «پفايزەر» ءوندىرۋشىسى دە ءتيىستى ساۋال جولداعان. ول پرەپاراتتىڭ تيىمدىلىگى 95 پروتسەنتكە باعالانىپ وتىر. الدىن الا ەسەپتەۋلەر بويىنشا، «پفايزەر» ۆاكسيناسىنىڭ باعاسى مودەرنادان گورى ارزانىراق بولاتىن ءتۇرى بار.
تال زاكس، Moderna كومپانياسىنىڭ وكىلى:
- الىنعان دەرەكتەردىڭ بارلىعى ءجىتى تەكسەرىلگەن. وسى رەتتە ۆاكسينانى تىركەۋگە رۇقسات الىپ، الەمدىك نارىققا شىعۋعا مۇددەلىمىز. پرەپاراتتىڭ قاۋىپسىزدىگىنە كەلەتىن بولساق، سىناقتارعا قاتىسقان ەرىكتىلەردىڭ دەنساۋلىعىنا زيانى تيگەن جوق. ءبىز ارينە مونيتورينگتى جالعاستىرىپ، ءبارىن باقىلاپ وتىرامىز.
ال رەسەيدە «ەپيۆاككورونا» ۆاكسيناسىن سىناقتان وتكىزۋدىڭ سوڭعى كەزەڭى باستالدى. ونى نوۆوسىبىردەگى «ۆەكتور» ورتالىعى دايىنداعان. ەكپەنى جاساۋ جۇمىستارى ناۋرىزدا باستالعان. كلينيكالىق سىناقتان وتكىزۋدىڭ العاشقى ەكى كەزەڭى قىركۇيەكتە اياقتالدى. ەندى مىنە، تىركەۋدەن كەيىنگى كەزەڭى باستالىپ كەتتى. وعان 3 مىڭ ەرىكتى قاتىسادى. كوبى - مۇعالىمدەر مەن دارىگەرلەر. ماماندار ءدارىنىڭ ءبىراز ارتىقشىلىقتارى بارىن ايتادى. باسقاسىمەن سالىستىرعاندا، ونى ساقتاۋ جانە تاسىمالداۋ الدەقايدا جەڭىل.
ماسەلەن، «پفايزەر» ەكپەسىنىڭ تيىمدىلىگى تومەندەمەس ءۇشىن ونى مينۋس 70 گرادۋستا ساقتاۋ كەرەك. ال رەسەيلىك ءدارى ونداي شارتتاردى قاجەت ەتپەيدى ەكەن. نەگىزى بۇعان دەيىن تاعى ءبىر رەسەيلىك «سپۋتنيك ۆ ي» ۆاكسيناسى الەمدە ءبىرىنشى بولىپ، تىركەۋگە الىنعان. تيىمدىلىگى 95 پروتسەنتتەن اسادى. قازىر كورشى ەلدە ەكپەنى سالۋ جۇمىستارى ءجۇرىپ جاتىر. وندىرۋشىلەردىڭ ايتۋىنشا، «سپۋتنيك ۆ ي» باعاسى شەتەلدىك پرەپاراتتاردان ەكى ەسە ارزان. سول سەبەپتى سۇرانىس تا جوعارى كورىنەدى. ەكپەنىڭ ءبىر ميللياردتان اسا دوزاسىنا ونداعان مەملەكەتتەن تاپسىرىس كەلىپ تۇسكەن. ال ونى ءوز ەلىندە ءوندىرۋ تۋرالى كەلىسىمگە ءۇندىستان، برازيليا، قىتاي مەن وڭتۇستىك كورەيا وكىلدەرى قول قويعان.
ۇلى بريتانيادا وسى ايدا ەكى بىردەي ۆاكسينا تىركەلۋى مۇمكىن. بۇل تۋرالى پرەمەر- مينيستر مالىمدەدى. اڭگىمە «پفايزەر» جانە «استروزەنەكا» ەكپەلەرى جايلى. رەتتەۋشى ورگاندار ونى الداعى اپتالاردا تىركەۋگە دايىن. قازىر ۇلتتىق دەنساۋلىق ساقتاۋ قىزمەتى حالىققا ۆاكسينا ەگۋ جۇمىستارىنا دايىندالىپ جاتىر. ەڭ الدىمەن پرەپارات مەديتسينالىق قىزمەتكەرلەرگە، قارتتار ءۇيى مەن مۇمكىندىگى شەكتەۋلى جاندارعا ارنالعان مەكەمەدەگىلەرگە سالىنادى. ارتىنان قارتتار مەن جاسى 50-دەن اسقان تۇرعىندار الادى. ەكپە ەرىكتى تۇردە سالىنادى. الايدا جەرگىلىكتى مامانداردان باس تارتقانداردى بولاشاقتا مەيرامحانالارعا، كينوتەاترلار مەن سپورتتىق مەكەمەلەرگە كىرگىزبەۋ مۇمكىندىگى بارىن ەسكەرتتى.
بوريس دجونسون، ۇلى بريتانيا پرەمەر- ءمينيسترى:
- ازىرگە ءدارى- دارمەك پەن مەديتسينالىق بۇيىمداردى باقىلاۋ جونىندەگى اگەنتتىك بىردە ءبىر ۆاكسينانى تىركەگەن جوق. الايدا الداعى اپتالاردا «پفايزەر» مەن «بايونتەك» كومپانيالارىنىڭ ورتاق ەكپەسى مەن «استروزەنەكا» پرەپاراتىن قولدانۋعا رۇقسات بەرىلەدى دەپ كۇتىپ وتىرمىز. مۇنىڭ ءبارى روجدەستۆوعا دەيىن باستالادى دەگەن ءۇمىت بار.
ۆاكسينالارعا قاتىستى جاڭالىقتار مۇناي نارىعىنا اسەر ەتتى. قاراشانىڭ قورىتىندىسى بويىنشا، جازدىڭ باسىنان بەرى شيكىزات باعاسىنىڭ رەكوردتىق ءوسىمى تىركەلگەن. ءسويتىپ، برەنت ماركالى قارا التىننىڭ ءبىر باررەلىنىڭ قۇنى ءبىر اي ىشىندە 39 دوللاردان 47,5 دوللارعا دەيىن قىمباتتادى. WTI قۇنى 37 دوللاردان 45 دوللارعا دەيىن كوتەرىلگەن. ساراپشىلار كەلەسى جىلى نارىقتاعى جاعداي ءبىرشاما جاقساراتىنىن توپشىلاپ وتىر. ءسويتىپ، 2021 -جىلى برەنت ماركالى مۇنايدىڭ ءبىر باررەلىنىڭ باعاسى 65 دوللارعا دەيىن جەتۋى مۇمكىن دەگەن بولجام بار.
www.24.kz