دزيۋدودان 2027-جىلعى الەم چەمپيوناتىنىڭ تۋى قازاقستانعا تابىستالدى
استانا. KAZINFORM - قازاقستان 2027-جىلى استانادا وتەتىن دزيۋدودان الەم چەمپيوناتىنىڭ تۋىن قابىلدادى. سالتاناتتى ءراسىم ازەربايجان استاناسى باكۋدە ءوتىپ جاتقان الەم بىرىنشىلىگى اياسىندا ۇيىمداستىرىلدى.
ءراسىم بارىسىندا ازەربايجان دزيۋدو فەدەراتسياسىنىڭ ۆيتسە-پرەزيدەنتى ەلنۋر مامەدلي الەم چەمپيوناتىنىڭ تۋىن حالىقارالىق دزيۋدو فەدەراتسياسىنا (IJF) قايتاردى.
ءوز كەزەگىندە IJF باس حاتشىسى ليزا اللان تۋدى قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەيەۆكە سالتاناتتى تۇردە تابىستادى.
دزيۋدودان كەلەسى الەم چەمپيوناتى 2027-جىلدىڭ 7-14-ماۋسىمى ارالىعىندا استانا قالاسىندا وتەدى.
بۇل دودا 2028-جىلى لوس-اندجەلەستە وتەتىن وليمپيادا ويىندارىنا ىرىكتەۋ كەزەڭىندەگى ماڭىزدى جارىستاردىڭ ءبىرى سانالادى. الەمنىڭ ۇزدىك دزيۋدوشىلارى وليمپيادا جولداماسىنا قول جەتكىزۋگە قاجەتتى رەيتينگتىك ۇپايلار ءۇشىن سىنعا تۇسەدى.
قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەيەۆ الەم چەمپيوناتىنا دايىندىق بارىسىندا جارىستى جوعارى دەڭگەيدە ۇيىمداستىرۋعا جانە ۇلتتىق قۇرامانىڭ دايىندىعىنا باسىمدىق بەرىلەتىنىن ايتتى.
- الەم چەمپيوناتىن قازاقستاندا وتكىزۋ - حالىقارالىق سپورت قاۋىمداستىعىنىڭ ەلىمىزگە بىلدىرگەن سەنىمىنىڭ كورىنىسى. بۇل بىزگە ۇلكەن جاۋاپكەرشىلىك جۇكتەيدى. ءبىزدىڭ مىندەتىمىز - جارىستى حالىقارالىق دزيۋدو فەدەراتسياسىنىڭ تالاپتارىنا ساي وتكىزۋ جانە ۇلتتىق قۇرامانىڭ دايىندىعىن قامتاماسىز ەتۋ. ۇيدە، جانكۇيەرلەر الدىندا بەلدەسۋ سپورتشىلارىمىز ءۇشىن ماڭىزدى سىناق بولماق. سوندىقتان ولاردىڭ جاتتىعۋىنا، حالىقارالىق جارىستارعا قاتىسۋىنا جانە ەل نامىسىن ابىرويمەن قورعاۋى ءۇشىن قاجەتتى جاعداي جاساۋعا كوڭىل بولەمىز. الداعى چەمپيونات ەلدەگى دزيۋدونىڭ دامۋىنا تاعى دا ۇلكەن سەرپىن بەرەدى دەپ سەنەمىز، - دەدى قۋانىشبەك ەسەكەيەۆ.
2027-جىلى دزيۋدودان الەم چەمپيوناتى اراعا 12 جىل سالىپ قايتادان قازاقستاندا ۇيىمداستىرىلادى. بۇعان دەيىن 2015-جىلى استانا قالاسى الەم بىرىنشىلىگىن قابىلداعان بولاتىن.
سونىمەن قاتار قازاقستان 2023-2026-جىلدار ارالىعىندا ءتورت جىل قاتارىنان حالىقارالىق دزيۋدو فەدەراتسياسىنىڭ رەسمي كۇنتىزبەسىنە ەنگەن Qazaqstan Barysy Grand Slam حالىقارالىق تۋرنيرىن وتكىزدى.
اتالعان جارىس وليمپيادا ويىندارىنا ىرىكتەۋ جۇيەسىندە ماڭىزدى ءرول اتقارادى. تۋرنيرگە الەمنىڭ جەتەكشى دزيۋدوشىلارى قاتىسىپ، حالىقارالىق رەيتينگتەگى ۇپايلارىن تولىقتىرۋعا مۇمكىندىك الدى.
وسىنداي جوعارى دەڭگەيدەگى حالىقارالىق جارىستاردىڭ قازاقستاندا تۇراقتى ۇيىمداستىرىلۋى ەلىمىزدىڭ الەمدىك دزيۋدو ارەناسىنداعى بەدەلىن نىعايتىپ، ءىرى سپورتتىق ءىس-شارالاردى قابىلداۋ تاجىريبەسىن ارتتىرىپ كەلەدى.
ايتا كەتەيىك، باكۋدە وتكەن الەم چەمپيوناتىندا قازاقستاندىق شەرزود داۆلاتوۆ 60 كەلىگە دەيىنگى سالماقتا كۇمىس جۇلدەگەر اتانعان بولاتىن.
