شتاتتان تىس ورمانشىلاردىڭ جالاقىسى وسەدى

1- شىلدەدەن باستاپ ورمان شارۋاشىلىعى سالاسىنداعى شتاتتىق قىزمەتكەرلەردىڭ جالاقىسى «ازاماتتىق قىزمەتشىلەرگە، مەملەكەتتىك بيۋجەت قاراجاتى ەسەبىنەن ۇستالاتىن ۇيىمدار قىزمەتكەرلەرىنە، قازىنالىق كاسىپورىندار قىزمەتكەرلەرىنە ەڭبەكاقى تولەۋ جۇيەسى تۋرالى» ۇكىمەت قاۋلىسىنا سايكەس كوتەرىلگەن، دەپ حابارلايدى قازاقپارات.

ەكولوگيا جانە تابيعي رەسۋرستار مينيسترلىگىنىڭ مالىمەتىنشە، قوسىمشا ۇستەماقى شتاتتىق قىزمەتكەرلەرگە قاراستىرىلعان. سەبەبى مۇددەلى مەملەكەتتىك ورگاندارمەن كەلىسۋ بارىسىندا قاۋلى ەرەجەلەرىنە سايكەس شتاتتان تىس قىزمەتكەرلەرگە ۇستەماقى تاعايىنداۋ ماسەلەسى قولداۋ تاپپادى. ويتكەنى، ولار سالا ماماندارى ەمەس.

«سونىمەن قاتار، مينيسترلىكتە جۇرگىزىلگەن مەملەكەتتىك ساتىپ الۋ مونيتورينگىنىڭ قورىتىندىسى بويىنشا 853 ميلليون تەڭگە كولەمىندە ۇنەمدەلگەن سوما انىقتالدى.

وسىعان بايلانىستى، ەكولوگيا جانە تابيعي رەسۋرستار ءمينيسترى ەرلان نىسانبايەۆ اتالعان قاراجاتتى 1-شىلدەدەن باستاپ جالاقىسى كوتەرىلگەندەر ساناتىنا كىرمەگەن قىزمەتكەرلەردىڭ ەڭبەگىنە قوسىمشا اقى تولەۋ ءۇشىن پايدالانۋدى تاپسىردى، ۇستەماقى 4539 قىزمەتكەرگە تاعايىندالماق»، - دەپ جازدى ۆەدومستۆودان.

ايتا كەتەيىك، اتالعان قاراجات مينيسترلىكتىڭ بەكىتىلگەن بيۋدجەتى اياسىندا باستاپقىدا جوسپارلانعان ناتيجەلەردى وزگەرتپەي، وتكىزىلگەن مەملەكەتتىك ساتىپ الۋ قورىتىندىلارىن قايتا قاراستىرۋ ەسەبىنەن ءبولىندى.