بۇل تۋرالى قالا اكىمى باقىتجان ساعىنتايەۆ قازاقستان پرەزيدەنتى قاسىم- جومارت توقايەۆتىڭ قاتىسۋىمەن وتكەن كەڭەستە ايتتى، دەپ حابارلايدى قازاقپارات ءتىلشىسى.
«الماتى قالاسى ەلەكتر ەنەرگياسىن تۇراقتى تۇتىنۋدى قاجەت ەتەتىن ءىرى تۇتىنۋشىلاردىڭ ءبىرى بولىپ تابىلادى. بۇگىندە الماگۇل جانە تۇزدىباستاۋ ىقشاماۋداندارىندا 100 مىڭ ادامعا ارنالعان 850 مىڭ شارشى مەتر تۇرعىن ۇيلەر سالۋ جوسپاردا. وسى ىقشاماۋدانداردى ەلەكتر قۋاتىمەن ۇزدىكسىز قامتاماسىز ەتۋ ءۇشىن جالپى قۇنى 20 ميلليارد تەڭگەگە 2 ەلەكتر ستانسىسىن سالۋ قاجەت. بۇل نىسانداردىڭ جوبالىق-سمەتالىق قۇجاتتاماسى بار. سىزدەن 2020 -جىلى بيۋدجەتتى ناقتىلاۋ كەزىندە ماسەلەنى شەشۋگە كومەكتەسۋىڭىزدى سۇرايمىز»، - دەدى الماتى قالاسىنىڭ اكىمى باقىتجان ساعىنتايەۆ.
ايتا كەتەيىك، وسى ۋاقىتتا الماتىدا مەملەكەت باسشىسى قاسىم-جومارت توقايەۆتىڭ قاتىسۋىمەن قالانىڭ الەۋمەتتىك- ەكونوميكالىق دامۋ كورسەتكىشتەرىنە ارنالعان كەڭەس ءوتىپ جاتىر.
بۇعان دەيىن ب. ساعىنتايەۆ شاھارداعى جىل باسىنان بەرگى كورسەتكىشتەر الەۋمەتتىك- ەكونوميكالىق دامۋدىڭ وڭ ديناميكاسىن كورسەتىپ وتىرعانىن اتاپ وتكەن بولاتىن.
اۆتور: الما مۇقانوۆا