قازاقستاندا ءبىر عانا كاسىپورىندا اي سايىن 100 كەلى التىن ۇرلانادى
سەبەبى ءبىر عانا «قازاق التىن» تاۋ-كەن كومبيناتىنا قاراستى شاحتالاردا اي سايىن جۇزدەگەن كەلى التىن ۇرلانادى، دەپ حابارلايدى قازاقپارات ءتىلشىسى.
«ءيا، ءبىزدىڭ ەسەبىمىزگە سايكەس، كومبيناتقا قاراستى كەن ورىنداردا اي سايىن زاڭسىز جولمەن 100 كەلى التىن ۇرلانادى. سونىڭ سالدارىنان كومپانياعا ءبىراز شىعىن كەلىپ وتىر. وعان قوسا، بيۋدجەتكە ميلليونداعان سالىقتار تۇسپەي جاتادى»، - دەدى «قازاق التىن» كومپانياسىنىڭ باس ديرەكتورى ەۆگەني بالاشوۆ تاۋ-كەن ءوندىرۋشى جانە تاۋ-كەن مەتاللۋرگيا كاسىپورىندارى قاۋىمداستىعىنىڭ كەڭەسىندە.
ونىڭ ايتۋىنشا، بۇگىندە كومپانياعا قاراستى نىسانداردىڭ تەرريتورياسىنا زاڭسىز كىرىپ، شاحتالار مەن كارەرلەرگە ءتۇسۋ وقيعالارى ازاياتىن ەمەس. التىندى ءوز بەتىمەن ىزدەيتىندەر كەنىشتەردىڭ وقپاندارى مەن ويىقتارى ارقىلى جەردىڭ استىنا ءتۇسىپ، باعالى شيكىزاتتى ۇرلاپ ءجۇر. ولاردىڭ ىشىندە جەرگىلىكتى حالىقتان بولەك وزگە وبلىستاردىڭ ازاماتتارى، ءتىپتى كورشى ەلدەردەن كەلەتىندەر دە بارشىلىق.
«شاحتاعا زاڭسىز تۇسەتىندەر بۇرعىلاۋ قۇرالدارى مەن جارىلعىش زاتتاردى پايدالانىپ، جۇمىسشىلاردىڭ ءومىرى مەن دەنساۋلىعىنا قاۋىپ توندىرەدى. ونداي كاسىپ ەش تولاستايتىن ەمەس. سەبەبى ەلدى مەكەندەردە التىن رۋداسىن وڭدەۋ مەن ساتىپ الۋ ورىندارى بار. بۇگىندە وسى سالاداعى زاڭنامانى جەتىلدىرۋ كەرەك. سوندا عانا زاڭسىز التىن وڭدەۋ كاسىبىنە تۇساۋ سالۋعا بولادى»، - دەيدى «قازاق التىننىڭ» باسشىسى.
اۆتور: ارمان اسقاروۆ