وسىنداي قيىن كەزەڭدە كۇن سايىن قاۋىپتى ۆيرۋسپەن كۇرەسىپ جاتقان مەديتسينا قىزمەتكەرلەرى مەن COVID-19 جۇقتىرعان ناۋقاستارعا سارجال اۋىلىنىڭ تۇرعىندارى قولداۋ كورسەتكەن. ورتالىق مەشىت الدىندا ۆولونتەر- كاسىپكەرلەر جينالىپ اكتسيا باستادى. وعان اۋىل تۇرعىندارى دا قوسىلىپ، ناتيجەسىندە 1000 ليتر قىمىز جينالعان.
«اۋىلىمىزدىڭ تۇرعىندارى بىرىگىپ، قىمىز جينادى. اكتسياعا شامامەن 90 ادام قاتىسقان. بارلىعى مۇمكىندىگىنشە قىمىز بەرگەن. بىرەۋلەر 10 ليتر قوسسا، كەيبىرى ودان كوبىرەك سۋسىنىن سىيعا تارتقان. ادامدار سىرقاتتانىپ جاتقان قيىن كەزەڭدە ءبىز ولارعا قولداۋ كورسەتەيىك دەپ شەشتىك. ويتكەنى قىمىز ادام اعزاسىنا وتە پايدالى جانە ءتۇرلى اۋرۋدى ەمدەۋدە قولدانىلادى»، دەيدى اكتسياعا قاتىسۋشىلاردىڭ ءبىرى، كاسىپكەر - مەتحات مۋسين. جينالعان قىمىز بارلىق قالالىق اۋرۋحانالارعا جىبەرىلەدى. سەمەي اۋدانىنىڭ باس يمامى اسقار ءابىتاي ۇلىنىڭ ايتۋىنشا، قىمىز مىندەتتى تۇردە دارىگەرلەر مەن ناۋقاستاردىڭ يممۋنيتەتىن كوتەرۋگە كومەكتەسەدى.
«قازىر ەلىمىزدە «ومىرگە ءۇمىت سىيلا» - «پوداري نادەجدۋ نا جيزن» اكتسياسى ءوتىپ جاتىر. اكتسيا اياسىندا اۋرۋحانالارعا ءدارى- دارمەك پەن باسقا دا قاجەتتى زاتتار جەتكىزىلۋدە. قازىر دارىگەرلەر مەن ينفەكتسياعا شالدىققانداردىڭ يممۋنيتەتىن كوتەرۋ ءۇشىن سارجال اۋىلىنىڭ تۇرعىندارى جيناعان قىمىزدى تاراتىپ جاتىرمىز. قىمىز - تۇرعىنداردىڭ پوليگون كەزىندە دە امان قالۋىنا كومەكتەسكەن ەرەكشە، ءتىپتى قاسيەتتى سۋسىن دەۋگە بولادى. قىمىزدى قالالىق اۋرۋحانالارعا تەگىن تاراتامىز. وسىنداي اكتسيالار جالعاسىن تابادى دەپ سەنەمىز»، - دەپ تولىقتىردى يمام.