گەوساياسي جاعدايلارعا قاراماستان ءبىزدىڭ قوعام مەن ۇكىمەت ادىلەتتى قازاقستان قۇرىپ جاتىر - پرەزيدەنت
بىرىككەن ۇلتتار ۇيىمى باس اسسامبلەياسىنىڭ 78-سەسسياسىندا ءسوز سويلەگەن پرەزيدەنت قاسىم- جومارت توقايەۆ كەيىنگى ەكى جىلدا قازاقستاندا جۇرگىزىلگەن رەفورمالاردىڭ ناتيجەلەرىنە توقتالدى، دەپ حابارلايدى قازاقپارات ءتىلشىسى.
«قازىرگى الەمدىك، ايماقتىق گەوساياسي جاعدايلارعا قاراماستان ءبىزدىڭ قوعام مەن ۇكىمەت ادىلەتتى قازاقستان قۇرىپ جاتىر. قىسقا ۋاقىت ىشىندە ەلدەگى ينستيتۋتتاردى رەفورمالاپ، كوستيتۋتسياعا وزگەرىس ەنگىزىپ، پرەزيدەنتتىڭ وكىلەتتىگىن قىسقارتىپ، ساياسي جانە ەكونوميكالىق جۇيەنى قايتا قاراپ، جەمقورلىقپەن كۇرەستىك. نەبارى ەكى جىلدىڭ ىشىندە كوپ ءىس اتقارىلدى. وسى ارالىقتا ءبىزدىڭ تۇرعىنداردىڭ مەنتاليتەتى ايتارلىقتاي وزگەردى. اسىرەسە، جاستاردىڭ سانا سەزىمىندە وزگەرىس بايقالادى. پرەزيدەنت مانداتى ءبىر رەتتىك ءارى 7 جىلدىق مەرزىممەن شەكتەلدى. بۇل ۇسىنىستى جالپىحالىقتىق رەفەرەندۋمدا قازاقستان حالقى قولدادى. ءبىز كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت قاعيداسىن بەرىك ۇستانامىز»، - دەدى پرەزيدەنت سەسسيانىڭ جالپى دەباتىندا سويلەگەن سوزىندە.
مەملەكەت باسشىسى بۇل رەفورمالار قازاقستاندا ءادىل، زاڭ ۇستەمدىگى ورناعان قوعام قۇرۋعا باعىتتالعانىن اتاپ ءوتتى.
«قانداي جاعدايدا دا زاڭ ۇستەمدىك ەتۋى ءتيىس. ينۆەستيتسيا تارتۋ، ادامي كاپيتالدى دامىتۋ ءبىزدىڭ ەكونوميكامىزدى نىعايتا تۇسەتىنىن بىلەمىز. مۇنىمەن قاتار قازاقستاندا گەندەرلىك تەڭدىكتى قامتاماسىز ەتۋ باعىتىندا ىلگەرىلەۋ بار. ءبىز پارتيالىق ءتىزىم بويىنشا سايلاناتىندار قاتارىنا جاستار، ايەلدەر جانە مۇمكىندىگى شەكتەۋلى جاندار ءۇشىن 30 پايىزدىق كۆوتا ەنگىزدىك. بۇل وسى ساناتتاعى ازاماتتاردىڭ ەلدىڭ ساياسي ومىرىنە بەلسەندى قاتىسۋىنا ىقپال ەتەدى»، - دەپ تۇيىندەدى پرەزيدەنت.
2045 -جىلعا دەيىن يادرولىق قارۋدان تولىق باس تارتۋدىڭ ستراتەگيالىق جوسپارى قازىرگى كوشباسشىلاردىڭ جاھاندىق قاۋىپسىزدىكتى قامتاماسىز ەتۋگە قوسقان ەڭ ماڭىزدى ۇلەسى بولۋى مۇمكىن.
«30 جىل بۇرىن قازاقستان كەڭەس وكىمەتىنەن مۇراعا قالعان ءتورتىنشى يادرولىق ارسەنالىنان ءوز ەركىمەن باس تارتتى. سوندىقتان يادرولىق كۇن ءتارتىبىنىڭ لوگيكاسىن قايتا قاراۋ كەرەك. يادرولىق دەرجاۆالار اراسىندا يادرولىق قارۋدان ادا الەم قۇرۋ جولىندا ءوزارا سەنىم مەن ىنتىماقتاستىق بولعاندا عانا جاھاندىق تۇراقتىلىقتى قامتاماسىز ەتە الامىز. وسىعان بايلانىستى قازاقستان يادرولىق قارۋعا تىيىم سالۋ تۋرالى شارتتى قاتاڭ ساقتايتىنىن مالىمدەيدى. ءبىز قارۋسىزدانۋ جانە قارۋدى تاراتپاۋ سالاسى بويىنشا جاڭا تەتىكتەردى دامىتۋدى قولدايمىز. 2045 -جىلعا دەيىن يادرولىق قارۋدان تولىق باس تارتۋدىڭ ستراتەگيالىق جوسپارى قازىرگى كوشباسشىلاردىڭ جاھاندىق قاۋىپسىزدىكتى قامتاماسىز ەتۋگە قوسقان ەڭ ماڭىزدى ۇلەسى بولۋى مۇمكىن»، - دەپ ءمالىم ەتتى پرەزيدەنت سەسسيانىڭ جالپى دەباتىندا سويلەگەن سوزىندە.