ءبىر كۇندە 1 مىڭنان استام كولىك قار قۇرساۋىندا قالعان، 725 ادام قۇتقارىلدى
توتەنشە جاعدايلار مينيسترلىگى تاراتقان مالىمەتكە سەنسەك، جولداردا رەسپۋبليكالىق شتاب قۇرىلعان.
وسىعان ۇقساس شتابتار وڭىرلەردە (اباي، اقمولا، قاراعاندى، جامبىل، پاۆلودار جانە جەتىسۋ وبلىستارىندا) دە جۇمىس ىستەپ تۇر.
بلوكبەكەتتەردە 1000 نان استام اۆتوكولىك جينالدى.
ءبىر تاۋلىكتە قۇتقارۋشىلار 725 ادامدى قۇتقارىپ، ەۆاكۋاتسيالادى، ونىڭ ىشىندە 137 بالا، 124 تەحنيكا قار قۇرساۋىنان شىعارىلعان.
حالىقتى ەۆاكۋاتسيالاۋ ءۇشىن اۆتوجولداردىڭ جابىق ۋچاسكەلەرىندە ۋاقىتشا جىلىتۋ پۋنكتەرى دايىندالدى، سونداي-اق ەۆاكۋاتسيالاۋ ءۇشىن 200 تەحنيكا دايىن تۇر.
ۋاقىتشا جىلىتۋ پۋنكتىندە 200 دەن استام ادام، ونىڭ ىشىندە 16 بالا بار.
حالىقتى ەسكەرتۋ ماقساتىندا اۋا رايىنىڭ ناشارلاۋى تۋرالى 232 SMS، سونداي-اق «دارمەن» موبيلدى قوسىمشاسى ارقىلى 114 حابارلاما جىبەرىلدى.
اۆاريالىق-قۇتقارۋ جۇمىسىنا بارلىعى 4163 ادام جانە 1343 تەحنيكا جۇمىلدىرىلدى.
تۇرگەن شاتقالىنان 37 كولىك ەۆاكۋاتسيالاندى.
جول قىزمەتتەرى جولدى تازارتۋ جۇمىسىن جالعاستىرىپ جاتىر.