ەڭ كوپ جالاقى تولەنەتىن جۇمىس

 اقپان ايىندا جۇمىس بەرۋشىلەر ونەركاسىپتىك الپينيستەرگە ەڭ جوعارى جالاقى ۇسىندى. ەلەكتروندىق ەڭبەك بيرجاسىندا ولاردىڭ ايلىعى 1 ميلليون تەڭگەگە دەيىن بارادى.

جوعارى ەڭبەكاقى ونەركاسىپتىك الپينيستەردىڭ قاۋىپسىزدىگىن قانشالىقتى قامتاماسىز ەتەدى؟ الدە، وسى ءبىر ماماندىق تۇرىنە سۇرانىس ارتتى ما؟

باقتيار جاقىپوۆ 8 جىل تاجىريبەسى بار الپينيست. تەك تاۋدىڭ ورنىنا بيىك عيماراتتارعا ورمەلەيدى. ونەركاسىپتىك الپينيستەر ءۇشىن جۇمىستىڭ قىزاتىن شاعى - جاز، دەيدى. ارينە، قىستا دا تاپسىرىس تابىلادى: ءزاۋلىم ۇيلەردىڭ قاسبەتتەرىن جىلىلاۋ، تىگىستەرىن بەكىتۋ، جارىق جۇرگىزۋ، قار ارشۋ، تاعى باسقاسى. كۇن سايىن جۇزدەگەن مەتر ارقان مەن قورعانىس قۇرالدارىن سايلاپ، قىزمەتىنە كىرىسەدى.

باقتيار جاقىپوۆ، ونەركاسىپتىك الپينيست:

- مەنىڭ ەڭ ءبىرىنشى كوتەرىلگەن نىسانىم - ەكسپو الاڭىنداعى سفەرا بولاتىن، اتاۋى ەسىمدە جوق. سوندا جۇمىس ىستەدىك. استاناداعى، مەنىڭشە، ورتالىق ازياداعى عوي دەيمىن، ەڭ بيىك عيمارات ابۋ دابي پلازانى سالۋعا اتسالىستىق. 76 قابات، 330 مەتر بيىكتە سالبىراپ تۇرىپ، سالماعى 400 كەلىلىك شىنى پاكەتتەردى اۋىستىردىق. ول كەزدە تيىسىنشە ەڭ جوعارى جالاقى تولەندى.

باقتياردىڭ ايتۋىنشا، الپينيست جۇمىسىندا تاجىريبەنى شىڭداۋ ماڭىزدى. ماماندىقتىڭ قىر-سىرىن ابدەن مەڭگەرگەن ۋاقىتتا 100-150 مەتردەن اساتىن بيىك تە تۇك ەمەس. تەك مۇقيات بولعان ءجون. سوسىن، جەلدىڭ ەكپىنى سەكۋندىنا 15 مەتردەن اسسا نەمەسە جاڭبىر جاۋسا، جۇمىس توقتاتىلادى. قاۋىپسىزدىك تالابى سونداي.

باقتيار جاقىپوۆ، ونەركاسىپتىك الپينيست:

- ءبىزدىڭ جۇمىستا قاتەلىك جىبەرۋگە بولمايدى. سول سەبەپتى سەرتيفيكاتتاۋدان ءوتىپ تۇرامىز. 2020 -جىلى ازەربايجان استاناسى باكۋگە بارىپ، يراتا حالىقارالىق سەرتيفيكاتىنىڭ ءبىرىنشى دەڭگەيىن الۋ ءۇشىن وقۋدان وتتىك. ال 2023 -جىلى ىستامبۇل قالاسىندا ەكىنشى دەڭگەيدەن وتتىك. جوسپارىم ودان ءارى بىلىكتىلىگىمدى جوعارىلاتۋ. جالاقى ماسەلەسىنە توقتالايىق. ءبارى ءسىز بەن ءبىز ويلاعانداي وڭاي ەمەس. ستاتيستيكا كورسەتكەن ميلليون تەڭگە جالاقى بۇل كاسىپتەگى ەكىنىڭ بىرىنە بۇيىرا بەرمەيدى ەكەن.

ارمان حاسەنوۆ، ج ش س ديرەكتورى:

- جوعارى جالاقى تۋرالى مالىمەت ءسال بۇرمالانعان دەپ ەسەپتەيمىن. جۇمىس بەرۋشىلەر ەڭبەك بيرجاسىندا سونداي جالاقى كورسەتكەن دە شىعار. ول اتىراۋداعى مۇناي كەن ورىندارىنداعى ۆاحتالىق جۇمىس بولۋى مۇمكىن. ءبىراق، ءىرى قالالاردا ورتاشا جالاقى 500-600 مىڭ تەڭگە. 1 ميلليون-2 ميلليون ايلىق تۋرالى جاڭالىقتاردان كەيىن، ءتىپتى ەشبىر تاجىريبەسى جوق ادامدار كەلەدى. سالدارىنان قايعىلى وقيعالار بولىپ جاتىر. بىلتىر قازان ايىندا 4 ادام قۇلاپ كەتتى.

تاجىريبەلى مامان ونەركاسىپتىك الپينيستەردى وقىتىپ، جوعارى تالاپقا ساي سەرتيفيكات بەرەتىن ورتالىقتار ەلىمىزدە كەمدە- كەم، - دەيدى. ءتىپتى ونى زاڭسىز ساتىپ الۋشىلار تابىلادى. ال بۇنىڭ سوڭى جۇمىسشى ءۇشىن اۋىر زارداپقا اكەپ سوعۋى مۇمكىن.

ارمان حاسەنوۆ، ج ش س ديرەكتورى:

- سالادا 20 -جىلدىق تاجىريبەسى بار ادام رەتىندە ايتارىم، زاڭ وتە ءالسىز. ءبىز ۇزاق ۋاقىت بويى قاۋىمداستىق اياسىندا حالىقارالىق ستاندارتقا جاقىن جوبانى ەنگىزۋگە تىرىستىق. ءبىراق ول قابىلدانبادى. قازىرگى بۇيرىق قاۋىپسىزدىك تۇرعىسىنان، ساقتاندىرۋ جاعىنان دا جۇمىسكەرلەردى قورعامايدى. كاسىپكە قويىلاتىن تالاپ جاعىنان دا ولقىلىعى كوپ. سونىمەن ونەركاسىپتىك الپينيزم سالاسىندا باسەكەلەستىك جوعارى بولعاندىقتان، جالاقى دەڭگەيى كاسىبي بىلىكتىلىككە ساي سارالاناتىنى بەلگىلى بولدى. جۇمىس بەرۋشىلەر ادەتتە 3 جىلدان ارتىق ەڭبەك ءوتىلىن تالاپ ەتەدى. سونىمەن قاتار تاجىريبەسىز، ارزان ەڭبەك كۇشىن قولداناتىندار بار.

ءسانيا مامەتوۆا، قالالىق اكىمدىكتىڭ مانساپ ورتالىعى جۇمىس بەرۋشىلەرمەن بايلانىس ءبولىمىنىڭ باسشىسى:

- بۇگىنگى تاڭدا ءبىزدىڭ ەڭبەك. ك ز پورتالىندا 8 جۇمىس بەرۋشىدەن ياعني كومپانيادان سۇرانىس كەلىپ ءتۇستى. ءبىزدىڭ بازادا قازىرگى كەزدە 7 كىسىنىڭ رەزيۋمەسى تۇر. ءبىراق ولاردا ەڭبەك تاجىريبەسى از. ال ولاردىڭ بەرىپ وتىرعان جالاقىسى 120 مىڭ تەڭگەدەن 1 ميلليون ت گ دەيىن بولىپ تۇر. ال ەڭبەك ءوتىلى جوعارى مىقتى مامان ميلليون تەڭگەدەن جوعارى سۇراپ تۇر. نەگىزى جۇمىس بەرۋشىلەردىڭ تالابى 3 جىلدان جوعارى بولۋ كەرەك. قانشا دەگەنمەن مىناۋ بيىك عيماراتقا شىققاننان كەيىن ادامنىڭ قاۋىپسىزدىگى ءبىرىنشى ورىندا عوي.

ماماندار، جالپى، اقپان ايىندا ەڭبەك نارىعىنداعى بەلسەندىلىك تومەندەگەنىن تىلگە تيەك ەتتى. الدىڭعى ايمەن سالىستىرعاندا بوس جۇمىس ورىندارى  كە ازايىپ، تۇيىندەمەلەر A كە كەمىگەن. بۇگىندە ەلەكتروندىق ەڭبەك بيرجاسىندا 113 مىڭنان استام جۇمىس ىزدەۋشى تىركەلگەن، سونداي- اق 81 مىڭعا جۋىق ۆاكانسيا بار.

ءسانيا مامەتوۆا، قالالىق اكىمدىكتىڭ مانساپ ورتالىعى جۇمىس بەرۋشىلەرمەن بايلانىس ءبولىمىنىڭ باسشىسى:

- قازىرگى تاڭدا بىزدە IT ماماندىقتارعا سۇرانىس ارتىپ تا وتىر. جالاقى دا مول. سونىمەن قاتار زاڭگەرلەر، مىقتى ەسەپشى بۋحگالتەر، يۋريست ماماندىقتارىنا سۇرانىس وتە كوپ. مىسالى ماعان قازىر 8 ادامعا زاڭگەر بوس جۇمىس ورنىن جىبەردىك. جالاقىسى 500 مىڭنان جوعارى. سونداي- اق جۇمىس بەرۋشىلەر باس قۇرىلىسشىعا ورتا ەسەپپەن 650 مىڭنان جوعارى، جۇيەلىك ساۋلەتشىگە 600 مىڭ تەڭگەدەن باستاپ جالاقى ۇسىنعان. ءوز تۇيىندەمەلەرىندە IT- ءبولىمىنىڭ باسشىسى 890 مىڭ، كوممەرتسيالىق ۇيىم ديرەكتورى 850 مىڭ تەڭگە ەڭبەكاقى العىسى كەلەتىنىن كورسەتكەن.

جۇمىس بەرۋشى ۇسىنىسى: ونەركاسىپتىك الپينيست - 1 ميلليون ت گ- دەن باستاپ؛

باس قۇرىلىسشى - 656 مىڭ ت گ- دەن باستاپ؛

جۇيەلىك ساۋلەتشى - 600 مىڭ ت گ- دەن باستاپ.

تۇيىندەمە: IT- ءبولىمىنىڭ باسشىسى - ورتا ەسەپپەن 891 مىڭ ت گ؛

كوممەرتسيالىق ديرەكتور - 846 مىڭ ت گ باستاپ.

www.24.kz