قازاقستان جايلى 1000 نان استام فوتوسۋرەت «ۇلى دالا بوياۋلارى» موبيلدى قوسىمشاسىنا ەنگىزىلدى - فوتو
مۇنداعى باستى ماقسات - وتاندىق جانە شەتەلدىك اۋديتورياعا قازاقستاننىڭ مادەنيەتىن، تۇرمىسىن، وزىندىك ەرەكشەلىگىن، تاريحىن، تابيعاتىن زاماناۋي فوتو ونەر تۋىندىلارىن تانىستىرۋ. بۇل تۋرالى بۇگىن الماتىدا وتكەن باسپا ءسوز ءماسليحاتىندا جوبانىڭ اۆتورى جانە جەتەكشىسى بوريس چەردابايەۆ ءمالىم ەتتى.
«ۇلى دالا بوياۋلارى» موبيلدى قوسىمشاسىنا تابيعات، تاريح، ەتنوگرافيا سەكىلدى باعىتتار بويىنشا 1000 نان استام فوتوسۋرەتتەر ەنگىزىلدى. ولاردا قازاقستاننىڭ ءتورت ايماعى كورىنىس بەرگەن.
«بۇل موبيلدى قوسىمشا «الدوڭعار» قوعامدىق قورى جۇزەگە اسىرىپ جاتقان «ۇلى دالا بوياۋلارى» باسپالىق جوباسىنىڭ جالعاسى ىسپەتتەس. وسى جوبا اياسىندا اتىراۋ، جامبىل، الماتى جانە قىزىلوردا وبلىستارىنا قاتىستى ءتورت فوتوالبوم جارىق كوردى. ولار - «شەجىرە ساعاسى»، «الەم ايناسى»، «جەتىسۋ -جۇماق» جانە «سارى ارقا - ەۋرازيانىڭ جۇرەگى» فوتوالبومدارى.
ونىڭ ايتۋىنشا، قازىرگى تاڭدا وڭتۇستىك قازاقستان مەن شىعىس قازاقستان وڭىرلەرىنە قاتىستى البومدار باسپاعا دايىندالۋدا. ال پاۆلودار مەن قىزىلوردا وبلىستارىندا ءتۇسىرۋ جۇمىستارى اياقتالىپ كەلەدى. قالعان وبلىستارعا قاتىستى البومداردى 2016-جىلعا دەيىن شىعارۋ كوزدەلۋدە. جوبا سوڭىندا جيىنتىق البوم شىعارىلادى. وعان قازاقستاننىڭ بارلىق وڭىرلەرى بويىنشا ەڭ ۇزدىك دەگەن فوتوسۋرەتتەر ەنەدى.
«قازاقستاننىڭ ءار ءوڭىرىن تابيعات پەن مادەنيەتتىڭ ءىنجۋى دەۋگە بولادى. حالقىمىزدىڭ باعا جەتپەس بۇل بايلىقتارىن ءبىز ساقتاپ قانا قويماي، بۇكىل الەمگە پاش ەتۋىمىز كەرەك»، - دەدى جوبا جەتەكشىسى.
ول سونىمەن قاتار «ۇلى دالا بوياۋلارىنىڭ» EXPO-2017 حالىقارالىق كورمەسىنىڭ بەتكە ۇستار جوباسىنا اينالاتىندىعىن ءۇمىت ارتادى.
بوريس چەردابايەۆتىڭ ايتۋىنشا، «ۇلى دالا بوياۋلارى» جوباسىندا تەك بىرەگەي فوتوماتەريالدار عانا قولدانىلادى. ءاربىر البومدى ازىرلەۋگە ءبىر جىلعا جۋىق ۋاقىت كەتەدى ەكەن. وسى مەرزىم ىشىندە فوتوگرافتار ولەگ بەليالوۆ پەن نيكولاي پوستنيكوۆ ماۋسىمدىق فوتو ەكسپەديتسياعا شىعادى. اۆياتسيانىڭ كومەگىمەن ولار قازاقستاننىڭ ءالى كوپ زەرتتەلە قويماعان جەرلەرىنىڭ قايتالانباس اسەم كورىنىستەرىن فوتوعا تۇسىرەدى.
تاعى ءبىر ايتا كەتەتىن جايت، فوتوالبومداعى ءاربىر فوتو سۋرەت اقىن باقىت قايىربەكوۆتىڭ سوعان قاتىستى جازعان ولەڭدەرىمەن بىرگە بەرىلەدى.
اۆتور: جاپپاربەرگەن ايبوتا