ۇ ق ش ۇ سىرتقى ىستەر مينيسترلەرى بىرلەسكەن مالىمدەمە جاسادى
شولپان-اتا. KAZINFORM - قىرعىزستاننىڭ شولپان-اتا قالاسىندا ۇجىمدىق قاۋىپسىزدىك تۋرالى شارت ۇيىمىنىڭ سىرتقى ىستەر مينيسترلەرى كەڭەسىنىڭ وتىرىسى ءوتتى. جيىنعا ۇ ق ش ۇ- عا مۇشە قازاقستان، رەسەي، بەلارۋس، تاجىكستان جانە قىرعىزستان وكىلدەرى كەلدى.
شاعىن جانە كەڭەيتىلگەن فورماتتاعى كەزدەسۋلەردە سىرتقى ىستەر مينيسترلەرى حالىقارالىق جانە وڭىرلىك جاعداي جونىندە، ونىڭ ۇ ق ش ۇ- عا مۇشە مەملەكەتتەردىڭ قاۋىپسىزدىگىنە اسەرى تۋرالى پىكىر الماستى.
- دەلەگاتسيا باسشىلارى ورتالىق ازيا مەن جالپى وڭىردەگى قاۋىپسىزدىككە قاتىستى نەگىزگى ماسەلەلەردى تالقىلادى. تەرروريزممەن، ەكسترەميزممەن جانە ترانسۇلتتىق قىلمىسپەن كۇرەس ماسەلەلەرىنە ەرەكشە كوڭىل ءبولىندى. بۇل قازىر الەمدەگى باستى قاۋىپ-قاتەردىڭ ءبىرى بولىپ وتىر. وسىعان وراي، ءىس-قيمىلدى جەدەلدەتىپ ءارى تيىمدىلىگىن ارتتىرۋ ءۇشىن كۇش-جىگەردى ءارى قاراي ۇيلەستىرۋ جونىندە شەشىمدەر قابىلداندى، - دەدى قىرعىزستاننىڭ سىرتقى ىستەر ءمينيسترى جەەنبەك قۇلۋبايەۆ ب ا ق- قا مالىمدەمەسىندە.
سونىمەن بىرگە، وتىرىس قورىتىندىسى بويىنشا ءتورت بىرلەسكەن مالىمدەمە قابىلداندى:
• تەرروريزم مەن ەكسترەميزمگە الىپ كەلەتىن راديكالدانۋعا قارسى ءىس-قيمىل تۋرالى؛
• حالىقارالىق اقپاراتتىق قاۋىپسىزدىك ماسەلەلەرى جونىندە؛
• ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا ب ۇ ۇ وڭىرلىك ورتالىعىن قۇرۋ تۋرالى؛
• تاياۋ شىعىستاعى احۋالعا بايلانىستى.
- ايماقارالىق ىنتىماقتاستىقتىڭ ماڭىزدىلىعىن ەرەكشە اتاپ وتكىم كەلەدى. قازىر قاۋىپسىزدىككە تونەتىن قاتەرلەر شەكارامەن شەكتەلمەيدى. سوندىقتان ءتيىمدى ارەكەت ەتۋ ءۇشىن ۇ ق ش ۇ اياسىنداعى ۇيلەستىرىلگەن ءىس-قيمىلدارمەن قاتار باسقا ايماقتىق جانە حالىقارالىق ۇيىمدارمەن تىعىز ىنتىماقتاستىق قاجەت. قىرعىز رەسپۋبليكاسى ۇقشۇ نەگىز ەتكەن ۇجىمدىق قاۋىپسىزدىك پەن ىنتىماقتاستىق پرينتسيپتەرىنە بەرىك ەكەنىن راستايدى. ءبىز تاجىريبە الماسۋدى، بىرلەسكەن جاتتىعۋلار وتكىزۋدى، سونداي-اق باسقا حالىقارالىق جانە وڭىرلىك ۇيىمدارمەن ارىپتەستىكتى كەڭەيتىپ، پراكتيكالىق ىنتىماقتاستىقتى تەرەڭدەتۋدى قولدايمىز، - دەدى قىرعىزستان ءمينيسترى.
وسى ورايدا، ۇ ق ش ۇ، ش ى ۇ جانە ت م د اراسىنداعى ىنتىماقتاستىقتى دامىتۋ جونىندەگى جول كارتاسى قابىلداندى.
- حالىقارالىق احۋال تۇراقسىز كەزەڭدە ۇجىمدىق قاۋىپسىزدىك ماسەلەلەرى تەك باسىمدىق ەمەس، ۇ ق ش ۇ- عا مۇشە بارلىق مەملەكەتتەر ءۇشىن ستراتەگيالىق مىندەت (يمپەراتيۆ) بولىپ وتىر. وڭىردە جانە جالپى الەمدە بولىپ جاتقان سوڭعى وقيعالار قاۋىپسىزدىك پەن تۇراقتىلىقتىڭ ءتۇرلى اسپەكتىلەرىنە قاتىستى كەلىسىلگەن ۇستانىمدار قالىپتاستىرۋ قاجەتتىگىن ايقىنداي ءتۇستى. بۇگىن قول جەتكىزىلگەن ۋاعدالاستىقتار وڭىردەگى ينتەگراتسيالىق پروتسەستەردى تەرەڭدەتۋ مەن ۇجىمدىق قاۋىپسىزدىكتى ارتتىرۋعا بەرىك نەگىز بولارىنا سەنىمدىمىز، - دەدى جەەنبەك قۇلۋبەكوۆ.
پرەمەر-ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ وتىرىس قاتىسۋشىلارىن ۇ ق ش ۇ اياسىنداعى ىنتىماقتاستىق ماسەلەلەرىنە قاتىستى قازاقستاننىڭ ۇستانىمى مەن كوزقاراستارى تۋرالى حاباردار ەتىپ، ۇيىمدى جان-جاقتى ءارى ودان ءارى دامىتۋعا باعىتتالعان ۇسىنىستارىن ايتتى.
ايتا كەتەيىك، 2025-جىلى ۇيىمعا قىرعىزستان ءتوراعالىق ەتەدى. كەلەسى سىرتقى ىستەر مينيسترلەرى كەڭەسىنىڭ وتىرىسى 2025-جىلدىڭ ءتورتىنشى توقسانىندا، ۇ ق ش ۇ ۇجىمدىق قاۋىپسىزدىك كەڭەسى سەسسياسىنىڭ قارساڭىندا بىشكەك قالاسىندا وتەتىن بولدى.
ەسكە سالا كەتسەك، مامىر ايىندا ۇ ق ش ۇ پارلامەنتشىلەرى بىشكەكتە باس قوسىپ، ەسىرتكى جانە كيبەرقىلمىسقا قارسى بىرلەسكەن شارالاردى تالقىلاعان ەدى.