قازاقستان ازىق- تۇلىك جەتكىزۋشى ايماقتىق حابقا اينالۋعا دايىن - مەملەكەت باسشىسى
بىرىككەن ۇلتتار ۇيىمى باس اسسامبلەياسىنىڭ 78-سەسسياسىندا ءسوز سويلەگەن پرەزيدەنت قاسىم- جومارت توقايەۆ ترانسكاسپي حالىقارالىق كولىك ءدالىزىنىڭ الەۋەتىن پايدالانۋ - الەمدىك ازىق- تۇلىك قاۋىپسىزدىگىن قامتاماسىز ەتۋگە ۇلكەن ۇلەس قوساتىنىن ايتتى، دەپ حابارلايدى قازاقپارات ءتىلشىسى.
«بىزگە دامۋ قۇقىعىن قامتاماسىز ەتە وتىرىپ، جاھانداعى وزەكتى ماسەلەلەردى شەشۋگە ىقپال ەتەتىن جاڭا باعامدار كەرەك. ول ءۇشىن دۇنيەجۇزىلىك ساۋدا ۇيىمىنىڭ قاعيداتتارى مەن ەرەجەلەرىنە نەگىزدەلگەن اشىق، انىق ءارى ينكليۋزيۆتى كوپجاقتى ساۋدا جۇيەسى قاجەت. سونىمەن قاتار بىزگە جاھاندىق ازىق- تۇلىك قاۋىپسىزدىگىنىڭ اناعۇرلىم ءمىنسىز جۇيەسىن قۇرۋدى ويلاستىرعان ءجون. بىلتىر دۇنيەءجۇزى حالقىنىڭ 10 پايىزعا جۋىعى اشتىقپەن بەتپە- بەت كەلدى»، - دەپ توقتالدى مەملەكەت باسشىسى.
بۇل ماسەلەنىڭ شەشىمى رەتىندە پرەزيدەنت ءوندىرىس كولەمىن جانە ازىق- تۇلىك تاۋارلارىنىڭ ەكسپورتى مەن يمپورتىنا قاتىستى اقپاراتپەن ەركىن الماسۋ ءىسىن جانداندىرۋ قاجەت دەگەن باستاما كوتەردى.
«ءبىز حالىقارالىق قاۋىمداستىقتىڭ ازىق- تۇلىك داعدارىستارىنا توتەپ بەرۋ شارالارىن قارجىلاندىرۋىنا اشىق مونيتورينگ جۇرگىزۋدى بىرلەسىپ قامتاماسىز ەتۋىمىز كەرەك. قازاقستان ازىق- تۇلىك جەتكىزۋشى ايماقتىق حابقا اينالۋعا دايىن. ول ءۇشىن بىزدە بارلىق قاجەتتى رەسۋرس، ينفراقۇرىلىم جانە لوگيستيكا بار. ەلىمىز قازىردىڭ وزىندە ەۋروپا مەن ازيا اراسىنداعى قۇرلىقتىق جۇك تاسىمالىنىڭ 80 پايىزعا جۋىعى وتەتىن سەنىمدى باعىت سانالادى. «ورتا ءدالىز» اتالاتىن ترانسكاسپي حالىقارالىق كولىك باعدارى شىعىس پەن باتىس اراسىنداعى ءوزارا قاتىناستاردى ەداۋىر نىعايتا الادى. بۇل كولىك باعدارى ماڭىزدى نارىقتار اراسىنداعى ساۋدا قارقىنىن ۇلعايتىپ، تەڭىز جولىمەن جۇك تاسىمالداۋعا كەتەتىن ۋاقىتتى ەكى ەسەگە جۋىق قىسقارتۋعا مۇمكىندىك بەرەدى»، - دەدى پرەزيدەنت.
بۇعان قوسا مەملەكەت باسشىسى ب ۇ ۇ زالىنا جينالعان مەملەكەت باسشىلارى ادامزاتتىڭ بولاشاعىنا جاۋاپتى ەكەنىن باسا ايتتى.
سونىمەن قاتار، قاسىم- جومارت توقايەۆ قازىرگى گەوساياسي جاعدايلارعا قاراماستان ءبىزدىڭ قوعام مەن ۇكىمەت ادىلەتتى قازاقستان قۇرىپ جاتقانىن اتاپ ءوتتى.