«العاشقى «تارازى- اۆتومات» قاناتقاقتى رەجيمدە كەلەسى جىلدىڭ ماۋسىم ايىنا دەيىن «ەكاتەرينبۋرگ- الماتى» اۆتوجولىندا، ياعني تالاپكەر كەنتىنىڭ ماڭىندا ىسكە قوسىلادى. اۋىر سالماقتى جۇكتەردى تاسىمالداۋدىڭ قارقىندىلىعى جول جابىندارىنىڭ توزۋى مەن بۇزىلۋىنا ايتارلىقتاي اسەر ەتەدى. جاڭا تەحنولوگيانى - سالماقتى ولشەۋدىڭ اۆتوماتتاندىرىلعان ستانسيالارىن ەنگىزۋ جۇك كولىك قۇرالدارىنىڭ بارلىق اعىنىن سالماقتى باقىلاۋمەن قامتۋعا، بارلىق ەرەجە بۇزۋشىلاردى انىقتاۋعا جانە اكىمشىلىك جاۋاپقا تارتۋعا مۇمكىندىك بەرەدى. وسىلايشا، تاسىمالداۋشىلاردىڭ ءتارتىبى مەن اۆتوموبيل جولدارىنىڭ ساقتالۋى ارتادى، ولاردى جوندەۋگە جۇمسالاتىن شىعىندار تومەندەتىلەدى»، - دەلىنگەن ق ر ي ي د م مالىمەتىندە.
سونىمەن قاتار، كولىكتىڭ سالماق، گاباريتتىك پارامەترلەرىن ولشەۋ پروتسەسى كولىكتىك باقىلاۋ ورگاندارى ينسپەكتورلارىنىڭ قاتىسۋىنسىز اۆتوماتتى تۇردە جۇرگىزىلەدى. انىقتالعان ەرەجە بۇزۋشىلىقتار بويىنشا اكىمشىلىك پراكتيكا «سەرگەك» جۇيەسىنىڭ جۇمىس ىستەۋ قاعيداتى بويىنشا جۇزەگە اسىرىلاتىن بولادى.
بۇل ادامي فاكتوردى بولدىرماۋعا جانە كولىكتىك باقىلاۋ جۇيەسىندەگى اكىمشىلىك كەدەرگىلەردى بارىنشا ازايتۋعا ىقپال ەتەدى. «كولىك ينفراقۇرىلىمىن دامىتۋداعى «نۇرلى جول» مەملەكەتتىك باعدارلاماسى اياسىندا 2025 -جىلعا دەيىن قازاقستان اۆتوجولدارىندا 112 اۆتوماتتاندىرىلعان ولشەۋ ستانسيالارىن ورناتۋ جوسپارلانۋدا»، - دەلىنگەن وتكەن حابارلامادا.
اۆتور: رۋسلان عابباسوۆ