شەتەلدەن كەلەتىن ۇشاقتا ەلگە ورالعان قازاقستاندىقتار بولادى. بۇگىندە ولاردى بەكىتىلگەن الگوريتم بويىنشا قارسى الۋعا بار جاعداي جاسالعان. سولتۇستىك قازاقستان وبلىسى اكىمىنىڭ ورىنباسارى رۋسلان الىشيەۆ كەزەكتى بريفينگ بارىسىندا وسى جاعدايعا بايلانىستى تۇرعىنداردىڭ الاڭداۋىنا نەگىز جوقتىعىن ايتتى.
«شەتەلدەن كەلەتىن ازاماتتاردى قابىلداۋ بويىنشا بارلىق ءىس- شارالار ۇيلەستىرىلدى. COVID-19 تارالماۋى ءۇشىن سانيتارلىق- ەپيدەميولوگيالىق قاۋىپسىزدىك ەسكەرىلدى. سونىڭ ىشىندە اۋەجاي ءىشى، جۇك پەن ولاردى ورنالاستىرۋ اۋماعى دەزينفەكسيالانادى. كەلگەن جولاۋشىلار پوليتسيانىڭ كومەگىمەن كارانتين وشاعىنا ارنايى باعىتپەن جەتكىزىلەدى»، - دەدى رۋسلان الىشيەۆ.
ۇشاقپەن كەلگەن جولاۋشىلار پەتروپاۆلداعى مەيمانحانالاردىڭ بىرىنە ورنالاستىرىلماق. ونىڭ اۋماعى قورشاۋعا الىنىپ، باقىلاناتىن بولادى. كىرىپ- شىعۋعا قاتاڭ شەكتەۋ قويىلادى.
«كەلۋشىلەرگە بارلىق جاعدايدى جاسادىق. ولار تەگىن اسپەن قامتىلىپ، ءتۇرلى باعىتتار بويىنشا كەڭەس الادى. جولاۋشىلار مەن ەكيپاج مۇشەلەرى ەكى كۇنگە وقشاۋلانادى. وسى ارالىقتا ولاردىڭ COVID-19 جۇقتىرعان- جۇقتىرماعانىن انىقتاۋ ماقساتىندا زەرتحانالىق تالداۋ جاسالادى. ناتيجەسى كەلگەننەن كەيىن ازاماتتار وزدەرىنىڭ تۇرعىلىقتى جەرلەرىنە، ءۇي كارانتينىنە جىبەرىلەدى»، - دەدى رۋسلان الىشيەۆ.
قازىرگى تاڭدا ۇشاققا 92 بيلەت ساتىلعان. ەستەرىڭىزگە سالايىق، بۇعان دەيىن ەلىمىزدىڭ 9 قالاسىنا شەتەلدەن وسىلايشا قازاقستاندىقتار مىنگەن ارنايى رەيستەر كەلگەن ەدى.
اۆتور: اقەركە داۋرەنبەك قىزى