ەلباسىنىڭ توراعالىعىمەن وتكەن ۇكىمەت وتىرىسىندا بەس ينستيتۋتسيونالدىق رەفورمانى جۇزەگە اسىرۋداعى 100 ناقتى قادامنىڭ پراكتيكالىق جايتتارى قاراستىرىلدى

فوتو: None
استانا. قازاقپارات - اقوردادا ەلباسى نۇرسۇلتان نازاربايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى.

بۇل تۋرالى اقوردانىڭ باسپا ءسوز قىزمەتىنەن حابارلادى.

وتىرىس بارىسىندا مەملەكەت باسشىسى ۇسىنعان بەس ينستيتۋتسيونالدىق رەفورمانى جۇزەگە اسىرۋ باعىتىنداعى 100 ناقتى قادامنىڭ پراكتيكالىق جايتتارى قاراستىرىلدى.

اتالعان رەفورمالاردىڭ ءارقايسىسى بويىنشا مەملەكەت باسشىسى ءبىرقاتار ناقتى مىندەتتەر بەلگىلەدى.

اتاپ ايتقاندا، نۇرسۇلتان نازاربايەۆ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى بۇكىل مەملەكەتتىك قىزمەتكە كادر ىرىكتەۋدى جۇرگىزەتىن ءبىرىڭعاي رەكرۋتينگتىك ورتالىق بولۋى تيىستىگىنە توقتالىپ ءوتتى.

سونداي-اق قازاقستان پرەزيدەنتى جەرگىلىكتى قوعامداستىق الدىندا ەسەپ بەرەتىن جەرگىلىكتى پوليتسيا قىزمەتىن قۇرۋ قاجەتتىگىن دە اتاپ ءوتتى.

«ول قوعامدىق ءتارتىپتى ساقتاۋعا، تۇرمىستىق قىلمىسقا قارسى ءىس-قيمىل مەن جول-پاترۋلدىك قىزمەت جۇمىسىنا جاۋاپتى بولادى. ناق وسى قىزمەت جەرگىلىكتى قوعامداستىقپەن تىعىز ىنتىماقتاسا وتىرىپ ۇساق زاڭ بۇزۋشىلىقتارعا قاتىستى «مۇلدە توزبەۋ» رەجىمىن قامتاماسىز ەتۋى ءتيىس»، - دەدى نۇرسۇلتان نازاربايەۆ.

مەملەكەت باسشىسى اۋىل شارۋاشىلىعىنا ارنالعان جەرلەردى جەكەشەلەندىرۋ، سالىق جۇيەسىن رەفورمالاۋ، ەلەكتر ەنەرگەتيكاسى سالاسىنداعى ساياساتتى قايتا قاراۋ، قۇرىلىس سالاسىنا وزگەرىستەر ەنگىزۋ، يندۋستريالاندىرۋ باعدارلاماسىن ءارى قاراي جۇزەگە اسىرۋ، سونداي-اق كەدەندىك راسىمدەر مەن ەۋرازيالىق ەكونوميكالىق وداق اياسىنداعى ساۋدا ساياساتىن جەتىلدىرۋ ءىسىن باستاۋدىڭ ماڭىزدىلىعىنا توقتالدى.

نۇرسۇلتان نازاربايەۆ قازاقستان حالىقارالىق كولىك-كوممۋنيكاتسيالىق ارنالارمەن ينتەگراتسيالانعانى ءجون ەكەنىن ايتتى.

«مۋلتيمودالدى، جوعارى جىلدامدىقتى «ەۋرازيالىق ترانس قۇرلىقتىق ءدالىز» قۇرىلۋى ءتيىس. ول اۋە، تەڭىز، تەمىرجول جانە اۆتوكولىك قاتىناستارىن توعىستىرادى. ەۋرازيالىق ءدالىز ەكى باعىت بويىنشا وتەدى. ءبىرىنشىسى - قازاقستان، رەسەي اۋماعى ارقىلى ەۋروپاعا شىعادى. ەكىنشىسى - قازاقستان اۋماعى ارقىلى قورعاستان اقتاۋ پورتىنا دەيىن، ودان ءارى كاسپي تەڭىزى مەن كاۆكاز ارقىلى ەۋروپاعا جانە يران مەن پارسى شىعاناعى ارقىلى وڭتۇستىككە جالعاسادى. جوبا اياسىندا قازاقستاننىڭ بۇكىل اۋماعى ارقىلى اقتاۋ پورتىنا دەيىن جاڭا تەمىرجول جەلىسىن سالۋ قاجەت»، - دەدى مەملەكەت باسشىسى.

بۇدان بولەك، قازاقستان پرەزيدەنتى ۇلتتىق قۇندىلىقتاردى جانە وسكەلەڭ ۇرپاق ساناسىنداعى پاتريوتيزمدى نىعايتۋدىڭ ماڭىزدىلىعىن اتاپ ءوتتى.

«ۇلكەن ەل - ۇلكەن وتباسى» جوباسىن ىسكە قوسۋ قاجەت. ونىڭ اياسىندا كينو فيلمدەر، سەريالدار جانە ەل تاريحى، قازاقستاندىق مادەنيەت، ەلدىڭ بۇگىنگى ءومىرى تۋرالى حابارلار تۇسىرىلەتىن بولادى. تۋريستىك باعدارلار مەن ەتنواۋىلدار ۇيىمداستىرىلادى. مادەني ينفراقۇرىلىم بارلىق قازاقستاندىقتار ءۇشىن قولجەتىمدىگە اينالادى. ماڭگىلىك ەل قۇندىلىقتارىن مەكتەپ ستاندارتتارىنا قالاي ەنگىزۋ كەرەكتىگىن ويلاستىرۋ كەرەك»، - دەدى نۇرسۇلتان نازاربايەۆ.

مەملەكەت باسشىسى ۇكىمەت الدىنا 5-6 نەگىزگى ينديكاتور قويىلاتىنىن ايتتى.

«ول ءوز كەزەگىندە ءاربىر مينيستر مەن اكىم ءۇشىن 2-3 ناقتى كورسەتكىشتى بەلگىلەپ بەرەتىن بولادى. باقىلاۋ تەك ماقساتتى ينديكاتورعا قول جەتكىزۋ نەگىزىندە جۇزەگە اسىرىلادى. ارالىق باقىلاۋ مەن ارتىق تاپسىرمالاردى جويىپ، مەملەكەتتىك ورگاندارعا كوبىرەك ەركىندىك بەرۋ قاجەت. ولار وزدەرىنىڭ جۇمىسىندا ءوز بەتىمەن ارەكەت ەتە الاتىنداي، ءبىراق جاۋاپتى ءارى ەسەپ بەرىپ وتىراتىنداي بولا تۇسەدى»، - دەدى قازاقستان پرەزيدەنتى.

نۇرسۇلتان نازاربايەۆ مەملەكەتتىك ورگاندار مەن اكىمدىكتەر جانىنداعى قوعامدىق كەڭەستەردىڭ ءرولىن كۇشەيتۋ قاجەتتىگىن ايتتى.

«ولار مىندەتتى تۇردە اۋماقتى دامىتۋعا ارنالعان ستراتەگيالىق جوسپارلار مەن باعدارلامالاردىڭ ورىندالۋىن تالقىلاۋعا قاتىسادى؛ جەرگىلىكتى جەرلەردە بيۋدجەتتىڭ، ازاماتتار قۇقىقتارى مەن بوستاندىقتارىنا قاتىستى نورماتيۆتىك قۇقىقتىق اكتىلەر جوبالارىنىڭ، باعدارلامالىق قۇجاتتار جوبالارىنىڭ ايقىندالۋىنا اتسالىسادى»، - دەدى مەملەكەت باسشىسى.

قازاقستان پرەزيدەنتى مەملەكەتتىك قىزمەتتەردىڭ ءبىرىڭعاي پروۆايدەرى بولاتىن «ۇكىمەت ازاماتتار ءۇشىن» مەملەكەتتىك كورپوراتسياسىن قۇرۋ مۇمكىندىگىن قاراستىرۋدى دا ۇسىندى.

سوڭىندا مەملەكەت باسشىسى بەلگىلەنگەن جۇمىستىڭ بارلىعىن قىسقا مەرزىم ىشىندە جاساعان ءجون ەكەنىن ايتتى.

«تەرەڭ ءبىلىمدى، حالىقارالىق تاجىريبەنى زەرتتەۋدى قاجەت ەتەتىن اۋقىمدى جۇمىس كۇتىپ تۇر. ونىڭ ورىندالۋى ەلىمىزدى جاڭا دەڭگەيگە كوتەرۋگە مۇمكىندىك تۋعىزادى. بىزدەن حالىق بۇدان ءارى قادام جاساۋىمىزدى كۇتىپ وتىر. ول ءۇشىن ءارقايسىڭىزدىڭ قاجەتتى بىلىمدەرىڭىز، تاجىريبەلەرىڭىز بەن بىلىكتىلىكتەرىڭىز بار. وزدەرىڭىزگە ارتىلعان ءۇمىتتى اقتاۋ كەرەك»، - دەدى نۇرسۇلتان نازاربايەۆ.

وتىرىس بارىسىندا پرەمەر-مينيستر ك. ءماسىموۆ ءسوز سويلەپ، بۇرىنعى مۇشەلەرىنىڭ قايتا تاعايىندالۋى ۇكىمەتكە بارلىق تاپسىرمالاردى ورىنداۋعا جەدەل كىرىسۋگە مۇمكىندىك بەرەتىنىن ايتتى.

«ءسىزدىڭ تاپسىرماڭىزعا سايكەس، بارلىق مينيسترلىكتەر مەن ۆەدومستۆولارعا بەلگىلەنگەن مىندەتتەردى، ۇلىقتاۋ راسىمىندە سويلەگەن ءسوزىڭىزدى، قابىلدانعان باعدارلامالاردى جانە بەرىلگەن نۇسقاۋلارىڭىزدى ەسكەرە وتىرىپ، تاياۋ ءۇش ايعا ارنالعان ءىس-قيمىل باعدارلاماسىن ازىرلەۋ جونىندە تاپسىرما بەرىلدى. بەلگىلەنگەن مەرزىمگە، ياعني ماۋسىمنىڭ اياعىنا دەيىن ءسىزدىڭ قاراۋىڭىزعا رەفورمالاردى جالعاستىرۋ جانە تاپسىرمالارىڭىزدىڭ ورىندالۋى جونىندەگى ۇسىنىستاردى ەنگىزەمىز»، - دەدى پرەمەر-مينيستر.

سونىمەن قاتار ۇكىمەت مۇشەلەرى، مەملەكەتتىك ورگاندار مەن ۇلتتىق كومپانيالاردىڭ باسشىلارى بەس ينستيتۋتسيونالدىق رەفورمانى جۇزەگە اسىرۋعا بايلانىستى ماسەلەلەر جونىندەگى پىكىرلەرىن ورتاعا سالدى.