الاش پارتياسىنىڭ 100 جىلدىعىن ۇكىمەت دەڭگەيىندە اتاپ ءوتۋ ۇسىنىلدى
بۇگىن ق ر پارلامەنتى ءماجىلىسىنىڭ جالپى وتىرىسىندا پرەمەر- مينيستر باقىتجان ساعىنتايەۆتىڭ اتىنا دەپۋتاتتىق ساۋال جولداعان دەپۋتات ازات پەرۋاشيەۆ وسىلاي دەدى،
دەپ حابارلايدى قازاقپارات.
«الداعى 2017 -جىلى الاش ۇلتتىق اۆتونومياسىنىڭ، الاش پارتياسىنىڭ جانە الاش ۇكىمەتىنىڭ قۇرىلعانىنا 100 جىل تولادى. بۇل ۇلتتىق دەموكراتيالىق قوزعالىس تاريحىنداعى ەلەۋلى كەزەڭ. الاش قوزعالىسىنىڭ ۇستانىمدارى قازاق مەملەكەتتىگىن ماقسات ەتتى. ءبىراق، ازاتتىقتىڭ جارشىسى بولعان ءاليحان بوكەيحان باستاعان الاش قايراتكەرلەرىنە كوزدەگەن ماقساتتارىنا جەتۋگە مۇمكىندىك بولمادى. الاش ارىستارىنىڭ ەڭ باستى ەڭبەگى زاماننىڭ قيىنشىلىقتارىنا قاراماستان ەل ەركىندىگىنە ات سالىسىپ، قولدان كەلگەننىڭ ءبارىن جاسادى. سول جولدا قانىن دا، جانىن دا اياعان جوق. دەگەنمەن، بوستاندىق جولىندا قۇربان بولعان الاش ارىستارىنىڭ ەڭبەگى مەن ەرلىگى زايا كەتكەن جوق. ولاردىڭ ارمان- ماقساتتارى بۇگىنگى تاڭدا ورىندالدى. بۇگىنگى تاۋەلسىز قازاقستان وعان دالەل»، - دەدى دەپۋتات.
سونىمەن قاتار ول، الاش قايراتكەرلەرىنىڭ تاجىريبەسى ەلباسى ايقىنداپ بەرگەن «ماڭگىلىك ەل» پاتريوتتىق اكتىسىمەن ۇندەسىپ جاتقانىن، وسى رەتتە پرەزيدەنتىمىز ن. نازاربايەۆ ءوزىنىڭ «تاريح تولقىنىندا» ەڭبەگىنىڭ «الاش مۇراسى جانە وسى زامان» اتتى تاراۋىندا 20 - عاسىردىڭ باسىندا قازاق قوعامىندا زيالى قوعام قالىپتاسۋىنىڭ ۇرپاقتار ەستافەتاسى سياقتى سيپاتى بولعانىن اتاپ ايتقان ابزال، دەپ كورسەتكەنىن ەسكە سالدى.
«ەندەشە، الاشتىڭ 100 جىلدىعىن ەل ومىرىندەگى ماڭىزدى تاريحي وقيعا رەتىندە باعالاپ، جاس ۇرپاقتى وتان سۇيگىشتىككە، مەملەكەتشىلدىككە تاربيەلەۋدىڭ بىردەن- ءبىر جولى دەپ ساناپ، ونىڭ دايىندىعىنا ۇكىمەتتىك جانە باسقا دا مەملەكەتتىك ورگاندار مەن قوعامدىق ۇيىمداردا قازىردەن كىرىسۋگە شاقىرامىز. ونى وتكىزۋدى سالماقتى ءارى ساپالى دايىندىق پەن جوسپارلاۋ قاجەت دەپ سانايمىز. «اق جول» فراكسياسى ق ر ۇكىمەتىنە قازاق حالقىنىڭ بوستاندىعى ءۇشىن ايانباي ەڭبەك ەتكەن الاش قايراتكەرلەرىن لايىقتى ۇلىقتاۋعا ارنالعان تانىمدىق ءىس- شارالار بەلگىلەپ، جۇزەگە اسىرۋدى ۇسىنادى. وسى ۇسىنىمىزدى ەسكەرە وتىرىپ، كوتەرىلگەن ماسەلەگە وراي ۇكىمەت تارابىنان قابىلداناتىن شارالار جونىندە حاباردار ەتۋىڭىزدى سۇرايمىز»، - دەدى ا. پەرۋاشيەۆ.
اۆتور: مارلان جيەمباي