وڭتۇستىك قازاقستاندا 100- رەت بۇيرەك الماستىرۋ وپەراتسياسى ءساتتى ءوتتى
بىرنەشە ساعاتقا سوزىلعان وتانىڭ ماماندار ءساتتى وتكەنىن جەتكىزدى.
بۇل تۋرالى دارىگەرلەر ب ا ق وكىلدەرىمەن كەزدەسۋ بارىسىندا ايتىپ بەردى، دەپ حابارلايدى قازاقپارات ءتىلشىسى.
جالپى بۇيرەك ترانسپلانتاتسياسى شىمكەنت قالالىق جەدەل مەديتسينالىق كومەك كورسەتۋ اۋرۋحاناسىندا 2013 -جىلدان باستاپ جاسالۋدا.
«قازىر ەمدەۋ مەكەمەسىندە جەرگىلىكتى تۇرعىندارمەن قاتار شەتەلدىك ازاماتتارعا دا ىشكى ورگاندارىن اۋىستىرۋ وتاسى جاسالىنادى. ال، مۇنداي وپەراتسيانىڭ قۇنى 4 ميلليون تەڭگەدەي تۇرادى. ەلىمىزدىڭ ازاماتتارى ءۇشىن كۆوتا ارقىلى تەگىن جاساۋ قاراستىرىلعان. قازىر وسىنداي وپەراتسيانى جاساتۋعا شەتەلدىك ازاماتتار دا قىزىعۋشىلىق تانىتىپ وتىر»، - دەيدى سالا ماماندارى
«گەرمانيا، كانادا، يزرايل، رۋمىنيا ەلدەرىنەن دە ناۋقاستار كەلىپ ەم قابىلداۋدا. ولار مۇنداي وپەراتسياعا قولايلى كليمات، بىلىكتى مامانداردىڭ قىزمەتى جانە باعانىڭ قولجەتىمدىلىگى بولعاندىقتان كەلىپ وتىر»، - دەيدى ترانسپلانتولوگ ابىلاي دونباي.
اتالعان اۋرۋحانانىڭ دارىگەرلەرى سونداي-اق 15 رەت باۋىر ترانسپلانتاتسياسىن وتكىزگەنىن اتاپ ءوتتى.
ايتا كەتەيىك، بۇگىندە وڭىردە 700-گە تارتا ناۋقاس بۇيرەك جەتىسپەۋشىلىگىمەن، 500 ادام باۋىر جەتكىلىكسىزدىگىمەن كەزەكتە تۇر.