قاڭعىباستىڭ قايىر تىلەپ العان 100 دوللارىن قايدا جۇمساعانى بلوگەرلەردى تاڭقالدىردى
08:51, 26 - جەلتوقسان 2014
استانا. قازاقپارات - لوس-اندجەلەستەگى بەينەبلوگەر دجوش پەلەر لين الەۋمەتتىك زەرتتەۋ جۇرگىزبەكشى بولدى. ول قايىر تىلەپ وتىرعان ءۇيسىز-كۇيسىز توماسقا 100 دوللار بەرەدى.
ءسويتىپ ونىڭ اقشاعا نە ساتىپ الاتىنىن بىلمەكشى بوپ، ارتىنان اڭديدى.
قاڭعىباس اقشاسىن ىشىمدىككە جۇمساماي، كوپ قىلىپ ازىق-تۇلىك ساتىپ الادى. ءسويتىپ ونى ءوزى سياقتى ءۇيسىز جۇرگەندەرگە تاراتادى. تاڭ قالعان اۆتور وعان تاعى 100 دوللار بەرەدى دە، ونىڭ كوشەدە جۇرۋىنە نە سەبەپ بولعانىن سۇرايدى. توماس ناۋقاس اتا-اناسىن باعۋ ءۇشىن جۇمىستان شىعىپ كەتكەن ەكەن. ولار قايتىس بولعان سوڭ، ەر ادام ۇيىنەن ايىرىلىپ، قاڭعىپ قالعان.
بۇل جاعدايدى ەستىگەن بلوگەر توماستىڭ ءومىردى جاڭادان باستاعانىن قالاپ، جەلىدە قاراجات جيناۋ ناۋقانىن قۇرادى. جينالعان قاراجات مالىمدەلگەن سومادان جەتى ەسەگە اسىپ ءتۇسىپ، 75 مىڭعا جۋىق دوللاردى قۇرادى. ناۋقان اياقتالۋعا ءالى 28 كۇن بار.