اۋە رەيسى مەن جاڭا ۇشاقتار
الماتى تۋريزم بيۋروسى 30-قاراشادان باستاپ Air Astana كومپانياسى الماتىدان توكيوعا تىكەلەي رەيس ورىندايتىنىن حابارلادى.
رەيستەر اپتاسىنا ەكى رەت Airbus A321LR اۋە كەمەسىمەن جۇزەگە اسىرىلىپ، ۇشاق ناريتا (NRT) اۋەجايىندا قونادى. تۋريزم بيۋروسى وسى رەيس ارقىلى قازاقستان مەن جاپونيا اراسىندا ەكى ەلدىڭ ازاماتتارى ەمىن-ەركىن، جىلدام ءارى ىڭعايلى تۇردە ساياحاتتاي الاتىنىن اتاپ ءوتتى. ودان بولەك، الداعى ۋاقىتتا الماتىنى جاپونيا نارىعىندا ىلگەرىلەتۋگە باعىتتالعان جاڭا بىرلەسكەن جوبالار اتقارىلاتىنىن مالىمدەدى.
جۇك تاسىمالى سەكتورىندا دا جاڭالىق بار. قازاقستاننىڭ ۇلتتىق جۇك تاسىمالداۋشىسى اۋە فلوتىنا Airbus A340 ۇشاقتارىن ساتىپ الماق. بۇل تۋرالى وسى اپتادا وتكەن ۇكىمەت وتىرىسىندا كولىك ۆيتسە-ءمينيسترى تالعات لاستايەۆ باياندادى. ونىڭ سوزىنشە، العاشقى اۋە كەمەسى بيىل قاراشادا، ەكىنشىسى كەلەر جىلدىڭ ناۋرىز ايىندا جەتكىزىلەدى.
كولىك ۆيتسە-ءمينيسترىنىڭ سوزىنە جۇگىنسەك، «ەير كارگو» كومپانياسى اۋە كەمەلەرىن جەتكىزۋ جونىندە كەلىسىمشارتقا قول قويعان. جاڭا ەكى ۇشاق قاتارعا قوسىلعان سوڭ، اۋە كەمەلەرىنىڭ جالپى سانى 10 عا جەتەدى.
قۇرىلىس
سونىمەن قاتار، قاراشا ايىندا ۇلكەن الماتى كولىنە اپاراتىن جاڭا سوقپاق اشىلادى. بۇگىندە الماتىداعى جاڭا «ءمارمار» تۋريستىك سوقپاعىنىڭ قۇرىلىسى اياقتالۋعا جاقىن.
قالالىق تۋريزم باسقارماسىنىڭ مالىمەتىنشە، قازىرگى ۋاقىتتا ۇلكەن الماتى كولىنە تىكەلەي اپاراتىن ۇزىندىعى 5,3 شاقىرىم جاڭا جاياۋ جۇرگىنشىلەر باعىتىن اباتتاندىرۋ جۇمىستارى جۇرگىزىلىپ جاتىر. جوبانى 2026-جىلعى قاراشا ايىنىڭ سوڭىنا دەيىن تولىق اياقتاۋ جوسپارلانعان. مارشرۋت بويىندا شولۋ جانە دەمالىس الاڭدارى، باسپالداقتار، وتكەلدەر، اقپاراتتىق تاقتالار مەن باعىتتاۋشى بەلگىلەر قاراستىرىلعان.
- جاڭا سوقپاق الماتىنىڭ ەڭ كورىكتى جەرلەرىنىڭ ءبىرى - ۇلكەن الماتى كولىنە جاياۋ بارۋدى بارىنشا جايلى، قولجەتىمدى ءارى قاۋىپسىز ەتەدى، - دەپ حابارلادى باسقارما.
ال شىعىس قازاقستاندا قاتونقاراعايعا بارۋدى جەڭىلدەتەتىن جاڭا جول قاراشادا ىسكە قوسىلادى. ۇزىندىعى 12 شاقىرىمعا جۋىق وسينوۆ اسۋىن اينالىپ وتەتىن باعىت قازىرگى جولدى شامامەن 6 شاقىرىمعا قىسقارتادى ءارى قىستا قوزعالىسى كۇردەلەنەتىن ۋچاسكەدەگى قاۋىپسىزدىكتى ارتتىرادى.
جۋىردا اتالعان ۋچاسكەدەگى قۇرىلىس بارىسىن تەكسەرۋگە وبلىس اكىمى نۇرىمبەت ساقتاعانوۆ ارنايى باردى. ونىڭ سوزىنشە، بۇگىندە ۇزىندىعى 12 شاقىرىمعا جۋىقتايتىن جولدىڭ نەگىزگى بولىگى دايىن. جولدى قاراشا ايىنىڭ ءبىرىنشى ونكۇندىگىندە پايدالانۋعا بەرۋ جوسپارلانىپ وتىر. قازىرگى ۋاقىتتا كوپىر قۇرىلىسىن اياقتاۋ عانا قالدى.
- جاڭا جولداعى كوپىردىڭ ۇزىندىعى 176 مەتر، ال بيىكتىگى 45 مەتردى قۇرايدى. جولدىڭ تاعى ءبىر ماڭىزدى ەرەكشەلىگى - ونىڭ بۇرىنعى اينالما باعىتپەن سالىستىرعاندا شامامەن 6 شاقىرىمعا قىسقا بولۋى. بۇل جۇرگىزۋشىلەردىڭ ۋاقىتىن ۇنەمدەۋگە مۇمكىندىك بەرەدى، - دەدى نۇرىمبەت ساقتاعانوۆ.
مۇناي باعاسى
ەلىمىز ءۇشىن اسا ماڭىزدى تاعى ءبىر جايتتى جازعان ءجون. وپەك ەلدەرى قاراشادا مۇناي ءوندىرىسىنىڭ قازىرگى دەڭگەيىن ساقتاۋعا كەلىستى. جۋىردا ساۋد ارابياسى، رەسەي، يراك، كۋۆەيت، قازاقستان، الجير جانە ومان وكىلدەرىنىڭ ونلاين كەزدەسۋىنەن كەيىن وسىنداي شەشىم قابىلداندى.
ورتاق شەشىمگە سايكەس، 2026-جىلدىڭ قىركۇيەگىنە بەلگىلەنگەن مىندەتتى ءوندىرىس دەڭگەيى قاراشا ايىندا دا ساقتالادى، ياعني وداق ەكى اي بويى ءوندىرىس كولەمىن ۇلعايتپايدى.
كەزدەسۋگە قاتىسۋشىلار ىنتىماقتاستىق تۋرالى كەلىسىمدى ۇستاناتىنىن راستاپ، الەمدىك مۇناي نارىعىن ودان ءارى باقىلاۋعا نيەتتى ەكەنىن بىلدىرگەن ەدى.
سونىمەن بىرگە، وپەك ۇيىمىنا مۇشە جەتى ەلدىڭ كەلەسى كەزدەسۋى 2026-جىلدىڭ 1-قاراشاسىنا جوسپارلانعان.
ەسكە سالايىق، بۇعان دەيىن 1-قازاننان نە وزگەرگەنىن جازعانبىز.