سەنات قىرعىزستانعا 100 ميلليون دوللار كومەك ءبولۋ تۋرالى كەلىسىمدى راتيفيكاتسيالادى

استانا. قازاقرات - ق ر پارلامەنتى سەناتىنىڭ كەشەگى پلەنارلىق وتىرىسىندا پالاتا دەپۋتاتتارى «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى ەۋرازيالىق ەكونوميكالىق ىقپالداستىق جاعدايىندا ەكونوميكالىق ارىپتەستىكتى دامىتۋ كەلىسىمىن راتيفيكاتسيالاۋ تۋرالى» زاڭ جوباسىن ماقۇلدادى، دەپ حابارلايدى قازاقپارات.

 «وسى شارتتار 2016 -جىلى 26 - جەلتوقساندا قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى ەۋرازيالىق ەكونوميكالىق ينتەگراتسيا جاعدايىندا ەكونوميكالىق ىنتىماقتاستىقتى دامىتۋ تۋرالى كەلىسىممەن بەكىتىلگەن. ول بويىنشا قىرعىزستانعا $100 ميلليون كومەك ءبولۋ قاراستىرىلعان» ، - دەدى ق ر ۇلتتىق ەكونوميكا ءمينيسترى تيمۋر سۇلەيمەنوۆ.

كەلىسىمنىڭ 2 جانە 3-باپتارىن ىسكە اسىرۋ ءۇشىن كومەك كورسەتۋ ءتارتىبى مەن تەحنيكالىق جاردەم كورسەتۋ ءىس- شارالار تىزبەسى (شىعىندار سمەتاسى) ازىرلەندى. تارتىپكە سايكەس، كومەك بىرنەشە ترانشتارمەن بەرىلەدى. اتالمىش كومەك قىرعىزستاننىڭ ەۋرازيالىق ەكونوميكالىق وداققا قوسىلۋى بويىنشا «جول كارتاسىنىڭ» ءىس- شارالارىن جۇزەگە اسىرۋ ءۇشىن ءبولىنىپ وتىر.

ونىڭ سوزىنشە، «جول كارتاسى» بويىنشا قىرعىزستان مەن ەۋرازيالىق ەكونوميكالىق وداق اراسىندا ورنالاسقان شەكارا بەكەتتەرى جاڭارتىلىپ، قىرعىز رەسپۋبليكاسىنىڭ سانيتارلىق، فيتوسانيتارلىق جانە ۆەتەرينارلىق جۇيەلەرىن ە ا ە و تالاپتارىنا سايكەستەندىرۋ كوزدەلىپ وتىر.

قارجىلاي كومەك كەزەڭ- كەزەڭمەن بولىنەدى. كەلىسىمدە كومەك رەتىندە بولىنگەن قاراجاتتىڭ ءتيىستى جۇمسالۋىن قاداعالاۋعا باعىتتالعان ارنايى حاتتاما قابىلداۋ دا قاراستىرىلعان.

اۆتور: جاسۇلان جولدىبايەۆ