زەينەتاقى 2027-جىلى كۇرت وسەدى: قازاقستاندىقتار قانشا الادى؟
استانا. قازاقپارات - 2027-جىلعى 1-قاڭتاردان باستاپ قازاقستاندا زەينەتاقى تولەمدەرىنىڭ مولشەرى وسەدى. ەڭبەك جانە حالىقتى الەۋمەتتىك قورعاۋ مينيسترلىگى الداعى وزگەرىستەر تۋرالى مالىمەت بەردى.
2027-جىلى زەينەتاقى قالاي وزگەرەدى؟
مينيسترلىكتىڭ مالىمەتىنشە، قازاقستانداعى زەينەتاقى ءۇش بولىكتەن تۇرادى: بازالىق، ىنتىماقتى جانە جيناقتاۋشى زەينەتاقى. تولەم مولشەرى ازاماتتىڭ ەڭبەك وتىلىنە، جيناقتاۋشى زەينەتاقى جۇيەسىنە قاتىسۋ كەزەڭىنە جانە جيناق كولەمىنە بايلانىستى.
ۆەدومستۆونىڭ مالىمەتىنشە، ەڭ تومەنگى كۇنكورىس دەڭگەيى جىل سايىن وسكەن سايىن بازالىق زەينەتاقى مولشەرى دە ۇلعايادى. ال ءبىرىڭعاي جيناقتاۋشى زەينەتاقى قورىنان (ب ج ز ق) تولەنەتىن زەينەتاقى تولەمدەرى جىل سايىن 5 پايىزعا يندەكستەلەدى.
2026-جىلى قازاقستانداعى ەڭ تومەنگى كۇنكورىس دەڭگەيى 50851 تەڭگە بولسا، 2027-جىلى ونى 55173 تەڭگەگە دەيىن كوتەرۋ جوسپارلانىپ وتىر.
2027-جىلعى 1-قاڭتاردان باستاپ جاسىنا بايلانىستى جانە ەڭبەك سىڭىرگەن جىلدارى ءۇشىن تاعايىندالاتىن زەينەتاقى تولەمدەرىن 8,5 پايىزعا ارتتىرۋ جوسپارلانعان. بۇل ءوسىم بارلىق زەينەتكەرگە ورتاق تارتىپپەن قولدانىلادى.
ەڭ تومەنگى زەينەتاقى - 113541 تەڭگە
2027-جىلدان باستاپ ەڭ تومەنگى بازالىق زەينەتاقى كۇنكورىس دەڭگەيىنىڭ 70 پايىزىنا تەڭ بولادى. ال ەڭ جوعارى بازالىق زەينەتاقى مولشەرىن كۇنكورىس دەڭگەيىنىڭ 118 پايىزىنان 120 پايىزىنا دەيىن كوتەرۋ كوزدەلگەن.
وسىلايشا، ەڭ تومەنگى جيىنتىق زەينەتاقى 113541 تەڭگەنى قۇرايدى. ونىڭ ىشىندە:
بازالىق زەينەتاقى - 38622 تەڭگە؛
ىنتىماقتى زەينەتاقى - 74919 تەڭگە.
ال ەڭ جوعارى جيىنتىق زەينەتاقى 259795 تەڭگە بولادى دەپ جوسپارلانىپ وتىر. ونىڭ:
بازالىق بولىگى - 66208 تەڭگە؛
ىنتىماقتى بولىگى - 193587 تەڭگە.
2027-جىلعا ارنالعان زەينەتاقى تولەمدەرىنە قاجەتتى قاراجات 2027-2029-جىلدارعا ارنالعان رەسپۋبليكالىق بيۋجەت جوباسىندا قاراستىرىلعان.
بازالىق زەينەتاقى قالاي ەسەپتەلەدى؟
قازاقستاندا 2023-جىلدان باستاپ بازالىق زەينەتاقى مولشەرىن بەس جىل ىشىندە كەزەڭ-كەزەڭىمەن ارتتىرۋ جۇرگىزىلىپ كەلەدى.
وسى كەزەڭدە ەڭ تومەنگى بازالىق زەينەتاقىنى كۇنكورىس دەڭگەيىنىڭ 54 پايىزىنان 70 پايىزىنا، ال ەڭ جوعارى مولشەرىن 100 پايىزدان 120 پايىزعا دەيىن كوتەرۋ كوزدەلگەن.
199 -جىلعى 1-قاڭتارعا دەيىن ەڭبەك ءوتىلى جوق جانە جيناقتاۋشى زەينەتاقى جۇيەسىنە قاتىسپاعان ازاماتتار ءۇشىن 2027-جىلى مەملەكەتتىك بازالىق زەينەتاقى كۇنكورىس دەڭگەيىنىڭ 70 پايىزىنا تەڭ بولىپ، 38622 تەڭگەنى قۇرايدى.
2027-جىلى جاڭا زەينەتاقى جارنالارى ەنگىزىلە مە؟
2027-جىلى مىندەتتى زەينەتاقى جارنالارى، مىندەتتى كاسىپتىك زەينەتاقى جارنالارى، ەرىكتى زەينەتاقى جارنالارى جانە جۇمىس بەرۋشىنىڭ مىندەتتى زەينەتاقى جارنالارى قولدانىستاعى زاڭناماعا سايكەس تولەنە بەرەدى.
مينيسترلىك مالىمەتىنشە، 2027-جىلى زەينەتاقى جارنالارىنىڭ جاڭا تۇرلەرىن ەنگىزۋ جوسپارلانباعان.
زەينەتاقى جيناعىن باسپانا مەن ەمدەلۋگە پايدالانۋعا بولادى
جۇمىس ىستەيتىن قازاقستاندىقتار ب ج ز ق- داعى جيناعىنىڭ ءبىر بولىگىن تۇرعىن ءۇي جاعدايىن جاقسارتۋعا جانە ەمدەلۋگە بۇرىنعىداي پايدالانا الادى.
ول ءۇشىن ازاماتتىڭ زەينەتاقى شوتىنداعى قاراجات بەلگىلەنگەن ەڭ تومەنگى جەتكىلىكتىلىك شەگىنەن جوعارى بولۋى كەرەك.
ەڭ تومەنگى جەتكىلىكتىلىك شەگى - ازاماتتىڭ بولاشاقتا بەلگىلەنگەن ەڭ تومەنگى دەڭگەيدەن كەم ەمەس زەينەتاقى الۋىن قامتاماسىز ەتۋ ءۇشىن ونىڭ شوتىندا قالۋعا ءتيىس ەڭ از سوما.
بۇل كورسەتكىش الەۋمەتتىك- ەكونوميكالىق پارامەترلەردى، سونىڭ ىشىندە ەڭ تومەنگى زەينەتاقىنى، ەڭ تومەنگى جالاقىنى، كۇنكورىس دەڭگەيىن، ينفلياتسيانى جانە ينۆەستيتسيالىق كىرىستىلىكتى ەسكەرە وتىرىپ ەسەپتەلەدى.
ۇكىمەت قاۋلىسىنا سايكەس، جەتكىلىكتىلىك شەگى الەۋمەتتىك كورسەتكىشتەردىڭ يندەكساتسياسىنا بايلانىستى جىل سايىن قايتا قارالادى.
ب ج ز ق- دان ەڭ تومەنگى تولەم قانشا بولادى؟
جيناقتاۋشى زەينەتاقى الۋعا زەينەتاقى قورىندا جيناعى بار ازاماتتار قۇقىلى. تولەمنىڭ ناقتى كولەمى مىندەتتى، مىندەتتى كاسىپتىك جانە ەرىكتى زەينەتاقى جارنالارى ەسەبىنەن جينالعان قاراجاتقا بايلانىستى.
2027-جىلى ب ج ز ق- دان تولەنەتىن زەينەتاقىنىڭ ەڭ تومەنگى مولشەرى 40063 تەڭگە بولادى دەپ كورسەتىلگەن.
ال جيناقتاۋشى زەينەتاقى تولەمىنىڭ ەڭ جوعارى مولشەرىنە شەكتەۋ قويىلمايدى. ول ءار ازاماتتىڭ ب ج ز ق- داعى جيناعىنىڭ كولەمىنە قاراي جەكە ەسەپتەلەدى.
ايتا كەتەيىك، قازاقستاندا زەينەتاقى جۇيەسىن كەزەڭ- كەزەڭىمەن جاڭارتۋ جالعاسىپ جاتىر. وزگەرىستەر بازالىق جانە ىنتىماقتى زەينەتاقى مولشەرىنە عانا ەمەس، ازاماتتاردىڭ جيناقتارىن پايدالانۋ تارتىبىنە دە قاتىستى.
