ە ا ە و- نىڭ كەدەندىك باجى: قازاقستاننىڭ ۇلەسىن ارتتىرۋ ماسەلەسى قارالادى

استانا. KAZINFORM – ەۋرازيالىق ەكونوميكالىق وداقتاعى كەدەندىك اكەلۋ باجىنان قازاقستاننىڭ الاتىن ۇلەسى ارتۋى مۇمكىن. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ءمالىم ەتتى.

بۇگىن سەناتتىڭ جالپى وتىرىسىنان كەيىن تىلشىلەر مينيستردەن قازىر قازاقستاننىڭ ۇلەسىن قايتا قاراۋ قاشان قارالاتىنىن سۇرادى.

ءوز كەزەگىندە ا. شاققاليەۆ جاقىن ارادا بۇل ماسەلە ە ا ە و- عا مۇشە ەلدەردەگى ارىپتەستەرىمەن تالقىلاناتىنىن ايتتى.

«قازىر ساۋدا بويىنشا احۋال وزگەردى. سوندىقتان باجدىڭ پروپورتسيالارىن وزگەرتۋ كەرەك. ال ونى وزگەرتۋ ءۇشىن ءبىز جاڭا ادىستەمە دايىنداپ جاتىرمىز. بۇل ماسەلە قاراشا ايىندا قاراستىرىلادى»، - دەدى مينيستر.

بۇل تۇرعىدا ول جاڭا ادىستەمە اياسىندا ءار ەلگە تيەسىلى ۇلەس قايتا ەسەپتەلەتىنىن جەتكىزدى.

«اتاپ ايتقاندا، ەلىمىزگە تيەسىلى ۇلەسىمىزدى مىندەتتى تۇردە ۇلعايتۋ كەرەك. بۇل تۇرعىدا «9 پايىز نەمەسە 12 پايىز بولا ما؟» دەگەن سۇراققا قازىر ناقتى ايتا المايمىن. جاڭا ادىستەمە بويىنشا كەلىسىپ الۋىمىز كەرەك. سودان كەيىن ءتيىستى ەسەپ-قيساپ جاساپ، ونىڭ دەڭگەيى بەلگىلى بولادى»، - دەدى ۆەدومستۆو باسشىسى.

ە ا ە و اياسىندا كەدەندىك باج بويىنشا رەسەيدە 85 پايىز، قازاقستاندا - 7 پايىزعا جۋىق، بەلارۋستە - 4,8 پايىز، قىرعىزستاندا - 1,9 پايىز، ارمەنيادا 1,2 پايىز ۇلەسى ەسكەرىلگەن.

اۆتور

رۋسلان عابباسوۆ