سارا تاستانبەك قىزىنىڭ دۇنيەدەن وزعانىنا 100 جىل
ءبىرى 1878 -جىلى دۇنيەگە كەلدى دەسە ەندى ءبىرى ودان ەرتەرەك تۋعان دەپ پىكىر ايتۋدا. ال بيىل سول زيالى جۇرت سارا تاستانبەك قىزىنىڭ قايتىس بولعانىنا 100 جىل دەپ وتىر.
بۇل جونىندە قازاقپارات ءتىلشىسى حابارلايدى.
نەبارى 13 جاسىندا قولىنا دومبىرا الىپ، ايتىسقا قاتىسىپ، ءبىرجان سالمەن ءسوز جارىستىرعان سارا تاستانبەك قىزى جەتىسۋ جەرىندە دۇنيەگە كەلگەن. 40 جىلداي عانا ءومىر سۇرسە دە، ارتىنا جاۋھار جىر قالدىرعان سۋىرىپ سالما اقىن.
«ءبىر اتتەگەنى اقىننىڭ دارىپتەلۋى كەنجەلەپ تۇر. ءتىپتى وبلىستا سارانىڭ تۋىن ۇستاپ تۇرعان ادۋىندى ايتىسكەرلەر جوقتىڭ قاسى. جىلدا جامبىل جابايەۆتىڭ، ءىلياس جانسۇگىروۆ، مۇقاعالي ماقاتايەۆتىڭ وقۋلارى وتەدى، رەسپۋبليكا بويىنشا. ەندى ءبىز الماتى وبلىسى بويىنشا ءبىر اقىن قىزدى دارىپتەي الماي وتىرمىز»، دەيدى، ايتىسكەر اقىن ايتاقىن بۇلعاقوۆ.
عىلىمي ورتادا سارا دەگەن اقىن بولماعان، ءبىرجان سالمەن ايتىسپاعان دەگەن پىكىر دە جوق ەمەس. پروفەسسور، ءىلياس تانۋشى مۇراتبەك يمانعازينوۆ بۇل تۇجىرىمعا قارسى ءبىراز دالەل كەلتىردى. عالىم ەندى اقىننىڭ ءومىر ءسۇرۋ كەزەڭىندەگى كۇماندى سەيىلتۋ قاجەتتىگىن ايتادى. «زەرتتەۋشىلەردىڭ دەرەكتەرىندەگى ءارتۇرلى دەرەكتەر، فاكتىلەردىڭ كەلۋى ادامداردى شاتاستىرىپ وتىر. سول جونىنەن ءبىز وسىعان سوڭعى نۇكتە قويۋىمىز كەرەك. اقىن سارانى زەرتتەگەن جۋرناليست، عالىم دەپ ايتۋعا بولادى تاڭىربەرگەن قاليحانوۆتىڭ ايتۋى بويىنشا، بۇل كىسىنىڭ قايتىس بولعانىنا 100 -جىل»، - دەيدى فيلولوگيا عىلىمدارىنىڭ دوكتورى، پروفەسسور مۇراتبەك يمانعازينوۆ.
ال كەلەسى جىلى اقىننىڭ دۇنيەگە كەلگەنىنە 140 جىل تولماق. بىرجانمەن ايتىسى ارقىلى عانا كۇللى قازاقتىڭ اۋزىندا قالعان اقىننىڭ مەرەيتويى ۇلكەن كولەمدە اتالىپ ءوتۋى ءتيىس دەگەن پىكىردە جەتىسۋلىق زيالىلار.