ءسويتىپ، باتىردىڭ ارتىنان قالعان جالعىز تۇياعىن اسىراي الماي جاتىرمىن دەپ جاھانعا جار سالعان شەلياكوۆانىڭ بۇل ارەكەتى جۇلدىزدىڭ تۋعان- تۋىستارى، دوستارى مەن ءانىن سۇيۋشىلەرگە اسا اۋىر ءتيدى. ەكاتەرينانىڭ ايتۋىنشا، باتىرحان دۇنيەدەن وتكەننەن كەيىن ۇلى ەكەۋى جالدامالى ءزاۋلىم ۇيدەن كەتۋگە ءماجبۇر بولعان ەدى.
امەريكادا وقۋىن جالعاستىرىپ جاتقان ماقسۇتقا باتىرحان اي سايىن 8 مىڭ دوللار جىبەرىپ وتىرعان. تانىمال ءانشى دۇنيەدەن وتكەن سوڭ بالاسىنىڭ شىعىندارىن اناسى تولەي الماعان. قازىرگى جاعدايىن 14 جاستاعى ماقسۇت بەينە ۇندەۋ جولداپ، وزدەرىنىڭ شەت ەلدە «بومج» ) قاڭعىباس (اتانعاندارىن ايتقان بولاتىن.
ەندى مەنىڭ اكەم جوق. بۇل مەن جانە انام ءۇشىن وتە قيىن. انام ۇنەمى جىلايدى. ارينە، مەن ونى جۇباتۋعا تىرىسامىن. ءبىراق وعان ءبارىبىر دە قيىن»، - دەيدى باتىرحان شۇكەنوۆتىڭ ۇلى ماقسۇت شۇكەنوۆ.
ازاماتتىق نەكەدەگى جارىنىڭ مالىمەتىنەن كەيىن ءانشىنىڭ اتىنا اشىلعان قوعامدىق قور بىردەن قوماقتى قارجى جيناۋعا كىرىستى. ءانشىنىڭ سوڭعى اندەرىن جيناپ «امانات» اتتى ديسك جارىققا شىعاردى. كۇنى كەشە عانا رەسپۋبليكا سارايىندا وتاندىق جانە رەسەيلىك ونەر جۇلدىزدارىنىڭ باسىن قوسىپ قايىرىمدىلىق كونسەرت وتكىزدى. ودان تۇسكەن قارجى ماقسۇتتىڭ وقۋىنا اۋدارىلماق.
ءانشىنىڭ كومەكشىسى ءارى قوعامدىق قوردىڭ ديرەكتورى ولجاس بايقانوۆ باتىرحاننىڭ جالعىز بالاسىنا باسپانا الىپ بەرۋدى كوزدەيدى ەكەن. ءتىپتى، بۇل قورعا بەلگىلى ءانشى، ءارى دوسى نۇرلان ابدۋللين ءوز اتىنىن 100 مىڭ دوللار اۋدارعان.
«باتىرحاننىڭ ۇلى ءبىزدىڭ دە ۇلىمىز. سوندىقتان، اقشا اۋداردىق»، - دەيدى ابدۋللين.
روزا رىمبايەۆا: «باتىرحان مەنىڭ باۋىرىم، سۇيىكتى باۋىرىم ەدى. مەنىڭ ءاربىر كونسەرتىمە بۇكىل ءان ساپارلارىن جيناستىرىپ قويىپ، قاي جاقتان بولسا دا ۇشىپ جەتەتىن. ەكەۋمىز دۋەتپەن ءان ايتاتىنبىز. ول ساكسوفوندا وينايتىن.»
روزا رىمبايەۆا اۋىر جاعدايدا كۇن كەشىپ جاتقاندىقتارىن ايتىپ كومەك سۇراعان باتىرحاننىڭ وتباسىن قازاقستانعا شاقىرعان. ءبىراق ولار كەلمەدى.
دەرەككوزى: 31 - ارنا