قانات يسلام: جەڭىسىم الماتىنىڭ 1000 جىلدىعى مەن تاۋەلسىزدىگىمىزدىڭ 25 جىلدىعىنا تاماشا تارتۋ بولدى
قاناتتىڭ حالقىن شەكسىز سۇيەتىن قاراپايىمدىلىعى بولار، حالقى دا قاناتقا قولداۋ كورسەتۋگە كەلگەندە الدارىنا جان سالمادى. الماتى تورىندەگى جاڭادان اشىلعان 12 مىڭ ادامعا ارنالعان «الماتى ارەنا» ستاديونى جەكپە-جەك وتكەن كەشتە 18 مىڭ ادامدى قۇشاعىنا سىيدىرا الدى.
«قازاقپارات» اگەنتتىگىنىڭ ءتىلشىسى جانكۇيەرلەرىنە تاماشا جەڭىس سىيلاعان قانات باۋىرىمىزدى قۇتتىقتاپ، ونىمەن سۇحباتتاسقان ەدى.
جانكۇيەرلەرىم مەنەن نوكاۋند كۇتكەنىن جاقسى سەزىندىم
مەن بوكس كەشىنە وسىنداي جانكۇيەر جينالادى دەپ مۇلدە ويلاعان جوقپىن. ەلباسىنىڭ ارقاسىندا ەلىمىزگە ءزاۋلىم-ءزاۋلىم سپورت نىساندارى كوپتەپ سالىنۋدا. سولاردىڭ ءبىرى وسى 12 مىڭ ورىندىق «الماتى ارەنا» ستاديونى. رينگكە شىعا قالعاندا زالدا ينە شانشار جەر قالماعانىن بىردەن بايقادىم. «قانات، قانات، قانات العا!» دەگەن داۋىستان زال قابىرعالارىنىڭ ءوزى شىتىناپ كەتەتىندەي سەزىلدى ماعان. وسىنداي قولداۋدى سەزىنبەگەلى، وسىنداي ايعايدى ەستىمەگەلى دە ءبىراز بولىپ قالعان. جانكۇيەرلەرىمە شەكسىز ريزا بولدىم. كورەرمەندەر الماتىدان عانا ەمەس، ەلىمىزدىڭ تۇكپىر-تۇكپىرىنەن جينالعان. ءتىپتى، وزگە ەلدەن دە كەلگەن جانكۇيەرلەرىم بار ەكەنىن ەستىدىم. ماعان حالىقتىڭ وسىنداي قوشەمەتىنەن ارتىق قىمبات ەشتەڭە جوق. جانكۇيەرلەرىم مەنەن نوكاۋند كۇتتى. مەن ونى شارشى الاڭدا جۇدىرىقتاسىپ ءجۇرىپ، جاقسى سەزىندىم...
شەتەلدەن كەلگەن تورەشىلەر قازاق جانكۇيەرلەرىنە تاڭداي قاقتى
وسىعان دەيىن «قازاق سپورتقا جانكۇيەر بولا المايدى» دەپ ايتاتىندار كەزدەسىپ جاتاتىن. ولاي ەمەس، كەرىسىنشە ەكەنىن كەشەگى بوكس كەشى دالەلدەپ بەردى. ماعان جارىستان كەيىن، شەتەلدەن كەلگەن تورەشىلەر قازاق جانكۇيەرلەرىنىڭ بوكسقا دەگەن ىقىلاسىن كورىپ، تاڭداي قاققاندارىن ايتتى. شىنىمەن، كورەرمەندەر سانىندا شەك بولعان جوق. ءوز قانداستارىنىڭ جەكپە-جەكتەرىنە جانكۇيەرلەرىمىز تىكەسىنەن تىك تۇرىپ قولداۋ كورسەتتى. ونەرىمىزدى باعالاي بىلەتىن حالقىمىز امان بولسىن دەپ تىلەيمىن.
جەڭىسىم الماتىنىڭ 1000 جىلدىعى مەن تاۋەلسىزدىگىمىزدىڭ 25 جىلدىعىنا تاماشا تارتۋ بولدى
مەنىڭ بۇل جەڭىسىم الماتىنىڭ 1000 جىلدىعى مەن تاۋەلسىزدىگىمىزدىڭ 25 جىلدىعىنا تاماشا تارتۋ بولدى. جەڭىسىمدى وسى قوس مەرەكەگە ارنايمىن. وسىنىڭ بارلىعى تاۋەلسىزدىكتىڭ ارقاسى. تاۋەلسىزدىگىمىز ۇزاعىنان بولا بەرسىن. ەلىمىز امان، جۇرتىمىز تىنىش بولسا، بىزدە دە جەڭىستى كۇندەر كوپ بولادى دەپ ويلايمىن. وسى ورايدا، بىزگە جەكپە-جەك وتكىزۋگە مۇمكىندىك جاساپ بەرگەن الماتى قالاسىنىڭ اكىمى باۋىرجان بايبەك مىرزاعا، ءوز اعامداي بولىپ كەتكەن، قازاق سپورتىنىڭ جاناشىرى، بەلگىلى كاسىپكەر باۋىرجان وسپانوۆ مىرزاعا، سونداي-اق، كەشتىڭ ويداعىداي وتۋىنە بار كۇشتەرىن سالعان باسقا دا بەلگىلى ازاماتتارعا، ۇيىمداستىرۋشىلارعا العىس ايتقىم كەلەدى.
اۆتور: كۇنسۇلتان وتارباي