ەڭ ۇلكەن سيفرلىق ۇرلىق: حاكەرلەر Bybit-تەن 1,5 ميلليار دوللار ۇرلادى

استانا. قازاقپارات - Bybit كريپتوۆاليۋتا بيرجاسى حاكەرلەر ۇرلاعان 1,5 ميلليارد دوللاردى قايتارۋعا كومەكتەسۋ ءۇشىن كيبەرقاۋىپسىزدىك سالاسىنداعى «ەڭ اقىلدارعا» جۇگىندى. بۇل تاريحتاعى ەڭ ءىرى سيفرلىق ۇرلىق دەپ بولجانىپ وتىر، دەپ حابارلايدى The Guardian.

Bybit-تىڭ حابارلاۋىنشا، شابۋىلداۋشى بيتكويننەن كەيىن ەڭ تانىمال سيفرلىق ۆاليۋتالاردىڭ ءبىرى Ethereum ءاميانىنا باقىلاۋدى قولعا العان جانە اقشانى بەلگىسىز مەكەنجايعا اۋدارعان.

كريپتوبيرجا كليەنتتەردى كريپتوۆاليۋتالارىنىڭ قاۋىپسىز ەكەنىنە سەندىرۋگە اسىقتى. بيرجانىڭ باس ديرەكتورى بەن جوۋ الەۋمەتتىك جەلىدە Bybit ۇرلانعان قاراجاتتى قايتارۋ مۇمكىن بولماسا دا، بارلىق زارداپ شەككەندەرگە وتەماقى تولەيتىنىن مالىمدەدى.

- Bybit بۇل شىعىن قالپىنا كەلتىرىلمەسە دە، تولەم جاساۋعا قابىلەتتى بولىپ قالادى. كليەنتتەردىڭ بارلىق اكتيۆى 1:1 قامتاماسىز ەتىلگەن، ءبىز شىعىنداردى وتەي الامىز، - دەپ جازدى ول X الەۋمەتتىك جەلىسىندە.

بۇكىل الەم بويىنشا 60 ميلليوننان استام پايدالانۋشىسى بار Bybit ونى بۇزۋ تۋرالى جاڭالىقتار اقشانى قايتارىپ الۋ تۋرالى سۇراۋلاردىڭ كۇرت وسۋىنە سەبەپ بولعانىن اتاپ ءوتتى.

جوۋدىڭ ايتۋىنشا، كومپانيا اقشانى شەشىپ الۋ تۋرالى 350 مىڭنان استام ءوتىنىم العان. بۇل ترانزاكسيالاردى وڭدەۋدىڭ كەشىگۋىنە اكەلۋى مۇمكىن.

Bybit-تىڭ تۇسىندىرۋىنشە، شابۋىل كومپانيا Ethereum-دى «سالقىن» ءامياننان «ىستىق» ءاميانعا جوسپارلى كوشىرۋ كەزىندە بولدى.

بۇزىپ ۇرلاۋ تۋرالى حاباردان كەيىن Ethereum باعاسى جۇما كۇنى شامامەن %4 عا تومەندەدى، ءبىراق كوپ ۇزاماي بۇرىنعىعا قايتا ورالدى.

كومپانيا سونداي-اق ۇرلانعان قاراجاتتى قايتارۋعا كومەكتەسۋ ءۇشىن «كيبەرقاۋىپسىزدىك پەن كريپتواناليزدەگى ەڭ جاقسى اقىل-وي يەلەرىن» شاقىردى جانە قايتارىلعان سومانىڭ  سىياقىسى تۋرالى جاريالادى. سوما تولىق قايتارىلعان جاعدايدا سىياقى مولشەرى 140 ميلليون دوللار بولادى.

ايتا كەتەيىك، پوليتسيا «حاكەرلىك شابۋىل» جاساپ، 350 ميلليون تەڭگەنى ۇرلاعان كۇدىكتىنى ۇستادى.

اۆتور

زارينا تۋعانبايەۆا