قازاقتىڭ 100 ءانشىسى جابىلىپ ءبىر بەيونسەنىڭ تابىسىنا جەتە المايدى
Forbes جۋرنالىنىڭ مالىمەتى بويىنشا، امەريكالىق ءانشى ءبىر جىلدا 115 ميلليون دوللار پايدا تاپقان. ال قازاقتىڭ ەڭ تابىستى دەگەن انشىلەرىنىڭ جىلدىق تابىسى 2 ميلليون دوللار شاماسىندا. قازاق انشىلەرىن بىلاي قويعاندا قازاقستاندىق شوۋ- بيزنەستە تابىستىڭ كوزىن تابۋعا تىرىسىپ جۇرگەن بەلگىلى پروديۋسەر بايان ەسەنتايەۆا وتكەن جىلى 1,5 ميللليون شاماسىندا تابىس تاپقان. الايدا وسى قارقىنمەن وتاندىق شوۋ- بيزنەستە 10 جىل ەڭبەك ەتسە دە بايان بەيونسەنىڭ 1 جىلدىق تابىسىنا جەتە المايدى.
ارينە، ازىرگە قازاق شوۋ- بيزنەسى الەمدىك شوۋ- بيزنەسپەن سالىستىرۋعا كەلمەس. ويتكەنى ءبىزدىڭ انشىلەر بەيونسە سەكىلدى شوۋ- بيزنەسى دامىپ كەتكەن امەريكادا تۋىپ- ءوسىپ، اعىلشىن تىلىندە البوم جازبايدى. ءبىراق بىزدە دە بەيونسەدەن ەش كەم تۇسپەيتىن انشىلەردىڭ بار ەكەنىن ايتا كەتۋ كەرەك. ءبىر اتتەڭ- ايىمىز، ءبىزدىڭ دارىندى انشىلەرىمىزدىڭ وتاندىق توي- بيزنەستەن اسا الماۋىندا.. ..
بەيونسەنىڭ الەم بويىنشا ەڭ تابىستى ءانشى دەگەن اتاققا يە بولۋى ەڭ الدىمەن ونىڭ ەرەكشە دارىنىنىڭ ارقاسى ەكەنىنە ەشكىمنىڭ داۋى بولا قويماس. ول تەك R'n'B ستيلىندەگى ءانشى عانا ەمەس مۋزىكالىق پروديۋسەر، اكتريسا، ءبيشى، مودەل. كىشكەنە كەزىنەن ءتۇرلى مۋزىكالىق بايقاۋلاردىڭ جەڭىمپازى اتانعان بەيونسە الەمدەگى ەڭ بەدەلدى دەگەن جۇلدەلەردىڭ يەگەرى. ونىڭ الەمدىك حيتقا اينالعان اندەرى، البومدارى ونداعان ميلليون دانامەن تارالادى. العاش 1990 -جىلدارى شوۋ- بيزنەستە اتى تانىلا باستاعان بەيونسە 2000 - جىلداردان بۇگىنگە دەيىن ەڭ مىقتى دەگەن انشىلەردىڭ قاتارىندا سانالادى. الەمدىك مۋزىكا سىنشىلارىنىڭ كوبى بەيونسەنى ۆوكالدىق دياپازونى مەن كۇشتى داۋىسى ءۇشىن باعالايدى. ونىڭ داۋىسى - مەتستسو- سوپرانو. حالىقارالىق ءانشى دەڭگەيىنە جەتكەن قاراپايىم افروامەريكالىق ءانشى بەيونسەگە تابىسىنىڭ كوپ مولشەرى الەمدىك تۋرنە مەن البومدارىنىڭ ساتىلىمىنان تۇسەدى ەكەن.
ال ەندى وزىمىزگە ورالساق، ءبىزدىڭ ەڭ تابىستى دەگەني ءانشىمىز قايرات نۇرتاس. ونىڭ قانشالىقتى دارىندى ەكەنىن اركىم وزىنشە باعالايدى، دەگەنمەن تابىسى جاعىنان باسقا انشىلەردەن وق بويى وزىق تۇر. ونىڭ ءبىر جىلدىق تابىسى 2 ميلليون دوللار. قايرات باسقا قازاقستاندىق انشىلەرمەن سالىستىرعاندا جەكە كونتسەرتىن ەڭ ءجيى بەرەتىن ءانشى. ونىڭ كونتسەرتتەرىنىڭ بارلىعى دەرلىك انشلاگپەن وتەدى. قايرات جاقىندا عانا استانا مەن الماتىدا «ەركەلەپ ەلگە ءان ارناي» اتتى جەكە شىعارماشىلىق كەشىن وتكىزدى. وسى ۋاقىتقا دەيىن ونىڭ ونشاقتى البومى جارىق كورگەن. بىلتىرعى جىلى «وكىنىش» اتتى فيلم ءتۇسىرىپ، وعان ءوزى ءتۇسىپ، كارتينادان 600 مىڭ دوللار پايدا تاپقان بولاتىن. سونداي- اق قايراتتىڭ دا باسقا انشىلەر سەكىلدى نەگىزگى تابىس كوزى - توي. شوۋ- بيزنەستەن گورى توي بيزنەس جاقسى دامىعان ءبىزدىڭ ەلدە انشىلەردىڭ تابىسىنىڭ 70-80 پايىزى تويدان تۇسەدى. تويدان تابىس تۇسەتىن بولعاندىقتان انشىلەرىمىزدىڭ بارلىعى توي اندەرىن جازدىرۋعا مۇددەلى. ال توي اندەرىمەن ءبىزدىڭ شوۋ- بيزنەستىڭ الەمدىك دەڭگەيگە كوتەرىلە الاتىنىنا انشىلەردىڭ ءوزى دە سەنبەيدى.
توي- بيزنەستەن تاپقان تابىسىن اركىم ءوز قالتاسىنا سالىپ، ءوزىنىڭ قاجەتىنە جاراتۋعا ۇيرەنىپ قالعان. ال شوۋ- بيزنەستە اقشا ۇنەمى اينالىمدا بولۋى كەرەك. انشىلەرىمىز زاڭ بويىنشا ءوزىنىڭ ءاربىر ورىندالعان ءانى ءۇشىن قاي كەزدە، كىمنەن گونارار تالاپ ەتەتىنىن دە بىلە بەرمەيدى. ءتىپتى تالانتتى دەگەن ءانشى حالىقارالىق بايقاۋعا قاتىسۋعا نيەت بىلدىرسە، وندا باراتىن قارجىنى قايدان الامىن دەپ دال بولادى. شوۋ- بيزنەستەن پايدا تابۋ ءۇشىن ءبىرىنشى اقشا سالۋ كەرەك ەمەس پە؟ ال ءبىزدىڭ پروديۋسەرلەر قارجى سالماي، پايدا تاپقىسى كەلەدى. وسىدان كەيىن ءبىزدىڭ شوۋ- بيزنەس كەنجە قالىپ قالدى دەپ زار يلەيمىز.
وسى ۋاقىتقا دەيىن قازاق ونەرىن الەمگە تانىتۋعا، قازاق شوۋ- بيزنەسىن دامىتۋعا تىرىسىپ، تالپىنىس جاساپ كورگەن ادامدار دا جوق ەمەس. ايتالىق قىدىرالى بولمانوۆ « ۇلىتاۋ» توبىمەن بىرنەشە مەملەكەتتى ارالاپ، قازاقتىڭ قارا دومبىراسىن، كۇيلەرىن ءبىراز جەرگە جەتكىزدى. ءبىراق ودان دا بيىككە جەتۋگە بولار ما ەدى.. .. الايدا ءبىز ءالى كۇنگە دەيىن قازاق شوۋ- بيزنەسىن دامىتۋدىڭ تەتىگىن تابا الماي وتىرمىز. سوندىقتان بىزگە قازىرگى تاڭدا الەمدىك شوۋ- بيزنەستىڭ زاڭدىلىعىن، جۇيەسىن ءجىتى مەڭگەرگەن ماماندار قاجەت بولىپ تۇر.
قازىر الەمدىك شوۋ- بيزنەستە نە ءوتىمدى، ءانشىنىڭ يميدجى قانداي بولۋى كەرەك، بەدەلدى دەگەن حالىقارالىق بايقاۋلارعا قاتىسۋدىڭ جولدارى قانداي، قازاق ءانشىسى وزگە تىلدە ءان ايتىپ، باسقالاردى تاڭ قالدىرا الا ما، الەمدىك شوۋ- بيزنەستە ءبىزدىڭ ۇلتتىق ەرەكشەلىگىمىزدىڭ بايقالىپ تۇرۋى ماڭىزدى ما؟ مىنە وسى سۇراقتار جاۋاپ تاۋىپ، ءىس جۇزىندە تاجىريبەدەن وتكىزە الساق، ءبىراز جەتىستىككە جەتەر مە ەدىك؟
ادەتتە ءبىز قاي سالادا بولسىن، شەتەلدەن مامان شاقىرتىپ، ءىسىمىزدى دوڭگەلەتىپ بەرۋىنە قارسىلىق ءبىلدىرىپ جاتامىز. ءبىراق ءدال وسى شوۋ- بيزنەسكە كەلگەندە بىزگە الەمدىك دەڭگەيدەگى مىقتى پروديۋسەرلەردىڭ تاجىريبەسى قاجەت- اق. ءسىز قالاي ويلايسىز؟
«الاش ايناسى»
اۆتور: اينۇر سەنباەۆا