وزبەكستاندا كىسى ءولتىرىپ، 4 جىلدان بەرى قاشىپ جۇرگەن كۇدىكتى استانادان ۇستالدى
ەلوردالىق پوليتسەيلەر جەدەل الدىن الۋ شاراسى بارىسىندا قىلمىسكەردى انىقتادى، دەپ حابارلايدى قازاقپارات.
20-21-قىركۇيەك ارالىعىندا ەلوردا اۋماعىندا اۋقىمدى جەدەل ىزدەستىرۋ جۇمىستارى ءجۇردى.
وپەراتسيانىڭ العاشقى كۇنىندە-اق استانا قالاسى پوليتسيا دەپارتامەنتىنىڭ قىزمەتكەرلەرى 7 قىلمىسكەردى ۇستادى.
سونداي-اق، ءىز-ءتۇزسىز جوعالعان ەكى ازاماتتىڭ جۇرگەن جەرى بەلگىلى بولدى.
وسىلايشا، ەلوردالىق پوليتسەيلەر مەملەكەتارالىق ىزدەۋدە جۇرگەن 31 جاستاعى وزبەكستان رەسپۋبليكاسىنىڭ ازاماتىن قۇرىقتادى.
ول 2019 -جىلى نامانگان وبلىسىندا كىسى ولتىرگەنى ءۇشىن ىزدەۋدە بولعان جانە قىلمىس جاساعاننان كەيىن قازاقستان اۋماعىنا ءوتىپ، جاسىرىنعان.
ەر ادام استانا پوليتسيا دەپارتامەنتىنىڭ ۋاقىتشا ۇستاۋ يزولياتورىنا جەتكىزىلدى.
قازىرگى ۋاقىتتا مينسك كونۆەنتسياسىنا سايكەس ەكستراديتسيالاۋ ماسەلەسى شەشىلىپ جاتىر.