زەينەتاقى جيناقتارى: مەملەكەتتىك كەپىلدىكتىڭ جاڭا ءتارتىبى قانداي
استانا. قازاقپارات - 2027-جىلدىڭ 1-قاڭتارىنان باستاپ قازاقستاندا زەينەتاقى جيناقتارىنىڭ ساقتالۋىنا بەرىلەتىن مەملەكەتتىك كەپىلدىكتى جۇزەگە اسىرۋ ءتارتىبى وزگەرەدى.
بۇل رەتتە ۇسىنىلىپ وتىرعان وزگەرىستەر مەملەكەت تاراپىنان ب ج ز ق- داعى زەينەتاقى جارنالارىنىڭ ساقتالۋىن قامتاماسىز ەتۋدەن باس تارتۋدى بىلدىرمەيدى.
قازىر ازامات زەينەتاقى تولەمدەرىن الۋعا قۇقىلى بولعان كەزدە ونىڭ ب ج ز ق- عا ناقتى اۋدارعان زەينەتاقى جارنالارىنىڭ سوماسى ينفلياتسيا دەڭگەيى ەسكەرىلىپ ەسەپتەلەدى. وسى سوما مەن ب ج ز ق- داعى ناقتى زەينەتاقى جيناقتارىنىڭ اراسىندا ايىرماشىلىق بولسا، ول ايىرما رەسپۋبليكالىق بيۋجەت ەسەبىنەن وتەلەدى.
كەلەر جىلدىڭ 1-قاڭتارىنان باستاپ بۇل مەحانيزم وزگەرەدى. قازاقستان رەسپۋبليكاسىنىڭ الەۋمەتتىك كودەكسىنىڭ 217-بابىنا سايكەس مەملەكەت ب ج ز ق- عا ناقتى اۋدارىلعان زەينەتاقى جارنالارىنىڭ باستاپقى مولشەردە ساقتالۋىنا كەپىلدىك بەرەدى.
ەڭبەك مينيسترلىگى تۇسىندىرگەندەي، بۇعان دەيىن ازاماتتاردىڭ ءوز زەينەتاقى جيناقتارىنىڭ قالاي ينۆەستيتسيالاناتىنىنا تىكەلەي ىقپال ەتۋ مۇمكىندىگى بولعان جوق. ينۆەستيتسيالىق ساياساتتى مەملەكەت ايقىنداپ، سالىمشىلاردىڭ ءوز قاراجاتىن باسقارۋ مۇمكىندىگىن شەكتەدى. سوندىقتان مەملەكەت ينۆەستيتسيادان تۇسكەن كىرىس ينفلياتسيا دەڭگەيىنەن تومەن بولعان جاعدايدا تۋىندايتىن ايىرمانى وتەۋ مىندەتىن ءوز موينىنا الدى.
قازىر سالىمشىلاردىڭ ءوز زەينەتاقى جيناقتارىن باسقاراتىن كومپانيانى جانە ينۆەستيتسيالاۋ ستراتەگياسىن تاڭداۋ مۇمكىندىگى كەڭەيىپ كەلەدى. وسىعان بايلانىستى مەملەكەتتىك كەپىلدىكتى بۇرىنعى تارتىپپەن قولدانۋدىڭ باستاپقى نەگىزى ءوز ءمانىن جوعالتادى.
بۇل رەتتە زەينەتاقى اكتيۆتەرىن باسقارۋ جۇيەسى مەملەكەتتىك باقىلاۋدا قالا بەرەدى. قازاقستان رەسپۋبليكاسىنىڭ پرەزيدەنتى باسقاراتىن ۇلتتىق قوردى باسقارۋ جونىندەگى كەڭەس ينۆەستيتسيالىق ساياساتتىڭ نەگىزگى باعىتتارىن ايقىندايدى، اكتيۆتەردى باسقارۋدىڭ تيىمدىلىگىن ارتتىرۋ جونىندەگى ۇسىنىستاردى قارايدى جانە ينۆەستيتسيالاۋ ناتيجەلەرى تۋرالى ەسەپتەردى تىڭدايدى.
قازاقستان رەسپۋبليكاسىنىڭ ۇلتتىق بانكى زەينەتاقى اكتيۆتەرىن ينۆەستيتسيالاۋعا رۇقسات ەتىلگەن قارجى قۇرالدارىنىڭ ءتىزىمىن قالىپتاستىرادى. ال قازاقستان رەسپۋبليكاسىنىڭ ۇكىمەتى ينۆەستيتسيالىق ساياساتتىڭ ءتيىستى تاسىلدەرى مەن نەگىزگى پارامەترلەرىن بەكىتەدى.
وسىلايشا، ۇسىنىلىپ وتىرعان وزگەرىستەر مەملەكەتتىك كەپىلدىكتى ىسكە اسىرۋ تەتىگىن جەتىلدىرۋگە باعىتتالعان.
ايتا كەتەلىك زەينەتاقى جيناعىن سەنىمگەرلىك باسقارۋعا بەرۋ: اقشانىڭ جەلگە ۇشپايتىنىنا قانداي كەپىلدىك بار ەكەندىگى تۋرالى جازعان ەدىك.
