گەرمانيا ەكونوميكاسى قۇلدىراپ بارادى

گەرمانيانىڭ ىشكى جالپى ءونىمى جىل سوڭىندا 0,5 پايىزعا تومەندەيدى. نەمىس ەكونوميكالىق ينستيتۋتىنىڭ ساراپشىلارى وسىنداي بولجام ايتىپ وتىر. حالىقارالىق نارىققا باعدارلانعان مەملەكەت گەوساياسي كۇيزەلىستى باستان كەشىپ جاتىر، دەپ حابارلايدى قازاقپارات.

الەمنىڭ الپاۋىت ەلىنىڭ جاعدايى نەگە ۋشىقتى؟ گەرمانيا ەكونوميكاسى ە و پەن G7 مۇشەلىك ەتەتىن مەملەكەتتەر اراسىندا تومەنگى ديناميكانى كورسەتىپ وتىر. حالىقارالىق ۆاليۋتا قورىنىڭ شىلدە ايىنداعى ءى ج ءو- ءنىڭ 0,3 پايىزعا تومەندەۋ تۋرالى بولجامى نەمىس ساراپشىلارىنىڭ پىكىرىنشە وزەكتىلىگىن الدەقاشان جويدى.

ەل ەكونوميكاسىندا 3 توقسان بويى ءوسىم بايقالمايدى، ال ينفلياتسيا دەڭگەيى 6,5 پايىز دەڭگەيىندە قالىپ وتىر. مۇنان بولەك، ءوندىرىس كولەمى دە ازايعان. ۇلكەن جەتىلىك اراسىندا جىل قورىتىندىسىمەن ەكونوميكاسى قۇلدىراۋ الدىندا تۇرعان جالعىز مەملەكەت دەگەن ايدار تاقپاق. بۇعان سەبەپ - گەرمانيانىڭ الەمدىك نارىققا كوبىرەك باسىمدىق بەرۋى.

كريستيان كۋلمانن، ءىرى حيميالىق كومپانيا ديرەكتورى:

- ءبىز سىرتقى فاكتورلار قاتتى اسەر ەتەتىن جانە زيان كەلتىرەتىن جاعدايعا تاپ بولدىق. بۇل دەگەنىڭىز يندۋستريانىڭ ارتتا قالۋىنا اكەپ سوعادى. گەرمانيادا بايقالعان داعدارىستىڭ العاشقى كورىنىستەرى مەنى قاتتى قىنجىلتادى. كورشىلەس ەۋروپا ەلدەرى قىزمەتتەردى ەكسپورتتاۋعا باعىتتالسا، گەرمانيا ەكونوميكاسىندا ونەركاسىپ باسىم رولگە يە. مەملەكەت جىلدار بويى ارزان ەنەرگيا كوزدەرىنەن پايدا كوردى.

كانسلەر ولاف شولتستىڭ پىكىرىنشە، نەمىس ەكونوميكاسىنا قارقىن بەرۋ ءۇشىن ونەركاسىپتىڭ عىلىمي باعىتىنا بەت بۇرعان ءجون. ياعني، اككۋمۋلياتور زاۋىتىن سالۋ، ەلەكتر ماشينالارىنا ينۆەستيتسيا قۇيۋ جانە جارتىلاي وتكىزگىشتەر ءوندىرىسىن قولعا الۋ دۇرىس شەشىم.

ولاف شولتس، گەرمانيا كانسلەرى:

- گەرمانيا ونەركاسىبىنىڭ كەلەشەگى ەلەكتر قۋاتىنا كوبىرەك بايلانىستى. ەلىمىز يندۋستريالدى مەملەكەت بولعاندىقتان، ەلەكتر ەنەرگياسىن كوبىرەك تۇتىنادى. گەرمانيا ونەركاسىبى دامىعانىمەن، ەلەكتر قۋاتىنا تاۋەلدىلىگى تاعى ارتادى.

جۇمىسسىزدىقتىڭ ارتۋى مەن ينفلياتسيا سالدارىنان كەي ساراپشىلار گەرمانيانى «ەۋروپانىڭ ناۋقاس ادامىنا» تەڭەي باستادى. العاش مۇنداي سيپاتتاما 1999 -جىلى بەدەلدى «The Economist» جۋرنالىندا ايتىلدى. ول كەزەڭدە دە بۇگىنگىدەي تومەنگى ەكسپورت پەن جۇمىسسىزدىقتان حالىق زارداپ شەكتى. ءبىراق ۇكىمەتتىڭ كەشەندى رەفورماسى ەلدى ۇزاققا سوزىلعان داعدارىستان الىپ شىعىپ، الەمدىك كوش قاتارىنا قوستى. ءبىراق بۇل ارەكەتتى قايتالاۋ قانشالىقتى مۇمكىن دەگەن ساۋالدى ەكونوميستەر جاۋاپسىز قالدىردى.

www.24.kz