رەسەيلىك كومپانيالاردىڭ قازاقستانعا كوشۋى جالعاسىپ جاتىر

رەسەيلىك كومپانيالاردىڭ قازاقستانعا كوشۋى جالعاسىپ جاتىر. دەگەنمەن، سوڭعى ۋاقىتتا ونىڭ قارقىنى ايتارلىقتاي تومەندەدى، دەپ حابارلايدى قازاقپارات ءتىلشىسى.

رەسەيلىك كومپانيالاردىڭ قازاقستانعا كوشۋى جالعاسىپ جاتىر. دەگەنمەن، سوڭعى ۋاقىتتا ونىڭ قارقىنى ايتارلىقتاي تومەندەدى، دەپ حابارلايدى قازاقپارات ءتىلشىسى.

Finprom.kz پورتالىنىڭ مالىمەتىنشە، سوڭعى جىلدارى ەلىمىزدە شەتەلدىك كاپيتالدىڭ قاتىسۋى بار جۇمىس ىستەپ تۇرعان زاڭدى تۇلعالاردىڭ سانى 24,3 پايىزعا ارتىپ، 54,4 مىڭعا جەتىپ وتىر. دەگەنمەن، مۇنداي كاسىپورىنداردىڭ تورتەۋىنىڭ ۇشەۋى عانا جۇمىس ىستەپ تۇر. تامىزدا ولاردىڭ سانى 41,4 مىڭ كاسىپورىن بولدى.

ەلىمىزگە كەلىپ جاتقان زاڭدى تۇلعالاردىڭ 78 پايىزى ساۋدا، قىزمەت، IT-كلاستەر، اكىمشىلەۋ جانە قوسالقى قىزمەت كورسەتۋ ساراپشىلارى سىندى سالالاردى قامتيدى. ەكونوميكانىڭ باسقا دا سەكتورلارىندا ءوسىم بايقالعانىمەن ماردىمسىز.

قازاقستانداعى ءاربىر كىنشى شەتەلدىك كاسىپورىن رەسەيلىك. 1 جىل بۇرىن ولاردىڭ سانى 11,9 مىڭ بولسا، بيىل 18,6 مىڭعا جەتىپ وتىر. ەلىمىزدە جۇمىس ىستەپ تۇرعان شەتەلدىك كاسىپورىندار قاتارىنداعى رەسەيلىك كومپانيالاردىڭ ۇلەسى 44,9 پايىزدى قۇرايدى. ودان كەيىنگى ورىندا تۇرىك بيزنەسمەندەرى تۇر. تامىز ايىنىڭ سوڭىندا ەلىمىزدە تۇرىكتىڭ 3,7 مىڭ زاڭدى تۇلعاسى بولدى. ال ءۇشىنشى ورىندا تۇرعان وزبەكستاننىڭ 2,7 مىڭ كومپانياسى تىركەلگەن.

سولتۇستىك كورشىمىزدەگى ساياسي جانە ەكونوميكالىق وقيعالار اياسىندا رەسەيلىك كومپانيالاردىڭ قازاقستانعا كوشۋى جيىلەدى. 2022 -جىلدىڭ باسىندا ەلىمىزدە 8 مىڭ عانا رەسەيلىك زاڭدى تۇلعا تىركەلگەن بولاتىن. ءدال قازىرگى ۋاقىتتا كورسەتكىش بىردەن 2,3 ەسەگە ءوسىپ وتىر.

وسى جىلدىڭ باسىندا دا رەسەيلىك بيزنەس-رەزيدەنتتەردىڭ قازاقستانعا كوشۋى جالعاستى. دەگەنمەن، وتكەن جىلعا قاراعاندا قارقىنى تومەن، اي سايىنعى ءوسىمى 3-5 پايىزدى قۇرايدى. جازدا ءتىپتى تومەندەپ، ايىنا 0,8 پايىزدان 1,3 پايىزعا دەيىن عانا تىركەلدى.