ۇ ب ت سۇراقتارىن باسقاشا قۇراستىرامىز - ساياسات نۇربەك

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۇلتتىق ءبىرىڭعاي تەستىلەۋ جۇيەسىن وزگەرىستەر كۇتىپ تۇرعانىن ايتتى.

«ۇلتتىق ءبىرىڭعاي تەستتەرىن قۇراستىراتىن 300 ساراپشىنى دايارلادىق. ماماندار ەڭ مىقتى تەست ورتالىقتارىنا بارىپ تاعىلىمدامادان ءوتتى. ەندى ءبىز ۇ ب ت سۇراقتارىن باسقاشا قۇراستىراتىن بولامىز، جۇمىس باستالدى. ۇ ب ت- عا قاتىستى كەز كەلگەن وزگەرىس وتە نازىك سۇراق، بىردەن شۋلاپ كەتەدى. سوندىقتان ونى بىردەن اۋىستىرۋعا مۇمكىندىك جوق. رەفورمانى اقىرىنداپ، 3-4 جىلدىڭ ىشىندە جۇزەگە اسىرۋىمىز كەرەك. ءبىرىنشى كەزەڭدە سۇراقتاردىڭ ساپاسى وزگەرەدى. بالا قالاعان ۋاقىتتا جانە قالاعان جەردە ۇ ب ت تاپسىرا الۋى ءتيىس. جيناعان ۇپايى قاناعاتتاندىرماسا قايتا تاپسىرادى. وزىنە كەرەكتى بال العانعا دەيىن تاپسىرا الادى»، - دەدى ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا.

مينيستر ۇسىنعان مالىمەت بويىنشا بيىل 11 مىڭنان استام تۇلەك ۇ ب ت- دا 90-نان جوعارى بال جيناعان، ءبىراق گرانتقا تۇسپەگەن.

«نەگىزىندە جوعارى وقۋ ورىندارى تالاپكەرلەردى قابىلداۋ ەمتيحاندارىن وزدەرى ۇيىمداستىرىپ، وزدەرى قابىلدايتىن مودەلگە كوشۋىمىز كەرەك. مىسالى، شەتەلدە جوعارى وقۋ ورىندارى ستۋدەنتتەردى وزدەرى تاڭدايدى»، - دەيدى ول.

سونداي-اق، ۆەدومستۆو باسشىسى ۇ ب ت- عا قاتىستى جاڭا رەفورمانىڭ اشىق ءارى كەڭىنەن تۇسىندىرىلەتىنىن ءمالىم ەتتى.

اۆتور

داۋلەت ىزتىلەۋ