باس جۇلدەسى 1,5 ميلليون بولاتىن «ۇلى دالا» شىعارماشىلىق بايقاۋى جاريالاندى
ەلباسىنىڭ «ۇلى دالانىڭ جەتى قىرى» ماقالاسى تاريحىمىزدى دۇرىس ءتۇسىنىپ، قابىلداۋعا شاقىرادى. ونداعى باسىمدىقتاردى جۇزەگە اسىرۋعا «نۇر وتان» پارتياسى دا تىكەلەي اتسالىساتىن بولادى. وسى باعىتتاعى جوبالاردىڭ ءبىرى - جاس اقىن-جازۋشىلارعا ارنالعان «ۇلى دالا» شىعارماشىلىق بايقاۋى.
«نۇر وتان» پارتياسى ءتوراعاسىنىڭ ءبىرىنشى ورىنباسارى پرەزيدەنت ماقالاسىنىڭ ءمانى مەن ماڭىزىنا توقتالىپ ءوتتى. ول بۇل ماقالانىڭ ۇلت تاريحىن تانۋدىڭ جاڭا كەزەڭىن باستاپ بەرگەنىن جانە ءبىزدىڭ الەمدىك وركەنيەت پەن جاھاندىق دامۋعا قوسقان ۇلەسىمىزدى دۇنيەجۇزىنە جاڭاشا دارىپتەۋگە ۇندەيتىنىن ايتتى.
بايقاۋ ءوز شىعارمالارىندا ەلىمىزدىڭ رۋحاني جاڭعىرۋى مەن دامۋىن سۋرەتتەيتىن، قازىرگى زامانعى شىندىقتى تۇسىنۋگە جانە قازاقستاندىقتاردىڭ دۇنيەتانىمىن قالىپتاستىرۋعا ىقپال ەتەتىن تالانتتى جاس ادەبيەتشىلەردى انىقتاۋدى كوزدەپ وتىر.
بايقاۋعا 18 بەن 40 جاس ارالىعىنداعى قالامگەرلەر قاتىسا الادى. قاتىسۋشىلاردىڭ جۇمىستارى 2018-جىلدىڭ 28- قاراشاسى مەن 2019-جىلدىڭ 15- قاڭتارى ارالىعىندا قابىلدانادى. ناتيجەسىندە «پروزا»، «پوەزيا»، «دراماتۋرگيا، كوركەم فيلمدەر مەن تەلەسەريالدار سەناريى»، «پۋبليتسيستيكا» جانە «بالالارعا ارنالعان شىعارمالار» سياقتى بەس بىردەي اتالىم بويىنشا جەڭىمپازدار مەن جۇلدەگەرلەر انىقتالماق. ءار اتالىمنىڭ جەڭىمپازىنا - 1,5 ميلليون، 2-ورىن يەگەرلەرىنە - 750 مىڭ، ال 3-ورىن العان قاتىسۋشىلارعا 500 مىڭ تەڭگەدەن بەرىلەدى.
بايقاۋدىڭ باسقا دا شارتتارى تۋرالى اقپاراتتى پارتيانىڭ رەسمي سايتىنان بىلۋگە بولادى.