«قازاقستاننىڭ 100 جاڭا ەسىمى» جوباسىنىڭ ءۇشىنشى كەزەڭىنە وراي ۇيىمداستىرىلعان سالتاناتتى شارادان شابىتتانىپ شىقتىم. سەبەبى، كەشە ءوز تابىسىنىڭ تاريحىن بايانداعان ازاماتتار قازاقستاننىڭ بولاشاعى جارقىن ەكەنىن دالەلدەيدى. ولار ءبىزدىڭ ەلدە سوڭعى 30 جىلدا اسا اۋقىمدى ءىس تىندىرىلعانىن ايعاقتايدى. بۇگىنگى ب ا ق كوزدەرى جاعىمسىز جاڭالىقتارعا قۇمار بولعانىمەن، وسىنداي ادامداردى جازۋعا اسىقپايدى. ال ولاردىڭ ءومىرباياندارىنىڭ قاي-قايسىسى دا بىرەگەي. ماسەلەن، ايگەرىم پەردەشوۆا كولۋمبيا ۋنيۆەرسيتەتىن ءبىتىرىپ، نيۋ-يوركتەگى ءىرى كومپانيادا جۇمىس ىستەپ ءجۇر. اناسىنىڭ ايتۋىمەن قازاقستانعا ورالىپ، ءوزىنىڭ زاڭگەرلىك كومپانياسىن اشقان. ول كومپانياسىنىڭ كەڭسەلەرى الماتى مەن نۇر-سۇلتاندا، ءتىپتى ريمدە بار. جاقىندا عانا ول ءوزىنىڭ نيۋ-يوركتەگى كەڭسەسىن اشتى. ونىڭ كومپانياسى نيۋ-يوركتە كەڭسەسى بار قازاقستاندىق بىردەن-ءبىر كومپانيا»، - دەدى داۋرەن ابايەۆ حابار ارناسىنىڭ «اشىق ديالوگ» باعدارلاماسىندا.
مينيستر سونداي-اق، نازاربايەۆ ۋنيۆەرسيتەتىندە ەڭبەك ەتەتىن قانات نۇرتازيندى دە ۇلگى ەتتى. ونىڭ ايتۋىنشا، جاس جىگىت سۋرەت سالۋمەن شۇعىلدانادى. ول بۇل ونەردىڭ جاڭا قىرلارىن مەڭگەرگەن.
«ونىڭ ەڭبەكتەرى ديسنەي ارناسىنىڭ قىزىعۋشىلىعىن تۋدىرعان. قانات «مانيفەسەنتا - 2» جانە «مۇزدى ولكە 2» سەكىلدى بلوكباستەردى الەمگە تاراتۋ ىسىنە اتسالىسقان. ساۋلەت قالداشوۆ بولسا – ب ۇ ۇ بىتىمگەرلىك ميسسياسىنا قاتىسقان تۇڭعىش قازاقستاندىق اسكەري دارىگەر. اسەل بايمۇقانوۆا ەسىمدى ەكولوگ كاسپي يتبالىعىنا قامقور بولىپ ءجۇر. ونداي يتبالىق الەمنىڭ ەشبىر تەڭىزىندە مەكەن ەتپەيدى. كاسپي يتبالىعىن جوعالتىپ الساق، بۇكىل الەم ول تەڭىز تاعىسىنان كوز جازىپ قالادى. مۇنداي تابىستى ادامدار وتە كوپ. ءبىزدىڭ ەل اتپال ازاماتتارعا باي. بۇل - ءبىزدىڭ باستى بايلىعىمىز»، - دەدى ول.
ەسكە سالا كەتسەك، «قازاقستاننىڭ جاڭا ەسىمدەرى» جوباسىنىڭ ماقساتى - تاۋەلسىزدىك جىلدارى قازاقستاننىڭ دامۋىنا ەلەۋلى ۇلەس قوسقان ادامداردىڭ تاريحى مىسالىندا تابىستىلىق، باسەكەگە قابىلەتتىلىك، پراگماتيزم جانە بىلىمگە تابىنۋ يدەيالارىن ىلگەرىلەتۋ. بيىل جوباعا قاتىسۋ ءۇشىن 1673 انكەتا قابىلدانعان. جالپى، بارلىق قاتىسۋشىعا 700 مىڭنان اسا داۋىس بەرىلگەن. بارلىق كەزەڭنىڭ قورىتىندىسى بويىنشا بيىل 32 جەڭىمپاز انىقتالدى.