زەينەتاقى قورىنان ينفراقۇرىلىمدىق نىساندارعا 1,5 تريلليون تەڭگە نەگە بولىنەدى - مينيستر جاۋابى
پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ زەينەتاقى قاراجاتىنان ينفراقۇرىلىمدىق نىساندارعا نەگە 1,5 تريلليون تەڭگە بولىنەتىنىن جانە نەگە رەسپۋبليكالىق بيۋجەت قارجىسىن پايدالانۋعا بولمايتىنىن ءتۇسىندىردى، دەپ حابارلايدى Kazinform.
«زەينەتاقى قورىنان اقشا جۇمسالمايدى، ينۆەستيتسيالانادى. بىزدە مەملەكەتتىك باعالى قاعازدارعا، كۆازيمەملەكەتتىك سەكتوردىڭ باعالى قاعازدارىنا، باسقا دا قۇرالدارعا 17 تريلليون تەڭگەدەن استام ينۆەستيتسيا سالىنادى. ونىڭ شامامەن %30 شەتەلدە ينۆەستيتسيالانادى. ۇلتتىق بانكپەن جانە «بايتەرەك» حولدينگىمەن بىرگە تالقىلانىپ جاتقان ۇسىنىس وسى زەينەتاقى جيناقتارىنىڭ ءبىر بولىگىن ەكونوميكانى دامىتۋ ءۇشىن سينەرگەتيكالىق ەففەكت اكەلەتىن جاقسى ءىرى جوبالاردى قارجىلاندىرۋعا باعىتتاۋ بولىپ وتىر. وسى جوبالاردان جۇمىس ورىندارى قۇرىلىپ، سالىق تولەنەدى جانە جوبا تولىعىمەن ءوزىن اقتايدى»، - دەدى ەرۇلان جاماۋبايەۆ ۇكىمەت ۇيىندە وتكەن بريفينگتە.
پرەمەر-ءمينيستردىڭ ورىنباسارى قازاقستاندىقتاردىڭ جيناقتارى ساقتالاتىنىن، وعان مەملەكەت كەپىلدىك بەرەتىنىن ايتتى.
«پرەمەر-مينيستر مەملەكەتتىڭ كەپىلدىك بەرەتىنىن ايتتى، ءتىپتى فورس-ماجور نەمەسە جوبا ساتسىزدىككە ۇشىراسا، مەملەكەت ءبارىبىر ءسىز بەن ءبىزدىڭ جيناقتارىمىزعا كەپىلدىك بەرەدى. ءبىز بۇل اقشا ءۇشىن الاڭداماۋىمىز كەرەك. مىندەتتەردىڭ ءبىرى - ەكونوميكاعا ينۆەستيتسيا سالۋ. ب ج ز ق قاراجاتى ۇزاق مەرزىمدى جيناقتاۋدى بىلدىرەتىندىكتەن، ءبىز بۇل اقشانى ەكونوميكاعا جاقسى جوبالاردى نەسيەلەۋ ءۇشىن دۇرىس پايدالانۋىمىز كەرەك»، - دەپ ءتۇسىندىردى ەرۇلان جاماۋبايەۆ.
