ۇزىندىعى 1006,61 مەترگە جەتەتىن ديۆان گيننەسس رەكوردتار كىتابىنا ەندى

استانا. قازاقپارات - رەسەيدىڭ ساراتوۆ قالاسىندا ۇزىندىعى 1006,61 مەترگە سوزىلاتىن ديۆان جاسالدى، بۇل الەمدەگى جاڭا رەكورد بولدى، دەپ حابارلايدى FreeNews-Volga .

قالاداعى سۋ جاعاسىنا قويىلعان جيھازدى تاماشالاۋعا 15 مىڭنان استام ادام جينالعان. وعان ءبىر مەزەتتە ەكى جارىم مىڭ ادام ەركىن سىيىپ وتىرعان.

مۇندا ارنايى كەلگەن گيننەسستىڭ رەكوردتار كىتابىنىڭ وكىلى اننا ورفورد جيھازدىڭ ۇزىندىعىن تاحەومەترمەن ولشەپ، جاڭا رەكوردتىڭ ورناتىلعانىن جاريا ەتتى.

ديۆاندى قۇراستىرعان ءىرى رەسەيلىك جيھاز كومپانياسىنىڭ حابارلاۋىنشا، وعان 7,5 شاقىرىم قىزىل ءتۇستى ەكولوگيالىق بىلعارى جۇمسالعان. ەندى بۇل ديۆان 500 بىردەي بولىككە ءبولىنىپ، ساتۋعا قويىلادى، ال ودان تۇسكەن قاراجاتتىڭ 10 پايىزى قايىرىمدىلىققا جۇمسالادى.

ايتا كەتەيىك، بۇعان دەيىن گيننەسستىڭ رەكوردتارىنا «الەمدەگى ەڭ ۇزىن ديۆان» ساناتىنا نورۆەگيالىق جيھازشىلاردىڭ ۇزىندىعى 890 مەتر بولاتىن ديۆانى ەنگەن ەدى.