نۇر وتان پارتياسىنىڭ 1- ورىنباسار ءتوراعاسى 103 جاستاعى انانى مەرەكەسىمەن قۇتتىقتادى
بۇل تۋرالى «نۇر وتان» پارتياسىنىڭ رەسمي سايتىنان ءمالىم بولدى، دەپ حابارلايدى قازاقپارات.
وسىعان وراي ەلىمىزدىڭ ءار وڭىرىندەگى بارشا نۇروتاندىقتار عاسىر جاساعان جانە جاسى جۇزدەن اسقان اق جاۋلىقتى اجەلەردى مەرەكەمەن قۇتتىقتاۋدا.
جاڭا اكسيا اياسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ جاسى 103-كە كەلگەن استانا قالاسىنىڭ تۇرعىنى، ەڭبەك جانە تىل ارداگەرى دوسپولوۆا دانا قۇلمۇحامەد قىزىن قۇتتىقتادى. قارت انا ۇيىنە ارنايى بارىپ، مەرەكەلىك كوڭىل-كۇي سىيلاعان نۇروتاندىقتارعا ريزاشىلىعىن ءبىلدىرىپ، اق باتاسىن بەردى.
دانا اجەي 1915 -جىلدىڭ 12 -قىركۇيەگىندە اقمولا وبلىسىنىڭ قورعالجىن اۋدانىنا قاراستى جانتەكە اۋىلىندا تۋعان. جاستايىنان ەڭبەككە ارالاسقان اسىل اجەي ەل تاريحىندا ەرەكشە ماڭىزعا يە ءترانسسىبىر تەمىرجولى ماگيسترالىنىڭ قۇرىلىسىنا دا ۇلەس قوسقان. اتالعان ماگيسترالدى سالۋ كەزىندە اپامىز اسپاز بولىپ جۇمىس ىستەگەن ەكەن. سوعىس جىلدارىندا دا تىلدا ەسەلى ەڭبەك ەتىپ، ۇلى جەڭىسكە ۇلەس قوسقان جانداردىڭ قاتارىندا بولدى. دانا اجەيدى بارشا نۇروتاندىقتاردىڭ جانە ەلباسى، پارتيا ءتوراعاسىنىڭ اتىنان شىن جۇرەكتەن قۇتتىقتاپ، سىي- سياپات تارتۋ ەتكەن ماۋلەن اشىمبايەۆ وسىنداي اپالارىمىزدىڭ ونەگەگە تولى ءومىر جولى جاس ۇرپاققا قاشاندا ۇلگى ەكەنىن ايتتى.
«مەيىرىمدىلىكتىڭ نىشانىنداي بولعان 8 -ناۋرىز حالىقارالىق ايەلدەر كۇنى ادەمىلىكتىڭ، ىزگىلىكتىڭ جانە جىلىلىقتىڭ مەرەكەسى. سوعان وراي «نۇر وتان» پارتياسى «ەل انالارى» دەگەن اۋقىمدى شارانى قولعا الىپ وتىر. وسى اكسيا اياسىندا پارتيانىڭ بارلىق فيليالدارى عاسىر جاساعان جانە جاسى جۇزدەن اسقان اجەلەرىمىزدى ۇيلەرىنە ارنايى بارىپ قۇتتىقتاۋدا»، - دەيدى ماۋلەن اشىمبايەۆ.
شىن مانىندە اۋلەتىنىڭ عانا ەمەس، تۇتاس ەلىمىزدىڭ التىن قازىعى، بەرەكە- بىرلىكتىڭ ۇيىتقىسى بولىپ وتىرعان وسىنداي اپا- اجەلەرىمىزدىڭ ومىرىنەن الار ساباق مول. سوندىقتان نۇروتاندىقتار ابىز انالاردى جەكە- دارا قۇتتىقتاپ، اق باتالارىن الۋدى وزدەرىنىڭ ابىرويلى مىندەتى دەپ سانايدى.
«ەل باسىنا كۇن تۋعان قيىن- قىستاۋ شاقتا ەتىگىمەن سۋ كەشىپ، كەلەشەك ۇرپاق ءۇشىن جانىن بەرىپ ەڭبەك ەتكەن اياۋلى جاندارعا قۇرمەت كورسەتۋدى ءوزىمىزدىڭ ازاماتتىق بورىشىمىز دەپ ەسەپتەيمىز. ويتكەنى ءبىزدىڭ بۇگىنگى باقۋاتتى ءومىرىمىزدىڭ باستاۋىندا ەلىمىزدىڭ ىرگەسى بەرىك، بىرلىگى بەكەم بولۋىنا زور ەڭبەك سىڭىرگەن وسىنداي انالارىمىز تۇر»، - دەگەن ماۋلەن اشىمبايەۆ قازاقستانداعى بارلىق اق جاۋلىقتى اجەلەر مەن اياۋلى ارۋلاردى ايتۋلى مەرەكەمەن شىن جۇرەكتەن قۇتتىقتادى.
بۇگىندە قازاقستان بويىنشا جاسى جۇزگە جەتكەن جانە اسقان 415 اجەي بار. ولاردىڭ باسىم بولىگى، ياعني 80 ى وڭتۇستىك قازاقستان وبلىسىندا تۇراتىنىن اتاپ وتكەن ءجون.
ايتا كەتەيىك، «ەل انالارى» اكسياسى ەلىمىزدىڭ بارلىق وڭىرىندە وتكىزىلۋدە. سونىڭ اياسىندا نۇروتاندىقتار وبلىس، اۋدان ورتالىقتارىمەن قاتار شالعايدا ورنالاسقان اۋىلدىق جەرلەردەگى اپا-اجەلەرىمىزدى دە ارنايى بارىپ، مەرەكەلەرىمەن قۇتتىقتاۋدا.