ەلىمىزدە ءبىر ادام ايىنا 1,5 كەلى قانت تۇتىنادى
دەگەنمەن، energyprom.kz پورتالىنىڭ مالىمەتىنشە، ەلىمىزدە ءتاتتى ونىمدەردى تۇتىنۋ وسى جىلى ءبىرشاما تومەندەگەن. ماسەلەن، 2022 -جىلدىڭ ءبىرىنشى توقسانىندا جان باسىنا شاققاندا ورتاشا ەسەپپەن 10,3 كەلى قانت، دجەم، بال، شوكولاد جانە كونديتەرلىك ونىمدەر تۇتىنىلعان. بۇل 2021 -جىلدىڭ ءبىرىنشى توقسانىنداعى كورسەتكىشپەن سالىستىرعاندا 1,3 پايىزعا تومەن. ەسەپتى كەزەڭدە ءبىر ادام 4,5 كەلى قانت پايدالانعان. ال بۇل كورسەتكىش وتكەن جىلدىڭ 3 ايىمەن سالىستىرعاندا 7,2 پايىزعا جوعارى. سونىمەن قاتار قازاقستاندىقتاردىڭ بالمۇزداق (1-توقساندا جان باسىنا شاققاندا 275 گراممعا دەيىن، ءوسىم 2,6 پايىز) پەن شوكولادقا (223 گرامعا دەيىن، 0,5 پايىز) قۇمارى ارتقانى بايقالادى.
ەلىمىزدە شاقپاق قانت تۇتىنۋ كولەمى 27,6 پايىزعا دەيىن قىسقارعان. مۇنان بولەك، ەلىمىزدە توساپ، دجەم، بالل، كونفەت، گلازۋرلەنگەن شوكولاد جانە باسقا دا تاتتىلەردى تۇتىنۋ كولەمى ازايىپ كەلەدى. وسى جىلدىڭ 1-توقسانىندا قازاقستاننىڭ وڭىرلەرى اراسىندا قانت، دجەم، بال، شوكولاد جانە كونديتەرلىك ونىمدەر ەڭ كوپ تۇتىنۋ الماتى (حالىقتىڭ جان باسىنا شاققاندا ورتاشا ەسەپپەن 12,46 كەلى) مەن تۇركىستان (11,28 كەلى) وبلىستارىندا، سونىمەن قاتار الماتى قالاسىندا (11,27 كەلى) تىركەلگەن. ەڭ تومەن كورسەتكىش شىمكەنت قالاسىندا (6,9 كەلى)، اتىراۋ (7,95 كەلى) جانە شىعىس قازاقستان (8,52 كەلى) وبلىستارىندا بايقالادى.
ايتا كەتەرلىگى، ەلىمىزدە قانت توڭىرەگىندەگى دۇربەلەڭ جالعاسىپ جاتىر. ءونىم تاپشىلىعى قانتقا تاۋەلدى كونديتەرلىك كاسىپورىندارعا قازىردىڭ وزىندە اۋىر ءتيىپ وتىر. ايتالىق، «حابار-24» تەلەارناسىنىڭ حابارلاۋىنشا، ورال كونديتەرلەرى ماۋسىم ايىنىڭ باسىندا قانت تاپشىلىعىنا جانە باعاسىنىڭ قىمباتتاۋىنا بايلانىستى ونىمدەرىن قىمباتتاتۋعا ءماجبۇر بولعان. ەلىمىزدەگى ەڭ ءىرى كونديتەرلىك فابريكا «لوتتە راحات» ا ق- تا دايىنداۋ بارىسىندا قوسىلاتىن قانت ۇلەسى كەيبىر تاتىلەردى شىعارۋىن توقتاتقانىن مالىمدەگەن ەدى.
الايدا وتكەن ايدىڭ سوڭىندا ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ەرجان قازانبايەۆ ەلىمىزدە قانت قورى جەتكىلىكتى، شامامەن 67 مىڭ توننا قانت بار ەكەندىگىن ايتقان بولاتىن . ۇلتتىق ستاتيستيكا بيۋروسىنىڭ دەرەكتەرىنە سايكەس، ەلىمىزدىڭ قالالارىندا قانتتىڭ ورتاشا باعاسى 1 كەلىسىنە 439 تەڭگەنى قۇرايدى. بۇل رەتتە ەڭ قىمبات قانت الماتى (463 تەڭگە)، قاراعاندى (461) جانە اتىراۋ (460) قالالارىندا ساۋدالانۋدا. ال قانتتىڭ ارزان باعاسى اقتوبە (378 تەڭگە)، اقتاۋ (397) جانە پەتروپاۆل (401) قالالارىندا تىركەلگەن.
اۆتور: مارلان جيەمباي