ەلىمىزدە جيھاز باعاسى قىمباتتاپ بارادى

ەلىمىزدە ءبىر جىلدىڭ ىشىندە جيھاز باعاسى 19 پايىزعا قىمباتتادى، دەپ حابارلايدى قازاقپارات ءتىلشىسى.

Energyprom.kz پورتالىنىڭ مالىمەتىنشە، وسى جىلدىڭ قاڭتار- تامىز ايلارىنىڭ قورىتىندىسىندا ەلىمىزدە 51,7 ميلليارد تەڭگەنىڭ جيھازى شىعارىلدى. بۇل كورسەتكىش قۇندىق ماندە 1 جىل بۇرىنعى كورسەتكىشتەن 25,2 پايىزعا جوعارى.

وڭىرلەر اراسىندا الماتى قالاسىندا ەڭ كوپ جيھاز ءوندىرىلدى. قالادا شىعارىلعان جيھاز 13,7 ميلليارد تەڭگەگە باعالانادى. بۇل ءبىر جىل بۇرىنعى كورسەتكىشتەن 14 پايىزعا كوپ.

ەكىنشى جانە ءۇشىنشى ورىنداردا قاراعاندى (1 جىلدا 57,9 پايىز وسىممەن 4,9 ميلليارد تەڭگە) جانە الماتى (58 پايىز وسىممەن 4,7 ميلليارد تەڭگە) وبلىستارى تۇر.

ءبىرىنشى جارتىجىلدىقتىڭ قورىتىندىسىندا جەرگىلىكتى كومپانيالار مەتالل ورىندىقتار مەن وتىرۋعا ارنالعان وزگە دە جيھازدارمەن ىشكى نارىقتى 32,6 پايىزعا قامتاماسىز ەتتى.

سونىمەن وتاندىق كومپانيالار كەڭسەگە ارنالعان اعاش جيھازبەن - 77,3، ساۋدا-ساتتىققا ارنالعان جيھازدارمەن - 67,5، اس ءۇي جيھازىمەن - 63، ماتراستارمەن 56,9 پايىزعا قامتي الدى.

وسى جىلدىڭ تامىز ايىنىڭ قورىتىندىسىندا جيھازدار مەن تۇرمىستىق زاتتار باعاسى ءبىر جىلدىڭ ىشىندە 19,2 پايىزعا قىمباتتادى.

قىمباتشىلىق شىعىس قازاقستان (33,1+ پايىز)، اقمولا (31,1+)، قاراعاندى (29,6+)، الماتى (26,6) جانە قوستاناي (25,9+) وبلىستارىندا بايقالدى.

ەڭ تومەن ءوسىم ماڭعىستاۋ وبلىسىندا تىركەلدى: 4,3 پايىز.