بيۋدجەتتىڭ كىرىس بولىگى 1,1 تريلليون تەڭگەگە ۇلعاياتىن بولدى

نۇر- سۇلتان. قازاقپارات - ق ر قارجى ءمينيسترىنىڭ ورىنباسارى تاتيانا ساۆەليەۆا بيۋدجەتتىڭ كىرىس بولىگى قالاي ۇلعاياتىنىن ءتۇسىندىردى، دەپ حابارلايدى قازاقپارات ءتىلشىسى.

«الەۋمەتتىك- ەكونوميكالىق دامۋ بولجامىن قايتا قاراۋ اياسىندا كەدەندىك، سالىقتىق اكىمشىلەندىرۋدى جاقسارتۋ بويىنشا قابىلدانىپ جاتقان شارالاردى ەسكەرسەك، بيىل كىرىستەر 9,2 تريلليون تەڭگەدەن 10,2 تريلليون تەڭگەگە دەيىن وسەدى»، - دەدى تاتيانا ساۆەليەۆا پارلامەنتتە جاڭا زاڭ جوباسىن تانىستىرۋ بارىسىندا.

ونىڭ مالىمەتى بويىنشا، بيىل بەنزين مەن ديزەلدىڭ اكسيزىن كوتەرۋدى كوزدەيتىن تۇزەتۋلەر ەنگىزىلگەن.

«بۇل شارا اياسىندا پاۆلودار، اتىراۋ وبلىستارى مەن شىمكەنت قالاسىنان 161,8 ميلليارد تەڭگە تۇسەدى. وسىلايشا بيۋدجەتتىڭ تۇسىمدەرى 1,1 تريلليون تەڭگەگە ارتادى. ال شىعىس بولىگىن ورىنداۋ ءۇشىن قوسىمشا 2,7 تريلليون تەڭگە قاجەت بولادى. وسىعان بايلانىستى پرەزيدەنتتىڭ ماقۇلداۋى بويىنشا ۇلتتىق قوردان 1,6 تريلليون تەڭگە كەپىلدەندىرىلگەن ترانسفەرت تارتۋ ۇسىنىلىپ وتىر. جالپى بيىل ۇلتتىق قوردان بيۋدجەتكە الىناتىن كەپىلدەندىرىلگەن ترانسفەرت كولەمى 4 تريلليون تەڭگە دەپ بەلگىلەنگەن. جىل اياعىنا قاراي ۇلتتىق قوردىڭ تۇسىمدەرى مەن شىعىستارى جاعىمدى تەڭگەرىمگە كەلەدى»، - دەيدى مينيستر.

ايتا كەتەيىك، بۇعان دەيىن ق ر ۇلتتىق ەكونوميكا ءمينيسترى الىبەك قۋانتىروۆ جۋرناليستەرگە ۇلتتىق قوردان كەپىلدەندىرىلگەن ترانسفەرتتى ناقتىلاۋ نە ءۇشىن قاجەت بولعانىن تۇسىندىرگەن بولاتىن.

اۆتور: ەسىمجان ناقتىباي