نازاربايەۆ ۋنيۆەرسيتەتى مەن مەكتەپتەرى قوعامدىق باقىلاۋدا بولادى

بۇگىن سەناتتىڭ جالپى وتىرىسىندا «قوعامدىق باقىلاۋ تۋرالى» زاڭى مەن ىلەسپە قۇجات ماقۇلداندى، دەپ حابارلايدى قازاقپارات ءتىلشىسى.

زاڭدا قوعامدىق باقىلاۋ سالاسىن مەملەكەتتىك رەتتەۋ ءتارتىبىن بەلگىلەۋ، قوعامدىق باقىلاۋعا قويىلاتىن تالاپتاردى ايقىنداۋ، قوعامدىق باقىلاۋ وبەكتىلەرى مەن سۋبەكتىلەرىنىڭ قۇقىقتارى مەن مىندەتتەرىن رەگلامەنتتەۋ ەسكەرىلگەن.

زاڭنىڭ ماقساتى - قازاقستان رەسپۋبليكاسى ازاماتتارىنىڭ قوعامدىق باقىلاۋ ارقىلى مەملەكەت ىستەرىن باسقارۋعا قاتىسۋىن قامتاماسىز ەتۋ.

«اتالعان زاڭدار مەملەكەتتىك ورگانداردىڭ، كۆازيمەملەكەتتىك سەكتوردىڭ اشىقتىق دارەجەسىن كەڭەيتىپ، ازاماتتاردىڭ قوعامدىق بەلسەندىلىگىن ارتتىرۋعا باعىتتالعان. بىرىنشىدەن، زاڭدا قوعامدىق باقىلاۋ ۇعىمى، قوعامدىق باقىلاۋدىڭ ماقساتى مەن باستى قاعيداتتارى ايقىندالادى. ەكىنشىدەن، قوعامدىق باقىلاۋدى ىسكە اسىراتىن قوعامدىق باقىلاۋ سۋبەكتىلەرى جانە قوعامدىق باقىلاۋ وبەكتىلەرى ايقىندالادى جانە ولاردىڭ قۇقىقتارى مەن مىندەتتەرى ناقتىلانادى. ماسەلەن، قوعامدىق باقىلاۋ سۋبەكتىلەرى قوعامدىق باقىلاۋ توپتارىن قۇرۋعا، ساراپشىلاردى تارتۋعا، سونداي- اق، اقپارات سۇراتۋعا، قوعامدىق باقىلاۋ وبەكتىلەرىنىڭ ارەكەتتەرىنە نەمەسە ارەكەتسىزدىگىنە شاعىمدانۋعا جانە باسقا دا قادامدارعا قۇقىلى بولادى»، - دەدى سەناتور رۋسلان رۇستەموۆ.

قوعامدىق باقىلاۋ وبەكتىلەرى قوعامدىق باقىلاۋ نىساندارىنىڭ ۇسىنىمدارىن قاراۋعا جانە ولاردى ينتەرنەت- رەسۋرستاردا ورنالاستىرۋعا، مۇددەلەر قاقتىعىسىن بولدىرماۋعا، قاۋىپسىزدىك شارالارىن ساقتاۋعا مىندەتتى بولادى.

«قوعامدىق باقىلاۋدىڭ نەگىزگى فورمالارى رەتىندە قوعامدىق مونيتورينگ، قوعامدىق ساراپتاما، قوعامدىق تىڭداۋ ۇسىنىلادى.

سونىمەن قاتار، زاڭدا قوعامدىق باقىلاۋدى جۇزەگە اسىرۋعا قاتىسۋ شارتتارى ايقىندالعان. قوعامدىق باقىلاۋدى جۇزەگە اسىرۋعا ون سەگىز جاسقا تولماعان، سوتتىلىعى وتەلمەگەن، ناركولوگيالىق نەمەسە پسيحيكالىق ەسەپتە تۇرعان ادامدار جىبەرىلمەيدى. مۇنىمەن قوسا، قىزمەتىندە شەتەلدىڭ قاتىسى بار، قولدانىستاعى زاڭناماعا سايكەس قىزمەتى توقتاتىلعان نەمەسە تىيىم سالىنعان كوممەرتسيالىق ەمەس ۇيىمدارعا شەكتەۋ قويىلادى»، - دەدى دەپۋتات.

اتاپ ايتقاندا، قوعامدىق باقىلاۋ ناتيجەلەرىن قاراۋ نورمالارى بەكىتىلدى. وسىلايشا، قوعامدىق باقىلاۋ وبەكتىلەرى قوعامدىق باقىلاۋ ناتيجەلەرى بويىنشا قورىتىندى قۇجاتتى 10 كۇن مەرزىمدە قاراپ جانە دالەلدى جاۋاپ جىبەرۋى كەرەك. بۇل رەتتە قوعامدىق باقىلاۋ وبەكتىلەرى ءمان- جايلاردى جان- جاقتى، تولىق جانە وبەكتيۆتى قاراۋ ءۇشىن شارالار قولدانۋعا مىندەتتى.

بۇدان ءارى قوعامدىق باقىلاۋ جۇرگىزۋ ءتارتىبىن رەتتەيتىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق باقىلاۋ، اكىمشىلىك راسىمدەردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭدا پەتيتسيا ينستيتۋتىن رەگلامەنتتەۋ جونىندەگى تۇزەتۋلەر قامتىلعان. بىرىنشىدەن، زاڭنامادا پەتيتسيا ۇعىمى بەكىتىلدى. پەتيتسيا - مەملەكەتتىك ورگانعا، جەرگىلىكتى وكىلدى جانە اتقارۋشى ورگانعا ەلەكتروندىق قۇجات نىسانىندا جىبەرىلگەن جانە ق ر اكىمشىلىك راسىمدىك- پروتسەستىك كودەكستە بەلگىلەنگەن تارتىپپەن قارالاتىن ۇجىمدىق حابار، ءۇن قوسۋ نەمەسە ۇسىنىس.

ەكىنشىدەن، اكىمشىلىك راسىمدىك- پروتسەستىك كودەكستە پەتيتسيالاردى بەرۋ جانە قاراۋ ءتارتىبى بەكىتىلەدى. ۇشىنشىدەن، پەتيتسيانى قازاقستان رەسپۋبليكاسىنىڭ ازاماتتارى ارنايى ينتەرنەت پورتال ارقىلى بەرە الادى. تورتىنشىدەن، ۋاكىلەتتى ورگان پەتيتسيا جاريا بولعانشا ونىڭ زاڭدا بەكىتىلگەن شارتتارعا سايكەستىگىن انىقتايدى.

پەتيتسيانى مىندەتتى تۇردە قاراۋ ءۇشىن ونى قولدايتىن داۋىستاردىڭ شەكتى ماندەرى انىقتالادى:

- اۋداندىق دەڭگەي (اكىمدىكتەر قۇزىرەتىنە جاتاتىن ماسەلەلەر بويىنشا) حالقى 50 مىڭنان اساتىن بولسا، 2,5 مىڭ داۋىس، قالعاندارى ءۇشىن حالىق سانىنىڭ كەمىندە 5 پايىزى بولۋى كەرەك.

- اۋداندىق دەڭگەي (ءماسليحاتتار قۇزىرەتىنە جاتاتىن ماسەلەلەر بويىنشا) - حالقى 50 مىڭنان اساتىن بولسا، 5 مىڭ داۋىس، قالعاندارى ءۇشىن حالىق سانىنىڭ كەمىندە 10 پايىزى بولۋى كەرەك؛

- وبلىستىق دەڭگەي (اكىمدىكتەر قۇزىرەتىنە جاتاتىن ماسەلەلەر بويىنشا) - ءتيىستى اكىمشىلىك- اۋماق تۇرعىندارىنىڭ % 1 داۋىسى بولۋى كەرەك

- وبلىستىق دەڭگەي (ءماسليحاتتار قۇزىرەتىنە جاتاتىن ماسەلەلەر بويىنشا) - ءتيىستى اكىمشىلىك- اۋماق حالقىنىڭ كەمىندە % 2 بولۋى كەرەك؛

- رەسپۋبليكالىق دەڭگەي (ۇكىمەت قۇزىرەتىنە جاتاتىن ماسەلەلەر بويىنشا) - كەمىندە 50 مىڭ داۋىس بولۋى كەرەك.

سەنات مالىمەتىنە قاراعاندا، بۇگىن ماقۇلدانعان زاڭ اياسىندا «نازاربايەۆ ۋنيۆەرسيتەتى»، «نازاربايەۆ زياتكەرلىك مەكتەپتەرى» جانە «نازاربايەۆ قورى» مارتەبەسى تۋرالى» زاڭعا ۋنيۆەرسيتەتتە، زياتكەرلىك مەكتەپتەردە قوعامدىق باقىلاۋ «قوعامدىق باقىلاۋ تۋرالى» ق ر زاڭىنا سايكەس جۇزەگە اسىرىلاتىنى تۋرالى نورما ەنگىزىلدى.