بۇل تۋرالى پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«قازاقستاندى «ترانزيتتىك حاب» رەتىندە قالىپتاستىرۋ جۇمىسى باسىمدىق سانالادى. اسىرەسە، قازىرگى گەوساياسي جاعدايدا بۇل تاقىرىپ بارىنشا وزەكتى بولا تۇسۋدە. قازاقستاننىڭ كولىك جۇيەسىن حالىقارالىق دالىزدەرمەن ىقپالداستىرۋ وڭىردەگى نەگىزگى كولىك حابى رەتىندەگى پوزيتسيامىزدى ساقتاپ قالۋعا مۇمكىندىك بەرەدى. ترانسكاسپي حالىقارالىق كولىك باعدارى مەن «سولتۇستىك-وڭتۇستىك» ءدالىزى نەگىزگى باعدار سانالادى»، - دەدى ءاليحان سمايىلوۆ يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا وتىرىسىندا.
ۇكىمەت باسشىسى اقتاۋ مەن قۇرىق تەڭىز پورتتارىن كەشەندى دامىتۋ جۇمىستارىن جەدەلدەتۋ قاجەتتىگىن باسا ايتتى. سونىمەن قاتار «اقتاۋ تەڭىز پورتى» ا ە ا بازاسىندا كولىك-لوگيستيكالىق حاب قۇرۋ جۇمىستارىن جانداندىرۋ كەرەكتىگىنە نازار اۋدارتتى.
«قازاقستاننىڭ ترانزيتتىك-كولىك الەۋەتىن ودان ارى دامىتۋ ءۇشىن ق ت ج- نى ۇلتتىق كولىك-لوگيستيكالىق كومپانياعا ترانسفورماتسيالاۋ جۇمىستارىن ساپالى جۇرگىزۋ قاجەت. مۇنى ايتتىق. بۇل ماسەلەنى ەرەكشە باقىلاۋدا ۇستاۋ كەرەك. وتكەن جىلدىڭ قاراشاسىندا «دوستىق-مويىنتى» تەمىرجول ۋچاسكەسىنىڭ ەكىنشى جولىنىڭ قۇرىلىسى باستالدى. 2026-جىلعا دەيىن «الماتى ستانساسىنىڭ اينالما جولى»، «داربازا-ماقتاارال»، «باقتى-اياگوز» جوبالارىن اياقتاۋ جوسپارلانعان. تاياۋ ءۇش جىلدىڭ ىشىندە 1,3 مىڭ شاقىرىم تەمىرجول سالىنادى. وسى نەگىزگى ينفراقۇرىلىمدى تەمىرجول جوبالارىن جۇزەگە اسىرۋدى جەدەلدەتۋ قاجەت»، - دەدى ءاليحان سمايىلوۆ.