ەلوردادا مەكتەپ ءبىتىرۋشى تۇلەكتەر سىرقاتقا شالدىققان وقۋشىعا 100 مىڭ دوللاردان ارتىق اقشا جيناپ بەردى
نازاربايەۆ زياتكەرلىك مەكتەبىنىڭ 12-سىنىپ وقۋشىسى تەمىرلان مىرزاعاليەۆ بۇگىندە وڭتۇستىك كورەيادا ەمدەلىپ جاتىر. مەكتەپ ۇجىمى دا وقۋشىنىڭ تاعدىرىنا بەي- جاي قاراماي، ءوز ەرىكتەرىمەن ءبىر كۇندىك جالاقىسىن قايىرىمدىلىققا باعىتتادى.
تەمىرلان مىرزاعاليەۆتى ەمدەۋ ءۇشىن وڭتۇستىك كورەيالىق دارىگەرلەر: «160 مىڭ دوللار كولەمىندە اقشا قاجەت»، - دەگەن. ونى مامىردىڭ بىرىنە دەيىن جيناۋ كەرەك. وسىنى ەستىگەن سىنىپتاستارى ويلانباستان مەكتەپپەن قوشتاسۋ كەشىنە جينالعان ازىن-اۋلاق قارجىنى تەمىرلاننىڭ ەسەپشوتىنا اۋداردى.
«سول ساتتە اقشا وتە تەز كەرەك بولدى. جانە مەكتەپ ءبىتىرۋ كەشىنە جينالعان اقشامىز دايىن بولعان. سوندىقتان ءبىز ونى تەز بەرە سالۋعا شەشتىك. تەمىرلان كەلگەندە ءبىز ءبارىمىز ءبىر جەرگە بارىپ، وتە جاقسى ۋاقىت وتكىزەمىز دەگەن سەنىمدەمىز»، - دەيدى تەمىرلاننىڭ سىنىپتاسى ءجانيا ءابدىماش.
مۇعالىمدەر قاۋىمى دا بولاشاعىنان زور ءۇمىت كۇتىپ وتىرعان وقۋشىنى تاعدىردىڭ تالكەگىنە تاستاماي، ءبىر كۇندىك جالاقىلارىن تەمىرلاننىڭ ەسەپشوتىنا اۋداردى.
«100 مىڭ دوللاردان ارتىق جيناپ، ونىڭ بارلىعىن سول بالانىڭ شوتىنا جىبەرىپ ۇلگەردىك. ارينە، تۇگەل مەكتەپتەرگە، اسىرەسە ءبىزدىڭ وسى باسقارۋشى ۇيىمىمىزعا ۇلكەن العىسىمىزدى ايتامىز»، - دەيدى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ ديرەكتورى مەيرام جاكەنوۆ.
بيىل مەكتەپ بىتىرەتىن تەمىرلانعا بۇگىندە ا ق ش- تىڭ 3 جانە ۇلى بريتانيانىڭ 2 جوعارى وقۋ ورنىنان ۇسىنىس تۇسكەن. مەكتەپ باسشىلىعىنىڭ ايتۋىنشا، بۇل ۋنيۆەرسيتەتتەردىڭ ءبارى دە قازاق بالاسىنا دەمەۋ بولۋعا دايىن. مەكتەپتە تەمىرلانعا ساباق بەرەتىن شەتەلدىك مۇعالىمدەر ونىڭ العىر وقۋشى ەكەنىن ايتادى. سەۋل قالاسىندا ەم الىپ جاتقان تەمىرلان مەكتەبىنىڭ بۇل قولداۋىن بىلەدى. سوندىقتان ارنايى سالەمدەمە جولداپ، ۇلكەن العىسىن بىلدىرگەن.
سىنىپتاستارى قاجەتتى سومانى جيناۋ ءۇشىن قايىرىمدىلىق شارالارىن ءجيى وتكىزىپ، ودان تۇسكەن قارجىنى تەمىرلاننىڭ تۋىستارىنا جەتكىزۋدە. الداعى كۇندەرى استاناداعى ساۋدا ورىندارىنىڭ بىرىندە وقۋشىلار كونسەرت بەرىپ، ارنايى كورمە وتكىزۋدى كوزدەپ وتىر. بۇگىندە بۇل شاراعا بالالار جاپپاي دايىندالۋدا. «ەڭ باستىسى، تەمىرلان تەز ساۋىعىپ، ورتامىزعا ورالسا ەكەن»، - دەيدى جاناشىر دوستارى.